1 Samuel 25 - Ebaibuli

¹ Kotwana Samuel; kotukokin Isirael kere, kibworoto ŋes, kidaikis ŋes Rama togoke. Konyou Daudi kolot amodiŋ naka Paran.

² Ajai etuŋanan Maon, loaiaas ikeboro Karamel; apol etuŋanan noi, ajaas ŋes amerekekin alukumin auni, ka akinei alukumit: atubi ajul nuka amerekekinike koKaramel.

³ Arai ekiror loka etuŋanan Nabal, ka ekiror loka aberuke Abigail: aeo aberu, etemelel da: konye kerai etuŋanan otaupe loeswamai nukaronok; arai lokotogo loka Kaleb.

⁴ Kopup Daudi kamodiŋ ebe atubi Nabal ajul nuka amerekekinike.

⁵ Kijuka Daudi ikatumunak itomon kotema Daudi ikatumunak atiar, “Koloto Karamel, mama ejai Nabal, kiyogata ŋes kokirorika:

⁶ Itemarete ŋes loekeriana kwanata atiar, ‘Kinapakin ijo, kinapakin da ekonitogo, kinapakinos da kere luijaatar.

⁷ Apup ebe ejaas jo ikatubok ajul: ikonikeeokok ajaunos kasio, mam apotu keswamakis kes aronis, amamei da ibore yenabu komameun apak kere naajaatar Karamel.

⁸ Kinit ikatumunakakon, kilimokinete jo; asa do kodumut ikatumunak asianut kakonyenekon; naarai kipou kapaaran kanaejok: keŋainait, koinak yenejai akanikon ibulesinikon ka okokukon Daudi.’’’

⁹ Kosodi kepotu ikatumunak luka Daudi, kolimokis Nabal kwape ajaatar akiro nun kere kokiror loka Daudi, kililiŋata.

¹⁰ Koboŋok Nabal ibulesin luka Daudi ebe, “Iŋai bo Daudi? Iŋai bo da okoku loka Yese? Ipu kwana ibulesin luesiete ŋinituŋanan kama ejai ekapolonike.

¹¹ Do kereka eoŋ alemun ikamugatin ka akakipi ka akakiriŋ naarakinit ikakatubok ajul ainakin ituŋa lumam ajeni nekeponiata?”

¹² Kibelokinos ikatumunak luka Daudi, kobonosi, kolimokis ŋes kwape ajaatar akiro ŋun kere.

¹³ Kotema Daudi iketuŋa atiar, “Konapata yesi ŋinituŋanan ekekileŋ.” Konapa kesi ninitunanan ekekileŋ; konap Daudi da ekekileŋ: kotupasi ituŋa akwat aoŋon Daudi: kopaikis akwat aarei oboro.

¹⁴ Konye abu ediopet kokatumunak kolimok Abigail aberu naka Nabal ebe, “Koany, abu Daudi kijuk ikiyakia kamodiŋ ayogan ejakaitikosi; kisiejanak kes.

¹⁵ Konye kikonakis ituŋa nul sio ejok, mam apotu kiswamakis sio aronis, amamei da ibore yenabu komameun, apak kere nakiboio kakes, nakijaar ais.

¹⁶ Araas kesi arwatat kamakosi kuare ka paaran da, apak kere nakijaar kakes kieokie amerekekin.

¹⁷ Aso do kojen, koomoom nuiswamai; naarai epeleikinitai aiswamakin ejakaitikosi aronis ka eketogo kere: naarai kanu eraar ŋesi otaupe, mam ituŋanan epedori einer kaŋes.”

¹⁸ Kosodi Abigail aisunyakin, kolem imugatin akwat aarei, ka iriagin iarei luka imukulen luka ebino, ka amerekekin akany nuepoitoi, ka aitemisio akany nuka imumwa luikawooritai, ka aibuneta akwatat nueokito nuka imusabibun, ka alunureta akwat aarei nuka itinin, kisibwok asigiria.

¹⁹ Kotema ikatumunakake atiar, “Kiŋarenikinoi; koany, katupuni yes.” Konye mam abu kolimok okilenike Nabal.

²⁰ Napeibwaneni ŋesi akesigiria, kijesar neiteriboria eronat, ido koany, kijesunos Daudi da ka iketuŋa kiriamunos kakes.

²¹ Abu Daudi kobala ebe, “Abeit abu kedar atitai kere luaiaatar etikesa lo amodiŋ, komam yenabu komameun koboro kere luajaatar: katacaki ŋesi eoŋ aronis itia ajokis.

²² Kiswamak kwaŋin Edeke lukasurup luka Daudi, adepar da, arai kenyek idiokoku yenisapat kotoma luejaatar kere moi eniuni akoloŋ.”

²³ Kosodi keanyu Abigail Daudi, kisunyak adokun kasigiriake, kibiror ebuburia kakonyen nuka Daudi, kokukum.

