2 Ikabakan 3 - Ebaibuli

¹ Kogeu Yekoram okoku loka Akab airum Isirael koSamaria kokaru lokitomonet kakanykauni loka Yekosapat ekabaka loka Yuda, kirumak ikar itomon ka luarei.

² Kiswama nueroko kakonyen nuka EJAKAIT; konye komam aputokin nuka papake ka totoke: naarai abu kolema epir loka Baal loabu papake kiswama,

³ Konye kiketakin karonisio nuka Yeroboam okoku loka Nebat, nuetidiakaria Isirael; mam abu konyou kakesi.

⁴ Kerai Mesa ekabaka loka Moab ekeeokon loka amerekekin; kijaanakin eka baka loka Isirael ajulo nuka idwe luka imerekekin ilukumin akwatat, ka nuka imerekekin ilukumin akwatat.

⁵ Kosodi kanen ketwana Akab, kipaliik do ekabaka loka Moab ekabaka loka Isirael.

⁶ Koloma ekabaka Yekoram koSamaria kapakio kanun, kimar Isirael kere,

⁷ Kolot kiyakia mama ejai Yekosapat ekabaka loka Yuda ebe, “Kepaliiki ekabaka loka Moab; kiupari ijo keoŋ aitiji Moab?” Kotema atiar, “Alosi: arai eoŋ kwape iraar ijo, ikatuŋa kwape ikonituŋa, ka ikabalasin da kwape ikonibalasin.”

⁸ Kotema atiar, “Kitoro orot ali? “Koboŋok ebe, “Orot lokamodin naka Edom.”

⁹ Kosodi kolot ekabaka loka Isirael, ka ekabaka loka Yuda, ka ekabaka loka Edom: kirimosi alosit naka apaarasia akanykaarei: komamikis ajore akip, karaida itian luketupito kes.

¹⁰ Kotema ekabaka loka Isirael atiar, “Wu okwe! Naarai anyarau Ejakait ikabakan lu luuni aijaikin kes akan naka Moab.”

¹¹ Konye kotema Yekosapat atiar, “Emamei kereka kane enabi loka EJAKAIT, ainitunia EJAKAIT?” Koboŋok ediopet loka ikejaanakinak luka ekabaka loka Isirael cbe, “Ejai Elisa okoku loka Sapat kane, loalianakini akipi akanin nuka Eliya.”

¹² Kotema Yekosapat atiar, “Ejai akirot naka EJAKAIT kaŋes.” Kolot ekabaka loka Isirael ka Yekosapat ka ekabaka loka Edom mama ejai,

¹³ Kotema Elisa ekabaka loka Isirael atiar, “Kimariai eoŋ inyo kajo? Kolot ijo mama ejaas inabin luka papakon, ka inabin luka totokon.” Kotema ekabaka loka Isirael ŋes atiar, “Mam; naarai anyarau EJAKAIT ikabakan lu luuni aijaikin kes akan naka Moab.”

¹⁴ Kotema Elisa atiar, “Kwape ejaria EJAKAIT loka ajoresio, loabwoi eoŋ kakonyeneke, abeit, arai kemam apodo Yekosapat ekabaka loka Yuda ajaut kane, timam kaanolia jo, timam ketei da.

¹⁵ Aso do koinunai ekaraman.” Kosodi kanen, kerama ekaraman, kodoik ŋes apedor naka EJAKAIT.

¹⁶ Kotema atiar, “Inera EJAKAIT kwanata ebe,, Kilelebata alelesia aditot na.’

¹⁷ Naarai inera EJAKAIT kwanata ebe, ‘Mam ianyunete ekwam karaida akiru, konye ilelebunos akip aditot; imasete yesi da, yes, ka ibarenekus, ka itianikus.’

¹⁸ Konye erai na akirot naedit kakonyen nuka EJAKAIT: ijaikini da ŋesi Imoabin akaninikus,

¹⁹ Idanyete luka ŋolire loebwaitai, ka nolire Ioititatai, ijepete nolikitoi loejok, inukete atanin kere nuka akipi, imunaarete kamor ŋinimana naejok.”

²⁰ Kosodi kanen, tupuruc, kapak naka ainakin ainakinet, koany, kopotu akipi elomunito korot loka Edom, kilelebun akwap akipi.

²¹ Kepuputu Imoabin kere ebe apotu ikabakan aitiji kes, kotukonokinos, kere luepedorete ainap lujiis ka adepar, kobwaata koikor.

²² Konyoutu tupuruc sek, kocaik akoloŋ akipi, koanyutu Imoabin akipi kajuwaikee erenak bala aokot.

²³ Kotemasi atiar, “Nu kes aokot; abeit amudiaros ikabakan, adanyakinos, ŋinitunanan aar aupake: aso do, Moab, kanata.”

²⁴ Kedoloto oidukurun luka Isirael, konyoutu Isiraelin kodanyata Imoabin, kokerata kakonyenekee: kiyatakinos alosit akwap edanyete Imoabin.

²⁵ Kotiyatiyata ireria; kocakanakis nolinujanan akemoru ninimana naejok, kilelebun; konukata atanin kere nuka akipi, kojepata ikito kere lukajokak; aitodol needeuniata amor nuko Kir-kareset ban; konye kirimirimoto lukaporoceta, atiyatiya.

²⁶ Keanyu ekabaka loka Moab ebe ipikorit ejie ŋes, koyaŋa ituŋa akwat akanykaarei lukedakito ikileŋa kaŋes, acilar mama ejai ekabaka loka Edom: konye mam apotu kopedosi.

²⁷ Kosodi alemun okokuke ekiyai lotikirum aiboisike, koinak ŋes araun ainakinet naicweio karwatat, Kojaun anyunyura naepol mama ejai Isirael: konyout kamaken, kobonosi akwapukee.