2 Samuel 15 - Ebaibuli

¹ Kosodi kanen kokau kaŋun, kitemonok Abisalom agali ka ibalasin, ka ituŋa akaisakany akerit kiŋarenike.

² Kodilonokini Abisalom anyoun, kobwoenenei kawai naka erute: kosodi do arai ejai etuŋanan nuewosai nutikibusakinit ayaŋaar mama ejai ekabaka atubokinio, iworouni Abisalom ŋes, kotema atiar, “Lokore kali bo ijo?” Kotema atiar, “Erai ekejaanakinanikon loka adiopet katekerin nuka Isirael.”

³ Kotema Abisalom ŋes atiar, “Koany, ejok akonikiro edolitos da; konye emamei etuŋanan loadakaki ekabaka akiirar jo.”

⁴ Bobo da kotema Abisalom atiar, “Arai karai eoŋ ekatubon kakwap, tetere ebuni ŋolituŋanan loewosai arai loejai akirot mamakaŋ, tiatubokini ŋes kotenan!”

⁵ Kosodi arai kikunyaki ituŋanan aisuded kakonyeneke, korio ŋesi akanike, kikam ŋes, konu.

⁶ Kiswamak Abisalom kwaŋin luka Isirael kere luaponenenete mama ejai ekabaka atubokinio: kwaŋin kiŋala Abisalom itauon luka ituŋa luka Isirael.

⁷ Kosodi ketuboros ikar akaisaoŋon, kotema Abisalom ekabaka atiar, “Keŋaiŋait, kisiikinai kalot aitae aiyapositika naeyapoikinit EJAKAIT, koKeburon.

⁸ Naarai kiyapo ekejaanakinanikon aiyaposit naajaar Gesur koSuria ebe, ‘Arai keenyaka EJAKAIT eoŋ bobo Yerusalem, kasodi aijaanakin EJAKAIT.’’’

⁹ Kotema ekabaka ŋes atiar, “Kolot inapakina.” Konyou ŋesi, kolot Keburon,

¹⁰ Konye kijuka Abisalom ikarotak anatar atekerin kere nuka Isirael ebe, “Naiirariata eporoto loka arupepe, itemarete ebe, ‘Abisalom ŋes ekabaka koKeburon.’’’

¹¹ Koloto ituŋa akwat aarei nepepe ka Abisalom anyoun koYerusalem, luanyaritai, lualosete kitenara itauonokec; komam ejenete idiobore.

¹² Naainakinia Abisalom asuban, abu konyarau Akitopel Egilonit, ekapetan akiro nuka Daudi, anyoun koreke, ŋes Gilo. Kogogoŋ aitemokinet nakaiyeiyea; naarai kiyatanakinos ituŋa duc mama ejai Abisalom,

¹³ Kobu ekiyakia mama ejai Daudi, kobala ebe, “Atupasi itauon luka ituŋa luka Isirael Abisalom.”

¹⁴ Kotema Daudi ikejaanakinakake kere luajaas kaŋes koYerusalem atiar, “Konyoutu, kakera; arai mam kikeri emamei idiopet kaoni yenekui kaneejai Abisalom: kisunyito alosit, kinyek adolokin oni atipet, kayaun aronis, ka aidany lukore kakwanis naka ekileŋ.”

¹⁵ Kotemasi ikejaanakinak luka ekabaka atiar, “Koany, itemonokino ikonikejaanakinak aswam kere nueseuni ejakaitika ekabaka.”

¹⁶ Koloma ekabaka, kotupito lukokaleke kere. Kinyek ekabaka aŋor atomon nuaraas abusian aidar etogo.

¹⁷ Koloma ekabaka, kotupito ituŋa kere; kobwout koBet-merak,

¹⁸ Kotubonoros ikekejaanakinak kere kamakeŋ; Ikeretin kere, Ipeletin kere, ka Igitin kere, ituŋa akwat akanykape luatupito ŋes anyoun koGat, apotu kesi kotubonoros kakonyen nuka ekabaka.

