2 Ikabakan 4 - Ebaibuli

¹ Kiworo aceberu kanor nuka odwe luka inabin mama ejai Elisa, kotema atiar, “Atwana ekonikejaanakinan okilenika: ijeni ijo da ebe abu eke jaanakinanikon koyonite EJAKAIT: abu lokapesen ayaŋaar ikadwe iarei araun ibulesinike.”

² Kotema Elisa ŋes atiar, “Anyoika keswamakini jo? Kolimokinai; inyo bo ejai kajo togo?” Kotema atiar, “Emamei akonikejaanakinan ibore kotogo, dimarai amot naka akinyet.”

³ Kosodi ŋesi atemar atiar, “Kolot, kilipu ikoniidunyeta kere lukirimorito amoti, amoti nuemameete iboro kotoma; sirikilipu nuikidioko.

⁴ Ilomari, igolor ijo ka ikonidwe, kobukonok akinyet amoti ŋun kere; kinadanari nuilelebunos awai.”

⁵ Konyou ŋin kama ejai ŋesi, kogolor ŋes ka odweke iarei; koinununut ŋes amoti, kobukonokini.

⁶ Kosodi kanen, kilelebunos amoti, kotema nin okokuke atiar, “Koinunai aeemot.” Kotema ŋes atiar, “Emamei bobo amot.” Kosanak akinyet,

⁷ Kosodi nin abunore alimokin etuŋanan loka Edeke. Koboŋok ŋesi atiar, “Kolot, kogwela akinyet, kotac apesenekon, ido luideunos kojariata ijo ka ikonidwe.”

⁸ Kosodi apaaran adiopet, kitor Elisa Sunem, nekejai aberu nakapolon; kimaima ŋes ainyam atap. Kosodi kanen, naetorenenoo, kopaanari nen ainyam atap.

⁹ Kotema nin okilenike atiar, “Koany, amisiik eoŋ lo erai etuŋanan lokalaunan loka Edeke, loitorenenei ne tiritir.

¹⁰ Kenainait, kadukokis ŋes igola karwatat; kebwaikis nen kanuke eitada, ka emesa, ka eicoloŋ, ka epir loka atala: tetere naebunenenoo ŋesi mamawok, kopauni nen.”

¹¹ Kosodi apaaran adiopet, kobu ŋesi nen, kopau agola koper nen.

¹² Kotema ŋesi Gekasi ekejaanakinanike atiar, “Konyarau Asunamit ŋin.” Kosodi kenyaraun, kobwo kakonyeneke.

¹³ Kotema ŋes atiar, “Kolimok nin ebe, Koany, kibuak ijo sic kaibuakin naetia netine; inyo bo do kiswamakinio jo? Ikoto aitodiario mama ejai ekabaka arai bo mama ejai ekapolon loka ajore?” Koboŋok nin ebe, “Eboie eoŋ korunaka.”

¹⁴ Kotema atiar, “Aso inyo bo do kiswamakinio ŋes?” Koboŋok Gekasi ebe, “Abeit emamei ŋes ikoku yenitelepat, emojonit da okilenike.”

¹⁵ Kotema atiar, “Konyarau ŋes.” Konyarau, kobwo ŋin kokek.

¹⁶ Kotema ŋesi atiar, “Kapak kana, kedol ekaru, ituni ikoku yenitelepat.” Kotema nin ŋes atiar, “Mam, ekajakait, ijo etuŋanan loka Edeke, sirikinal akonikejaanakinan.”

¹⁷ Kopotuu aberu, kouri ikoku yenitelepat kapak kaŋin kedol ekaru, kwape alimokinia Elisa ŋes.

¹⁸ Kosodi kepoloor ikoku, adiopepaaran, kolot mama ejai papake mama ejaas ikadwenyak.

¹⁹ Kotema ŋesi papake atiar, “Akouka, akouka.” Kotema ekejaanakinanike atiar, “Kodaka ŋes mama ejai totoke.”

²⁰ Keyaŋaa, kitodol mama ejai totoke, kiboikin akuninike aitodol kidin paaran, kotwana.

²¹ Kodoka nin, kiperik oitada loka etuŋanan loka Edeke, kogolok ekek, koloma kina,

²² Kiworo okilenike kotema atiar, “‘Keŋaiŋait, kijukakinai ediopet kokejaanakinak, ka adiopet kasigirian, kakeria mama ejai erunanan loka Edeke, kabonu.”

²³ Kotema atiar, “Kanukinyo ikotor alosit neejai ŋesi lolo? Mam erai ailamun naka elap karaida nakasabato.” Kotema ŋin atiar, “Ŋul ajokak.”

