1 Timoti 5 - Ebaibuli

¹ Sirikitoron ekimat, konye kicorenenei kwape papakon; ikatumunak kwape iinacan,

² amakio kwape nukatoto, akatumunak da kwape ainacan, kotoma asegara kere,

³ Koyoŋit apuserun nueraas apuserun cut.

⁴ Konye apuserut arai ejaas kidwe arai itatai, kisiaunete aisisia ayoŋit Edeke kokaliakec, ka atacakin ikauriakakec; naarai ecamunitai ŋin kakonyen nuka Edeke.

⁵ Konye ŋin naerai apuserut cut, kinyeinai bon, emunokina Edeke, kosalak aiŋaiŋa ka ailipenen akuare ka apaaran.

⁶ Konye ŋin naeminakinito aboliasio, etwanit karaida kejari.

⁷ Kicorak kes ŋun da, tetere eraas nuemamei aitoronet.

⁸ Konye ituŋanan kere arai mam idari lukeŋ, aitelekarit lukokaleke ilopet, aŋer ŋesi aiyuun, erono da adepar yenimam iyuunit.

⁹ Siriwadikao apuserut namam edolit ikar akaisakanykape, nakerai aberu naka ekiliokit ediopet;

¹⁰ itejenunitai kanuka aswamisio nuejok; arai esait idwe, arai abu kisukuny ipejok, kilot akeje nuka lukalaunak, iŋarakinit luiticanio, arai da edunyit atupit ŋiniswam kere naejok,

¹¹ Konye koŋer aiwadik apuserun nukatumunak; naarai naiyatakiniata aipaliikin Kristo, ekotosi adukokin;

¹² egwaunete akiro naarai enyeis aiyuunikec nasodit.

¹³ Bobo da isisiaunete araut nuebwalaka, kirimete otogoi; kwabo mere nuebwalaka bon, konye ibeeleaka ka nuiramaaka da, inerasi numam ibusakinito.

¹⁴ Aso akoto apuserun nukatumunak adukokin, kouriata idwe, koyaito ikalia, komam einakinete lokasurup apak naemoromoroo.

¹⁵ Naarai ejaas kwana ace nuapaasi atupar Satan.

¹⁶ Arai ejaas aberu naiyuunit apuserun, kiŋarak ŋin kes, kinyeinai alaŋirikin ekanisa, tetere iŋarakini nueraas apuserun cut,

¹⁷ Kimarakinai imakio lueyaito ejok araut luibusakinito ayoŋio irwan aarei, ido aitelekarit luitaaritos kotoma akirot ka aisisianakin da;

¹⁸ naarai ebala naiwadikatai ebe, “Sirikien aituk naka emoŋ loipudapudai aicom akima.” Ebe da, “Ekeswaman ibusakinit ekeropit.”

¹⁹ Sirikicam yeniwosai ekimat, dimarai kama ka ikajenak iarei arai iuni,

²⁰ Luediakanarete kitoron kakonyen nuka ituŋa kere, tetere luce da eyoŋete,

²¹ Kecorakinit kakonyen nuka Edeke ka Kristo Yesu, ka imalaikan luseuna koricit ŋun komam isunyit aitub, sirikiswama akirot kere kotiakite ituŋa.

²² Sirisunyit aidokokin ituŋanan kere akanin, karaida aimor adiakanareta nuka ituŋa ice; kidarakina kosegara.

²³ Sirimasenenei bobo akipi bon, konye komat ediobino kanuka akoikikon, naarai idekanakin da irwan ipu.

²⁴ Ideleleete adiakanareta nuka icetuŋa, kiŋarenikinete kiton atubokinio; konye nuka ice ideleleunete kokau,

²⁵ Kwape kwaŋin da ideleleete aswamisio nuejok; karaida ŋun numam ideleleete, mam epedorete aibwaio.