¹⁹ Kosodi ekabaka atemar Itai Egitit atiar, “Inyo bo kiupar ijo kasio? Koboŋo, kiboioto kekabaka: naarai irai ijo emoit, ido loitwobositai; kobono aiboisikon,

²⁰ Naarai napebian ibuni ijo, tikesirimi lolo jo kasio, naarai alosi neapedori? Koboŋo ijo, kinyaka da ikoniinacan; kojaenena aitim ka abeit kajo,”

²¹ Koboŋok Itai ekabaka atiar, “Kwape ejaria EJAKAIT, kwape ejaria da ekajakait ekabaka, abeit kaibois neejai ekajakait ekabaka, arai kanuka atwanare arai kanuka aijar, nepenen da ejaenena ekonikejaanakinan.”

²² Kotema Daudi Itai atiar, “Kolot, kotubor.’ Kotubor Itai Bgitit, ka ituŋake kere, ka ludidik kere luajaas kaŋes,

²³ Komonya lukakwap kere keporoto kaloepol, kotubonoros ituŋa kere: kotubor ekabaka da kaguurut Kiduron, kotuboros ituŋa kere, kobeata erot loka amodiŋ.

²⁴ Ido koany, kobu Abiatar, kobu Sadok da, ka Ilebin kere, edakito asaduku naka aitutuket naka Edeke; kosipokis asaduku naka Edeke kwap, aitodol neadaunotor ituŋa kere alomun kore,

²⁵ Kotema ekabaka Sadok atiar, “Kinyaka asaduku naka Edeke ore: arai kadum asianut kakonye nuka EJAKAIT, kenyakuni ŋesi eoŋ bobo, ketodikini ŋesi eoŋ asaduku ka aiboisike da.

²⁶ Konye arai kiner ŋesi kwanata ebe, ‘Mam eoŋ kesiyalamikinit jo’; koany, eoŋ lo, keswamak ŋesi eoŋ kwape itojokitor.”

²⁷ Kotema da ekabaka Sadok esasedoti atiar, “Mere jo ekadwaran? Koboŋo ore inapakina, ijo ka Abiatar, ka odwekus iarei kayes, Akimaas okokukon, ka Yonatan okoku loka Abiatar.

²⁸ Koany, edareuni kaneedokarere amodiŋ, aitodol naijukunia ijo aitejenun eoŋ akiro.”

²⁹ Aso kodakasi bobo Sadok ka Abiatar asaduku naka Edeke kinyakasi Yerusalem: kiboioto kaŋina.

³⁰ Kodoka Daudi kaneedokanarere moru loka Iseitun, komonyi edoki; kimukite akouke, kolot komam enapit amuk; ituŋa kere da luajaas kaŋes kimukite ŋinituŋanan akouke, kodokasi, komonyete edokete.

³¹ Kolimokinai Daudi ebe, “Ejai Akitopel toma iketemonokinok lukaiyeiyea ka Abisalom.” Kotema Daudi atiar, “Wu EJAKAIT, keŋaiŋait, kibelok ainerun naka Akitopel araun abaŋaanut.”

³² Kosodi kanen, kedol Daudi kuju moru neemaenenere Edeke, koany, kobu Kusai Earikit airiamakin kaŋes, kocili! ekootike, kojaas alup akouke.

³³ Kotema Daudi ŋes atiar, “Arai kiupa keoŋ, iraun ijo lokilaŋirikini eoŋ:

³⁴ Konye arai kiboŋo ijo ore, ilimokini Abisalom ebe, ‘Araun eoŋ ekonikejaanakinan, wu ekabaka; kwape kolo karaar ekejaanakinan loka papakon, kwana da araun ekonikejaanakinan’: ŋes konyet itapalaunia ainerun naka Akitopel kanukaŋ.

³⁵ Mam kereka ijaas kaSadok ka Abiatar isasedotin kaŋina? Aso do, akiro kere nuipupuni kotogo loka ekabaka ilimokini Sadok ka Abiatar isasedotin.

³⁶ Koany, ejaas kes ŋina kodwekec iarei, Akimaas okoku loka Sadok, ka Yonatan okoku loka Abiatar; iyakuunete kes kakiro kere nuipupunete.”

³⁷ Aso koloma Kusai opapero loka Daudi ore; koloma Abisalom da Yerusalem.