²⁴ Kibirokin akejeke kotema atiar, “Kabeikis eoŋ, ekajakait, kabeikis eoŋ numam adolit: kenainait, kisiik akonibulesit kiner kakiikon, kopup ijo akiro nuka akonibulesit.

²⁵ Kenainait, kinyek ekajakait apodokin otaupe ŋol, ŋes Nabal: naarai kwape ejaar ekekiror, ikoni ŋesi da nepenen: Nabal ŋes ekekiror, ebanaana ŋesi: konye mam eoŋ akonibulesit abu kaany ikatumunak luka ejakaitika, luibu kijuk.

²⁶ Aso do ekajakait, kwape ejaria EJAKAIT, kwape eiaria da ekonitau, naarai abu EJAKAIT kitikok jo agwaun akirot naka aokot, ainyaŋ kakonikan, asa kiswamata lukasurupokon, ka luemoatar ejakaitika aronis bala Naba!’

²⁷ Aso ca ainakinet na naayau abulesitikon ekajakait koinakinai ikatumunak luetupitos ekajakait.

²⁸ Kenaiŋait, kisioni aibucaret naka abulesitikon: naarai abeit iticasi EJAKAIT ekek loka ekajakait, naarai ejio ekaiakait ijiisio luka EJAKAIT; mam aronis edumakinio mamakon apaarasiakon kere.

²⁹ Karaida kenyou etuŋanan aidap jo, amoot aijarakon, konye eenikinitai aiiar naka ejakaitika arita naka ikajarak kibuakite EJAKAIT Ekonideke; eporocari aijar naka lukasurupokon, bala ejai toma aporocet.

³⁰ Kosodi kanen naiswamakinia EJAKAIT ejakaitika kwape ejaatar nukajokak kere nuener mamakon, nakiseunia da ijo araun ekepolon loka Isirael;

³¹ Mam na kitakadikini jo, mam eraun aitiguikinet nakotau loka ejakaitika, ebe ibuko aokot komam akirot, arai ebe enyana ekajakait kanuken: naikonakinia EJAKAIT ekajakait ejok, ŋes do iitunio akonibulesit.”

³² Kotema Daudi Abigail atiar, “Kituritete EJAKAIT, Edeke loka Isirael, lokijukuni jo lolo airiamun keoŋ:

³³ Kituritete da akonicoa, kituritete jo da, naitikok eoŋ agwaun akirot naka aokot, ka ainyaŋ kanukan kakakan.

³⁴ Naarai abeit, kwape ejaria EJAKAIT, Edeke loka Isirael, loketikoki eoŋ aiswamakin jo aronis, kedim ijo aiwonyun airiamun keoŋ, abeit timam kideikin Nabal idiokoku yenisapat tupuruc eniuni akoloŋ.”

³⁵ Kwaŋin kiiau Daudi kakekan luainunit ŋes: kotema ŋes atiar, “Kolot togokon kainapakin; koany, apupok ekoniporoto, acam da akonikiro.”

³⁶ Kobu Abigail neejai Nabal; ido koany, epoit epucit kotogoke, bala epueit loka ekabaka; kiyalama etau loka Nabal, naarai amera noi: kanuka ŋun mam abu kolimok ŋes adiokirot kere, aitodol neaniunia akoloŋ tupuruc.

³⁷ Kosodi kanen tupuruc, kikua emeret loka Nabal, kolimok aberuke ŋes akiro nun, kipirisiar etauke kotomake, koluor bala amoru.

³⁸ Kosodi kanen, ketuboros apaarasia kwape atomon, kinom EJAKAIT Nabal, kotwana.

³⁹ Nakepupunia Daudi ebe atwana Nabal, kobala ebe, “Kituritete EJAKAIT, loapuroki akirot naka amorositika kakan naka Nabal, loereboo ekebulesit karonis: enyakaki EJAKAIT nukaronok nuka Nabal akouke.” Kijuka Daudi ikesinerak Abigail, ayaŋaar ŋes mamake aimany.

⁴⁰ Kosodete kepotu ibulesin luka Daudi Karamel neejai Abigail, kobalas ŋes ebe, “Kijukunit Daudi sio neijai ijo, ayaŋaar jo mamake aimany.”

⁴¹ Konyou, kokukum, kobala ebe, “Koany, abulesitikon erai abulesit nailosenenei akeje nuka ibulesin luka ekajakait.”

⁴² Kisunyak Abigail, konyou, kibwanen asigina, kakepesur akany nuatupitos ŋes; kotupa ikiyakia luka Daudi, koraun akeberu.

⁴³ Komany Daudi Akinoam naka Yesereel; koraunos kere nuarei akenor,

⁴⁴ Abu Saul kokorakinite Mikal akokuke, aberu naka Daudi, Paliti okoku loka Lais, loarai loka Galim.