2 Ikorinton 3 - Ebaibuli

¹ Kigeuni kereka aiturokina bobo? Arai bo kwape kicetuŋa kipuda tope ibaluan luka aiturit mamakus, arai kamakus?

² Iraas yesi ebaluakosi, iwadikatai otauonokus, ejena esiomete da ituŋa kere.

³ Itakanete ebe iraas yesi ebalua loka Kristo, lokijaanakini isio, iwadikatai mere kebuino dimarai kEmoyo loka Edeke lokajaran, mere amor, dimarai otauon luka awat.

⁴ Kimunokina Edeke kwaŋin kanuka Kristo,

⁵ Mam sio kilosikino aomit bonik araut ibore kanukosi; kwabo ebuni aisilosikiniokosi kama ka Edeke,

⁶ lokisilosikini sio araut ikejaanakinak luka aitutuket nakitetet, mere luka enyukuta, dimarai luka Emoyo; naarai eari enyukuta, konye Emoyo einakini aijar.

⁷ Aso arai aijaanakin naka atwanare naigirigiritai kinyukutan kamoru, abu kobu kaibuses, tetere mam idwe luka Isirael apedorete asesen akonyen nuka Musa kanuka aibuses naka akonyeneke, aibuses ŋin naitapalaunio,

⁸ mam kereka aijaanakin naka Emoyo itelekarit kaibuses?

⁹ Naarai arai kejai aijaanakin naka atubokinio kaibuses, itelekarit noi aijaanakin naka adolit ajaun kaibuses.

¹⁰ Naarai naitubusikinitai mam kitubusikinitai kakirot kana, kanuka aibuses naedepari noi noi.

¹¹ Naarai arai naitapalaunio kejai kaibuses, itelekarit noi naesalenenei ajaun kaibuses.

¹² Aso kija kamun naetia nen kitwasamai atitiŋ;, naepol,

¹³ kwabo mere kwape Musa loemukorit akekonyen, kinyeis idwe luka Isirael asesen awasia naka naitapalaunio.

¹⁴ Konye kitininikitai ikecetauon. Naarai kiton lolo naesiomenenere aitutuket namojoŋ eriŋa esalit aimukoret ŋipeŋin mam epukoritai; naarai toma Kristo itapalaunitai,

¹⁵ Konye kiton lolo naesiomenenere nuka Musa epesikina aimukoret otauonokec;

¹⁶ konye naibelonokinor tuŋanan mama ejai Ejakait, elemario aimukoret,

¹⁷ Konye erai Ejakait Emoyo, ido neejai Emoyo loka Ejakait, nepenen da ejaikin aosikinio.

¹⁸ Konye oni kere kiseseni aibuses naka Ejakait kwape toma aroet, kakonyen numam imukoritai, kiloconokinio aputor ŋes, anyoun kaibuses kiton aibuses, naarai epote ŋun kama ka Ejakait, loerai Emoyo.