2 Samuel 7 - Ebaibuli

¹ Kosodi kanen, kiboikin ekabaka togoke, nakisiyeŋunia EJAKAIT ŋes kama ejaas lukasurupoke lualukunito,

² Kotema ekabaka enabi Natan ebe, “Koany, eboie eoŋ kotogo loka ikito luka eres, konye iboie asaduku naka Edeke kotoma aigalisio.”

³ Kotema Natan ekabaka atiar, “Kolot, kiswama kere nuejaas otaukon; naarai ejai EJAKAIT kajo.”

⁴ Kosodi kanen, kakuare kaŋin, kobu akirot naka EJAKAIT mama ejai Natan ebe,

⁵ “Kolot kolimok Daudi ekakejaanakinan ebe, ‘Inera EJAKAIT kwanata ebe, Idukokini kereka ijo eoŋ etogo loeboieneno?

⁶ Naarai mam eoŋ eboikino togo ageun kapaaran naetolomunia idwe luka Isirael koMisiri, kiton lolo, konye alosenenei kowema, kowema lokalaunan da.

⁷ Kaiboisio kere nualosenen kidwe luka Isirael, abu eoŋ kener akirot kateker adiopet naka Isirael, nuecorakini aitanyam ikatuŋa Isirael ebe, “Kanukinyo mam yes kidukokiniata eoŋ etogo loka eres?”

⁸ Aso do kolimok Daudi ekakejaanakinan kwanata ebe, ‘Inera EJAKAIT loka ajoresio kwanata ebe, Abu kalem jo korony, katupit amerekekin, tetere iraun ekapolon ayait ikatuŋa, ayait Isirael.

⁹ Ajaenena kajo kama ilosenenei kere, amudia lukasurupokon kere kakonyenekon; etuluori jo ekiror lokapolon, kwape ekiror loka lukapolok kaluejaas kakwap.

¹⁰ Aseikini ikatuŋa Isirael aibois, eraikini kes, tetere iboiete aiboisikec, komam bobo itwobosete; komam bobo idwe luka aronis iticanete kes, kwape lem sek.

¹¹ Kwape kapaaran naecorakinia eoŋ ikatubok ayait ikatuŋa Isirael; esiyeŋuni jo kama ejaas lukasurupokon kere, Bobo da kilimokini EJAKAIT jo ebe kisubakini EJAKAIT jo ekek.

¹² Kedoloto apaarasiakon, ijotori kalukapapaakon, adakakini aurikon naetupakini, naelomuni kakoikikon, eticasi da ajakanutuke.

¹³ Ŋol ŋes edukokini ekakiror etogo, eticasi eoŋ eicoloŋ loka ajakanutuke ikar kere.

¹⁴ Araun eoŋ papake, ŋes da eraun okokuka; arai kiswama ŋesi numam adolit, alecori ŋes kebela loka ituŋa, ka ainomonom naka idwe luka ituŋa.

¹⁵ Konye mam akaitim enyouni kamake, kwape kalemaria kaneejai Saul, loabu kalema kakonyenekon.

¹⁶ Itogogoŋio ekekikon ka ajakanutukon ikar kere kakonyenekon: iticasio eicoloŋokon loka ajakanut ikar kere.”

¹⁷ Kwape ejaatar akiro ŋun kere, kwape ejaar aitapoet ŋin kere, kolimok Natan Daudi kwaŋin.

¹⁸ Kosodi Daudi ekabaka alomar, kiboikin kakonyen nuka EJAKAIT; kotema atiar, “Eoŋ iŋai, wu EJAKAIT Edeke, ekakek da inyo, ijo aitodolun eoŋ kiton kwana?

¹⁹ Kerai ŋin da akirot naedit kakonyenekon, wu EJAKAIT Edeke; konye iner ijo da nuka ekek loka ekejaanakinanikon kokar luipu noi luepote; ŋin da kopone loka ituŋa, wu EJAKAIT Edeke!

²⁰ Inyo bobo epedori Daudi alimokin jo? Naarai ijeni ekonikejaanakinan, wu EJAKAIT Edeke.

²¹ Iswama ijo apolou na kere, kanuka akonikirot, kwape ejaar ekonitau, aitejenun ekejaanakinanikon.

²² Ŋes ipoloor ijo, wu EJAKAIT Edeke: naarai emamei yeneputos kajo, emamei da Edeke ece dimarai ijo, kwape kejaatar kere nukipou keirasi kakosiki.

²³ Ani bo ateker adio kakwap naeputos kikonituŋa, kes Isirael, luabu Edeke kolot alakun kanuke araun iketuŋa, adumakin ŋes ekiror, ka aswam nukos kanukus, kakiro nusogim kanuka akonikwap, kakonyen nuka ituŋakon luibu kolaku koMisiri kanukon, katekerin kodekesiokec da?

²⁴ Ibu kitieat kanukon ikonituŋa Isirael araun ituŋakon ikar kere; ka jo da EJAKAIT, ibu koraun Edekekec.

²⁵ Wu EJAKAIT Edeke akirot naibu kolim naka ekonikejaanakinan ka ekekike, kitogogoŋ ijo ŋes ikar kere, kiswama kwape kilimokinia.

²⁶ Kitopolooroi ekonikiror ikar kere ebe, ‘EJAKAIT loka ajoresio ŋes Edeke loka Isirael’: iticasio ekek loka ekonikejaanakinan Daudi kakonyenekon.

²⁷ Naarai ijo, ‘wu EJAKAIT loka ajoresio, Edeke loka Isirael, ipukokinit ekonikejaanakinan ebe, ‘Adukokini jo ekek’: kanuka ŋun etitiŋior ekonikejaanakinan kotauke ailip ailipasit na mama ijai.

²⁸ Wu EJAKAIT Edeke, irai ijo Edeke, akonikiro da eraas nukabeit, isumunik ekonikejaanakinan akirot ŋin naejok:

²⁹ Aso do kitoiok ijo aisirereŋ ekek loka ekonikejaanakinan, kiyatanakinenei kakonyenekon: naarai ijo, wu EJAKAIT Edeke, inera ŋun: kisireren ekek loka ekejaanakinanikon karereŋukon ikar kere.”