²⁴ Kosodi nin aipet lupetan asigiriake, kotema ekeiaanakinanike atiar, “Kireŋea, kiyatak alosit; sirikiyap aibwanen, dimarai kaalimok jo.”

²⁵ Kolot do, kodol mama ejai etuŋanan loka Edeke omoru Karamel. Kosodi kanen, keany etunansn loka Edeke ŋes elwana, kotema Gekasi ekeiaanakinanike ebe, “Koany, ejai Asunamit ŋina:

²⁶ Keŋainait, koker airiamakin kaŋes, kinit ŋes atiar, Ŋai ejok? Okilenikon da ejok? Ikoku da ejokr “Koboŋok ŋin atiar, “Ejokuka.”

²⁷ Kedolo ŋesi mama ejai etuŋanan loka Edeke koukot, kitiŋ akeieke. Kikunyak Gekasi aremor ŋes; konye kotema etuŋanan loka Edeke atiar, “Kinyek: naarai ekadakinit eketau; kemunonikinit EJAKAIT, mam kalimokinit eoŋ.”

²⁸ Kosodi nin atemar atiar, “Abu eoŋ kakoto ikoku yenitelepat kama ejai ekaiakait? Mam abu katema atiar, Sirikiinala?”

²⁹ Kosodi ŋesi atemar Gekasi atiar, “Koen aŋabetekon, kitiŋ ebelaka akanikon, kolot: arai kiriamunos kitunanan kere, sirikiyoga ŋes; arai kiiyoga ituŋanan, sirikiboŋok: kibwaik ekabela akonyen nuka ikoku.”

³⁰ Kobala toto naka ikoku ebe, “Kwape eiaria EJAKAIT, kwape eiaria ekonitau da, mam kajali jo.” Konyou ŋesi, kotupa nin.

³¹ Kotubor Gekasi kinarenikec, kibwaik ebela akonyen nuka ikoku; konye amamei eporoto karaida apupun, Kanuka ŋun kobono airiamakin kaŋes, kolimok ebe, “Mam ikoku ekwenyunit.”

³² Keloma Elisa togo, koany, atwana ikoku, kiperikinirete oitadake,

³³ Koloma do kogoloros kes iarei, kilip EJAKAIT.

³⁴ Kolot, koper ebuburia kakuan naka ikoku, kibwaik akeituk aituk naka ikoku, akonyeke da akonyeke, akaninike da akaninike: koriori kama ejai ikoku; komwanu akuan naka ikoku,

³⁵ Kosodi ŋesi aboŋor, koriaria kotoma togo; kodoka koriori kama ejai ikoku: kikaresio ikoku irwan akanykaarei, kokweny ikoku,

³⁶ Konyarau Gekasi, kotema atiar, “Konyarau Asunamit ŋin,” Konyarau ŋes, Keloma nin mamake, kotema atiar, “Kodaka ikonikoku.”

³⁷ Kosodi ŋin alomun, kisudede kakeieneke, kokukum kwap; kodak okokuke, koloma,

³⁸ Kobu Elisa bobo Giligal: koiai ebeli akwap; kibolkinos odwe luka inabin kakonyeneke: kotema ŋesi ekekejaanakinan atiar, “Kidoroki akeit, kipoik odwe luka inabin atap.”

³⁹ Koloma ediopet omanikor aide edia, kodum emusabibu loka ais, koden imonyono luka ais kotunite kogoe, kobu kogetanak kes toma akeit naka atap: naarai mam ajenete kes.

⁴⁰ Kodutakinai rtuna ainyam. Kosodi kanert, enyamete, kiworoto ebe, “Wu okwe, etuŋanan loka Edeke, ejai atwanare toma akeit ŋin,” Mam apotu kopedosi ainyam.

⁴¹ Konye kotema ŋesi atiar, “Koyautu akiria.” Kocakak akeit; kotema atiar, “Kodutakisi ituŋa, konyama.” Kemamei bobo aronis kotoma akeit.

⁴² Kobu etuŋanan ebuni koBaal-salisa, koinu etuŋanan loka Edeke inyamat luegeete, imugatin akaisaarei luka asairi, ka aluŋuren nukitetiak nuka akima kopukoke, Kotema atiar, “Koinak ituŋa, konyama.”

⁴³ Kotema ekeiaanakinanike atiar, “Okwe! ebwaikini lu akonyen nuka ituŋa akwatat?” Konye kotema atiar, “Koirtak ituŋa konyama; naarai inera EJAKAIT kwanata ebe, Enyamete, kideut.”

⁴⁴ Kibwaik akonyenekec, konyamata kideutu, kwape ajaar akirot naka EJAKAIT.