1 Yoana 2 - Ebaibuli

¹ Ikadwe ludidik, kewadikakini yes nu kinyeis adiakar. Arai kediaka ituŋanan ejai oni Ekapuron neejai Papa, Yesu Kristo ekadoliton.

² Erai ŋesi alucet naka adiakanaretawok, kwabo mere kanuwok bonik, konye kanuka akwapin kere da.

³ Kana da ŋes kijenunia ebe kijeni ŋes, arai kiricit aicorakinetake.

⁴ Yeninera ebe, “Ajeni ŋes,” komam ericit aicorakinetake erai ikeŋalan, emamei da abeit kotomakeŋ.

⁵ Konye ŋin yenericit akekirot abeit apoloo amin naka Edeke kotomakeŋ. Kana ŋes kijenunia ebe kija tomakeŋ.

⁶ Ŋin yeninera ebe esalenenei tomakeŋ, iburao ŋin alosenen kwape alosenenoo ŋesi.

⁷ Luminan, mam kewadikakini yes aicorakinet nakitetet, dimarai aicorakinet namojoŋ naidumut ameun kageunet; aicorakinet namojoŋ ŋes akirot naipotu kopuput.

⁸ Kewadikakini yes bobo aicorakinet nakitetet, naerai nakabeit tomakeŋ, tomakus da, naarai edaun amuton, ecai da kwana aica nakabeit.

⁹ Yeninera ebe ejai toma aica, kolaite da onaceke, ejai toma amuton kiton kwana.

¹⁰ Yenemina onaceke esalit toma aica, emamei da aiguikinet kotomakeŋ,

¹¹ Konye yenelai onaceke ejai toma amuton, elosenenei da kotoma amuton, komam ejeŋi neelosi, naarai etumudak amuton akekonye,

¹² Kewadikakini yes, idwe ludidik, naarai esionii yes adiakanaretakus, kanuka ekekiror.

¹³ Kewadikakini yes, lukapapa, naarai ijenete ŋol loejai ameun kageunet. Kewadikakini yes, ikatumunak, naarai ipikos lokaronon. Kewadikakini yes, idwe, naarai ijenete Papa.

¹⁴ Kewadikakini yes, lukapapa, naarai ijenete ŋol Ioejai ameun kageunet. Kewadikakini yes, ikatumunak, naarai igogoŋ, esalit da akirot naka Edeke tomakus, ipikos da lokaronon.

¹⁵ Siriminas akwapin, karaida iboro luejaas toma akwapin. Arai emina ituŋanan akwapin, emamei amin naka Papa kotomakeŋ,

¹⁶ Naarai ibore kere yenejai toma akwapin, aiŋobel naka akuan, aiŋobel naka akonye, ka eitur da loka aijar kana, mam elomunete kaneejai Papa, dimarai elomunete kakwapin.

¹⁷ Edaunos da akwapin, ka aiŋobelekec; konye yeniswamai nuekot Edeke esalenenei kiton ikar kere,

¹⁸ Idwe, adolu esawa lokawasia, ido kwape ipotu kopupunioto ebe ebuni lokasurup loka Kristo, adolut kwana lukasurup luipu luka Kristo; ŋes kijenunia ebe adolu esawa lokawasia.

¹⁹ Apotu konyout kamawok, konye mam keraas luwok; naarai arai keraas luwok, tikesalata kaoni, konye konyout tetere itakanunio ebe mam keraas kere luwok.

²⁰ Konye yes abu Lokalaunan kinyonyoik akinyet, ido ijenete kere.

²¹ Mam kewadikakini yes naarai mam ijenete abeit, konye naarai ijenete ŋin, ido naarai emamei aiŋal kere naelomuni kotoma abeit.

²² Iŋai bo erai ikeŋalan dimarai yeneŋeri ebe Yesu mere Kristo? Lo ŋes lokasurup loka Kristo, loeneri Papa ka Okoku da.

²³ Ŋin kere yeneŋeri Okoku, emamei ŋin Papa. Ŋin yenelimori Okoku ejai ŋes Papa da.

²⁴ Kosal tomakus naipuput ameun kageunet. Arai kesal tomakus naipuput ameun kageunet, isalete da toma Okoku ido toma Papa,

²⁵ Na ŋes aisumunet naisumunit ŋesi oni, aijar naka ikar kere.

²⁶ Kewadikakini yes nu nuka ŋul lukitapaarete.

²⁷ Yes da, esalit tomakus ainyonyoikinio akinyet naidumut kamakeŋ, komam ipudasi ituŋanan aisisianakin yes; konye kwape kisisianakinia yes ainyonyoikinike akinyet akiro kere, erai da nakabeit, kwabo mam erai aiŋal, ido kwape kisisianakinitor yes, kosalata tomakeŋ,

²⁸ Kwana da, idwe ludidik, kosalata tomakeŋ, tetere naetakanunia ŋesi kajaas katitiŋ, kinyeis ileic airum oni kakonyeneke naebunio ŋesi.

²⁹ Arai ijenete ebe edolit ŋesi, kojenut ebe ŋin kere yeniswamai nukadolit ŋes eurit,