2 Ikorinton 12 - Ebaibuli

¹ Kebusakinit aolobob, karaida mam eyauni ajokis; konye adolokini aitegelikineta nuka emoyo, ka apukoreta nuka Ejakait,

² Ajeni etuŋanan kotoma Kristo, atuboros kwana ikar itomon kaluoŋon,—arai kejai toma akuan, arai kejai kiŋa kakuan, mam ajeni, ejeni Edeke, kowuruporoi loikoni nen kiton akuj nakiwuniet,

³ Ido ajeni etuŋanan loikoni nen-arai kotoma akuan, arai komamei akuan, mam ajeni, ejeŋi Edeke,–

⁴ ebe kowuruporoi kiton Paradais, kiira akiro numam inerunos, numam ibus etuŋanan einer.

⁵ Aoloboboi kanuka loikoni nen, kwabo mam aoloboboi kanukaŋ, dimarai nuka akalanyanurukaŋ.

⁶ Naarai arai kakoto aolobob, timam arai lobaŋ, naarai enera abeit. Konye etikokina, kinyek ituŋanan aomit kamakaŋ nuedeparito nueseseni ka nuiirari kamakaŋ,

⁷ Ido kenyek aiturokina kanuka apukoreta nuidilas noi, aponi kainakin ekukwai kotoma akuan, ekiyakia loka Satan, tetere kebuŋai, kenyek aiturokina adepar.

⁸ Abu keŋaiŋa Ejakait irwan auni kanuka ibore kaŋin, tetere elemario kamakaŋ.

⁹ Konye abu katema eoŋ atiar, “Akasianut kidaunit jo, naarai itodolitoi akapedor kotoma akalanyanut.” Aso aoloboboi kaiyalama naepol kanuka akalanyanutukaŋ, tetere karapari apedor naka Kristo.

¹⁰ Ŋes esiyalamikinitor akalanyanut, aikonakinio nukepali, ailwaritoi, areio, ka aridakinio da, kanuka Kristo; naarai naakalanyanar, nepenen agogoŋoror,

¹¹ Abu karau ebaŋ! Yes kitiŋaikinito. Naarai yes tiibusakinit aiturit eoŋ. Naarai mam eoŋ eŋoŋara kadiokirot nakejaatar ikiyakia lukapolok noi, karaida mam arai ibore.

¹² Abeit aponi kiswamai aanyuneta nuka ekiyakia kokidiŋikus, kotoma aŋirikin kere, kanuka aanyuneta, ka nukaumokin ka nukapedor.

¹³ Naarai inyo kereka ibore yeniŋoŋara kamakus itia ikanisan ice, dimarai mam eoŋ abu kalaŋirik yes? Kitimoi eoŋ aibucaret ŋin!

¹⁴ Koany na ŋes irwan nakiwuniet naakapakina abunore mamakus. Ido mam kalaŋirikinete, naarai mam amoot iborokus, dimarai yes; naarai mam tiibusakinit idwe aiŋadanakin kanuka ikauriakakec, dimarai ikauriak kanuka idwekec.

¹⁵ Konye akori ido kakorakinio kaiyalama naepol kanuka aijarakus. Arai kamina yes aitelekarit, eŋoŋar kereka eoŋ aminunio?

¹⁶ Konye kikona nen, mam kalaŋirikinit yes, konye karai loepiriana, abu kalok yes kaimod.

¹⁷ Abu kereka kadum ameda kamakus kotoma edio kaŋul lukeiukakinit yes?

¹⁸ Abu kecor Tito, kejuk da onac ŋol nenipe kaŋes, Abu kereka Tito kodum ameda kamakus? Mam kereka kilosenenei kOmoyo ediopet? Mam kereka kitupit ikukut ŋupeŋul?

¹⁹ Iwomitos kereka apak na kere ebe kiiyari bonik kamakus? Kakonyen nuka Edeke kinera isio toma Kristo. Konye luminan, eraas kere adukio yes.

²⁰ Naarai acoikina ebe motoko abuni kadum yes ijaas kwape mam akotor, yes da kidumunete eoŋ ajai kwape mam ikototor; kinyeis ipegeta ajaut, ka ekokote, ka anyunyura, ka aŋolopa, ka esiomit, ka aideideonokin, ka adakunun, ka iceleta da.

²¹ Kinyek Ekadeke aitisil eoŋ kakonyenekus, naabunio bobo, kakuudian luipu luadiakasi sek, komam itoronikinos kanuka amamus ailakec, ka adoteu, ka abenyanut, naapotu kiswamata.