2 Samuel 16 - Ebaibuli

¹ Ketubor Daudi nediokasilon kokuju moru, koany, kiriamakinos Siba ekejaanakinan loka Mepiboset kaŋes, kopesikinitete asigiria aarei lupetan, kibwokite imugatin akwat aarei, ka aibuŋeta akwatat nuka imusabibun lueokito, ka akwatat nuka araito nuka aiporo, ka eriagi loka emukule loka ebino.

² Kotema ekabaka Siba atiar, “Inyoin bo apolou kaŋul? “Koboŋok Siba ebe, “Eraas asigiria nuibwanenete lukokal loka ekabaka; ka imugatin ka araito nuka aiporo luenyamete ikatumunak; ka ebino, loemasete luiiloro kamodiŋ.”

³ Kotema ekabaka atiar, “Ali bo okoku loka ejakaitikon?” Kotema Siba ekabaka atiar, “Koany, iboie ŋesi koYerusalem: naarai ebala ebe, ‘Kenyakakini lolo eoŋ ekek loka Isirael ajakanut naka papaka.’’’

⁴ Kosodi ekabaka atemar Siba atiar, “Koany, kere luejaas ka Mepiboset eraas lukon.” Kotema Siba atiar, “Wu okwe! Eyalama kadumununei asianut kakonyenekon, ekajakait, wu ekabaka.”

⁵ Kedol ekabaka Daudi Bakurim, koany, kolom kanen etuŋanan loka ekek loka etogo loka Saul, ekekiror Simei, okoku loka Gera: kolom ŋesi, kilami ŋes elomuni.

⁶ Kibiribir ŋesi Daudi kamor, ka ikejaanakinak kere luka ekabaka Daudi; kojaas da ituŋa kere ka ikiliok lukagogoŋ kakanike nakoteten ka nakokediany.

⁷ Kiner Simei kwana ilami ebe, “Irwa, irwa, ijo etuŋanan loka aokot, etuŋanan da loka Belial:

⁸ Enyaku EJAKAIT mamakon aokot kere nuka ekek loka Saul loirumi ijo aiboisike: ejaik EJAKAIT ajakanut akan naka Abisalom okokukon: ido koany, ilokok ijo kameŋeranutukon, naarai irai ijo etuŋanan loka aokot.”

⁹ Kosodi Abisai okoku loka Seruia atemar ekabaka atiar, “Kanukinyo ilamia ekiŋok lo lokatwan ekajakait ekabaka? Kisiikinai katubor, keŋaiŋair, kajepa akouke.”

¹⁰ Kotema ekabaka atiar, “Inyoin bo kimariai eoŋ kayes, yes odwe luka Seruia? Naarai elami, ido naarai abu EJAKAIT kolimok ŋes ebe, ‘Kilam Daudi’; Iŋai bo do etemari ebe, ‘Kanukinyo kiswamaa ijo kwaŋin?’”

¹¹ Kotema Daudi Abisai ka ikekejaanakinak kere atiar, “Koany, emoi okokuka loalomuni kakuanaka akaijar: mam kereka epedori Ebenyamit lo adepar? Kinyeis ŋes, kisiikis ŋes eilam; naarai ecoraki EJAKAIT ŋes.

¹² Motoko kosesen EJAKAIT aronis nakeswamakinitai eoŋ, ido katacakini EJAKAIT eoŋ ajokis itia eilamane lo loka lolo.”

¹³ Kosodokis Daudi ka iketuŋa alosit: kitor Simei moru kitiirianikina kaŋes, kilami elosi, kibiribiriei ŋes kamor, kituanakini apua.

¹⁴ Kopotu ekabaka ka ituŋa kere luajaas kaŋes epasito; kikwar kaŋina.

¹⁵ Kobu Abisalom, ka ituŋa kere ikiliok luka Isirael Yerusalem, ka Akitopel da kaŋes.

¹⁶ Kosodi kanen, kedol Kusai Earikit opapero loka Daudi mama ejai Abisalom, kotema Kusai Abisalom atiar, “Kidar Edeke ekabaka, kidar Edeke ekabaka.”

¹⁷ Kotema Abisalom Kusai atiar, “Erai na asianutukon mama ejai opaperokon? Kanukinyo mam jo iuparotor kopaperokon?”

¹⁸ Kotema Kusai Abisalom atiar, “Mam; konye loaseu EJAKAIT ka ituŋa lu, ka ikiliok kere luka Isirael, araun eoŋ lokeŋ, eboie eoŋ kaŋes,

¹⁹ Bobo da, tikejaanak eoŋ iŋai? Mam kereka tikejaanak kakonyen nuka okokuke? Kwape kejaanakinia kakonyen nuka papakon, kwaŋin ajaenena kakonyenekon.”

²⁰ Kosodi Abisalom atemar Akitopel atiar, “Kolim cani nuiwomit ijo, kekwaikis ai?”

²¹ Kotema Akitopel Abisalom atiar, “Koloma mama ejaas abusian nuka papakon, nuetasali ŋesi aidar etogo; eirari Isirael kere ebe kila papakon jo: kosodete egogoŋioros akanin nuka ŋul kere luejaas kajo.”

²² Kosodete kopesikis Abisalom ewema kuju togo; koloma Abisalom mama ejaas abusian nuka papake kakonyen nuka Isirael kere.

²³ Kosubito aomisio nuka Akitopel nualimununei ŋesi kapaarasia kanun bala naenisia ituŋanan akirot mama ejai Edeke: ekonenenete nen aomisio kere nuka Akitopel mama ejai Daudi ka Abisalom da.