1 Samuel 23 - Ebaibuli

¹ Kolimokinai Daudi ebe, “Koany, ejios Ipilisitian kaKeila, enasetc lukopejalin.”

² Kanuka nun kinit Daudi EJAKAIT ebe, “Alosi eoŋ aidany Ipilisitian lu?” Kotema EJAKAIT Daudi atiar, “Kolot, kodany Ipilisitian, kitajar Keila.”

³ Kotemasi ituŋa luka Daudi ŋes atiar, “Koany, kikuriakar isio kane koYuda: mere do kikuriakar isio noi adepar kiilot Keila aitiii ajoresio nuka Ipilisitian?”

⁴ Kosodi Daudi aiŋit bobo EJAKAIT, Koboŋok EJAKAIT ŋes ebe, “Konyou, kolot Keila; naarai eiaikini Ipilisitian akanikon.”

⁵ Kolot Daudi ka iketuŋa Keila, kitijioto Ipilisitian, konotut ibarenekee, koarata kes kearit kaloepol noi. Kitajar kwaŋin Daudi luiboienenete koKeila.

⁶ Kosodi kanen, naakeria Abiatar okoku loka Akimelek Keila mama ejai Daudi, abu koyana epod kakanike,

⁷ Kolimokinai Saul ebe abu Daudi Keila. Kotema Saul atiar, “Kejaiki Edeke ŋes akanika; naarai agolor, kanu alomaria ore loeiaas ikirigin ka atiketa.”

⁸ Koram Saul ituŋa kere alosit oiie, alosit Keila, alukun Daudi ka iketuŋa.

⁹ Kojen Daudi ebe edonitor Saul ŋes emod; kotema Abiatar esasedoti atiar, “Koyau epod ne.”

¹⁰ Kosodi Daudi atemar atiar, “Wu EJAKAIT, Edeke loka Isirael, apupu ekonibulesit ebe ekot Saul abunore Keila, amudiar ere kanukan.

¹¹ Kejaikinete ituŋa luka Keila eoŋ akanike? Ebuni kereka Saul kwape apupunio ekonibulesit? Wu EJAKAIT, Edeke loka Isirael, kenainait, kolimok ekonibulesit.” Kotema EJAKAIT atiar, “Ebuni.”

¹² Kosodi Daudi atemar atiar, “Kejaikinete kereka ituŋa luka Keila eoŋ akan naka Saul?” Kotema EJAKAIT atiar, “Kijaikinete,”

¹³ Kosodete Daudi ka iketuŋa luemwaasi kwape akwat akanykape anyoun koKeila, kolototo kirimoto. Kolimokinai Saul ebe aku Daudi koKeila; mam abu kolot.

¹⁴ Kiboikin Daudi amodiŋ abuai nuegogon, kosalak akwap nakiukon kamodiŋ naka Sip. Komoenenei Saul ŋes ninipaaran, konye mam Edeke abu kijaik ŋes akanike.

¹⁵ Koany Daudi cbe alom Saul amoot aijarake: ajai Daudi amodiŋ naka Sip amonieik,

¹⁶ Konyou Yonatan okoku loka Saul, kolot amonieik mama ejai Daudi, kitogogon akekan kotoma Edeke,

¹⁷ Kotema ŋes atiar, “Sirikikurianar: naarai mam akan naka Saul papaka kidumuni ijo; ido iraun ijo ekabaka loeyait Isirael, katupakini eoŋ jo kapolou; ido ejeŋi Saul papaka ŋun.”

¹⁸ Kitutukoto kesi iarei kakonyen nuka EJAKAIT: kiboikin Daudi amonieik, kolot Yonatan togoke,

¹⁹ Kosodete Isipin alosit Gibea mama ejai Saul ebe, “Mam kereka Daudi enopit kobukosi kabuai nuegogon kotoma amonieik, koukot loka Kakila, loejai ari naka eŋalakimak naka amodiŋ?

²⁰ Aso do, kobia, wu ekabaka, kwape imielar ekonitau kere alosit: ka sio da, kijaikini ŋes akan naka ekabaka.”

²¹ Kotema Saul atiar, “Kisirereŋ EJAKAIT yes: naarai kitimoto eoŋ,

²² Kenainait, koloto, kitogogoŋoto, kojenut koanyut da aiboisike naejai akeiuke, ka yeneanyunit ŋes kaŋina: naarai kalimokinitai ebe epiriana ŋesi noi.

²³ Aso do koanyut, kojenut aiboisio nueperununo ka nueŋopenena, kopotu bobo aitogogoŋ mama ajai, kiupari do kayes: kosodi kanen arai ejai toma akwap, amouni ŋes kolukumin kere luka Yuda.”

²⁴ Konyout, kinarenikinito Saul alosit Sip. Konye ajaas Daudi ka iketuŋa amodiŋ naka Maon, kotoma Araba kari naka eŋalakimak naka amodiŋ.

²⁵ Kolot Saul ka iketuŋa amoot ŋes, Kolimokinai Daudi: ŋes do abunio neejai atiiba, kiboikin amodiŋ naka Maon. Kepupu Saul ŋun, kotupa Daudi amodiŋ naka Maon,

²⁶ Kolot Saul owai ediopet loka eronat, Daudi da ka iketuŋa owai ece: kisunya Daudi alosit naarai akuriana Saul; naarai apotu Saul ka iketuŋa kolukunito Daudi ka iketuŋa aikamun kes,

²⁷ Konye kobu ekiyakia mama ejai Saul, kobala ebe, “Kisunyite abunore; naarai iioreete Ipilisitian akwap.”

²⁸ Kwaŋin koboŋo Saul katupit Daudi, kolot aitiji Ipilisitian: kanuka nun apotu komaikis aibois nin Sela-Kamalekot.

²⁹ Konyou Daudi kanen, kiboikin abuai nuagogoŋ nuka En-gedi.