1 Timoti 3 - Ebaibuli

¹ Namunot akirot na ebe: Arai eŋaŋat etuŋanan araun ekaanyanaran, imiela aswam naejok.

² Aso ibusakinit ekaanyanaran araun loemamei aitoronet, ekiliokit loka aberu adiopet, loitikokina, loecoit, loiyapaara, loisukunyikini ipejok, loejeni aisisianakin,

³ lomam emer, lomam ibuŋai; dimarai lokaiyapepera, lomam eŋolopana, lomam emin apesan;

⁴ loeyait ejok lukokaleke, loitononokikini ikedwe kaiyapaara kere;

⁵ naarai arai mam etuŋanan ejeŋi ayait lukokaleke, ikwaikini ai imukei ekanisa loka Edeke?

⁶ Mere ekeyuunan lokitetet, kinyek adakunun, ka aibirokin otube loka Satan.

⁷ Konye ibusakinit lukokiŋa aitejen nukajokak kamakeŋ, kinyek aibirokin amorosit, kotoma atacit da naka Satan.

⁸ Ikejaanakinak kwape kwaŋin kiyapaara, mere luideideok, mere luemasete ajon nuipu, mere luiŋobelete apesan,

⁹ luejai aiyeiyea naka aiyuun kotoma aomisio nuelaete.

¹⁰ Konye kisiautu ber ŋul da aitemio, kosodete konyet aijaanakin, arai eraas luemamei aitoronet,

¹¹ Aŋor da kwape kwaŋin kiyapaara, mere akasabak, nuitikokina, numunon kakiro kere.

¹² Koraut ikejaanakinak ikiliok luka adiopeberu, lueyaito ejok ikecedwe ka lukokaliakec.

¹³ Naarai luejaanakis ejok, edumakina adoket naejok, ka atitiŋ naepol kotoma aiyuun naejai toma Kristo Yesu.

¹⁴ Kewadikakini jo nu amuno abunore mamakon atipet,

¹⁵ konye arai etumori, tetere ijenuni kwape ibusakinitor ituŋa ajaut kotoma otogo loka Edeke, loerai ekanisa loka Edeke lokajaran, epir ka eigaŋet loka abeit.

¹⁶ Ido komamei abuonokin, epol noi aiyeiyea naka ayoŋit Edeke: Abu kitodiar kotoma akuan, Kitojokai kotoma Omoyo, Apotu imalaikan koanyut ŋes, Aponi kolimonokinai kotoma atekerin, Aponi kiyuunai kotoma akwapin, Kodakarai kuju toma aibuses.