1 Samuel 17 - Ebaibuli

¹ Kotukonokis Ipilisitian ajorekee ejie, kotukokinos Soko, naka Yuda, kidukuroto kidin Soko ka Aseka, toma Epes-damim,

² Kotukokinos Saul ka ituŋa luka Isirael, kidukuroto apuuton naka Ela, kiderakinos ejie ka Ipilisitian.

³ Kobwaata Ipilisitian komoru epuai, kobwaata luka Isirael da komoru kepuai: koiai aditot kidinikec,

⁴ Kolom ekadedenan koswamin luka Ipilisitian, ekekiror Goliat, loka Gas, aoiauke ikubitin ikanykape ka atutubet naka ekubit,

⁵ Konapite aboko naka aisinit kakouke, konapite da ekooti loka aisinit; alaŋir naka ekooti isekelin ilukumin ikany luka aisinit.

⁶ Konapite da kakeje aisinit, ka eliru loka aisinit kopur.

⁷ Koputos amorok naka akwarake bala akitoi naesonyere; ka akwarake da alopet alaŋir kitemi isekelin akwat akanykape luka asuat: kinarenenokini ŋol lokitinenenei ekebuku.

⁸ Kobwo kiworo mama ejai ajore naka Isirael, kobala ebe, “Kanukinyo ilomuniata aiderakin? Mere eoŋ Epilisitiat, yes da ibulesin luka Saul? Koseutu ekes kanukus, kikokoroun neajai,

⁹ Arai kepedo ejie keoŋ, kaar, asa kiluor isio ikusibulesin; konye keteleka eoŋ ŋes, kaar, asa iluoros yesi ibulesinikosi, kijaanakinete sio.”

¹⁰ Kiner Epilisitiat ebe, “Emua lolo ajore naka Isirael; ae ekes, kaiioto.”

¹¹ Kiira Saul ka luka Isirael kere akiro ŋun nuka Epilisitiat, kiyalononoto, kokuriakaros noi.

¹² Kerai Daudi okoku loka Epurasit ŋol loka Bet-lekem-Yuda, lokerai ekekiror Yese; kejaas odweke ikanykauni: komoionite da etuŋanan ŋol kapaarasia nuka Saul, kokokosanite kotuna.

¹³ Ketuparito odwe luka Yese lukapolok iuni Saul oiie: ikiroria da luka odweke luuni lukelositos oiie kes luta, ekiyai ŋes Eliab, loketupi da ŋes Abinadab, ka lokiwuniet ŋes Sama,

¹⁴ Daudi ŋes eŋoorit: ketuparito lukapolok iuni Saul.

¹⁵ Ido kobononori Daudi kama ejai Saul acok amerekekin nuka papake Bet-lekem.

¹⁶ Kikunyununei Epilisitiat tupuruc ka eboŋ, kitodianar apaarasia akaisaoŋon.

¹⁷ Kolimok Yese okokuke Daudi che, “Koina bo ikoniinacan epa loka imomwa luikawooritai, ka imugatin lu itomon, kisunya ayaŋaar oidukurun mama ejaas ikoniinaean:

¹⁸ Koina ekapolon loka elukumitikee ikamonon itomon lueokito luka akile, koany kwape ejaatar ikoniinaean, kijau aititiŋetekec.”

¹⁹ Ido Saul, ka kes, ka ituŋa kere luka Isirael, kojaas aditor naka Ela, ejiosi ka Ipilisitian.

²⁰ Konyou Daudi tupuruc sek, kinyeinia ekejokon amerekekin, kitin iboro, kolot kwape kieorakinia Yese; kodol aibois naka agalin, napedakun ajore ejie, kokutas ikodeta ejie.

²¹ Kiderakinos Isirael ka Ipilisitian, kotereikinos ajore ka ajore.

²² Kinyek Daudi ikeboro kakan naka ekedaran iboro, kodinirir mama ejai aiore, kolot kiyoga ikeinaean.

²³ Napiyalaete kakes, koany, kodakun etikadedenan ie, Epilisitiat loka Gas, ekekiror Goliat, konyou kokokoron luka Ipilisitian, kinera kwape kejaatar akiro kwa: kiira Daudi.

²⁴ Kosodete ituŋa kere luka Isirael, keanyut ekesa ie, kokerata kokuriakaros noi.

²⁵ Kobalas ituŋa luka Isiracl ebe, “Ianyut etuŋanan ŋol loadoku? Abeit adorit Isirael ŋes adokunia: asa arai kear ituŋanan ŋes, itabari ekabaka kabar naepol, einakini da akokuke, ido ituluori ekek loka papake loka aijamam kotoma Isirael.”

²⁶ Kosodi kinera Daudi kituna luedunyatar ebwoete atiar, “Ikonakinio ai ituŋanaa yeneari Epilisitiat lo, kolema amorosit kotoma Isirael? Naarai ŋes iŋai Epilisitiat lo lomam ekepitai, adorit ajore naka Edeke lokajaran?”

²⁷ Kobonokis ituŋa kobalas ebe, “Ikonakinio nen ituŋanan yeneari ŋes.”

²⁸ Kiira Eliab onaeeke lokapolon kwape enerar kituna; kinep anyunyura naka Eliab aluikin Daudi, kobala ebe, “Kanukinyo ibunio ijo da? Ido iŋai inyeinia amerekekin kwa adis kais? Ajeni akoniwononut, ka epali lokotaukon, naarai ibunit aanyun ejie.”

²⁹ Kobala Daudi ebe, “Ekonak bo eoŋ ai kwana? Mam akirot?”

³⁰ Kinyek ŋes kibelokin mama ejai ece, kinera akiro kwape kakwa; kobonokis bobo ŋes ituŋa kwape kebononokinioto nusodit.

³¹ Kiirar akiro nukinera Daudi, kitejenunai Saul; konyaraarai ŋes.

³² Kotema Daudi Saul atiar, “Kinyek etau loka irunanan aiurunun kanuken; elosi ekonibulesit ejie kEpilisitiat ŋol.”

³³ Kotema Saul Daudi atiar, “Mam ipedori airiamakin kEpilisitiat ŋol ejie kaŋes; naarai irai ijo isapat, konye ŋol ekajiot ameun keitelepaneke.”

³⁴ Kotema Daudi Saul atiar, “Ecokienenei ekonibulesit amerekekin nuka papake; nakebunenenoo eŋatuny, arai edubu, koyana imerekek yenikosipan.

³⁵ Kalomanari, katupari, kenomi kademuni kaitukuke; keebwokokin, ketini kopenekike, kenom, kaari.

³⁶ Abu ekonibulesit kinom eŋatuny ka edubu kere: ikonakini nen Epilisitiat ŋol lomam ekepep bala ediopet kakesi, naarai edorit aiore naka Edeke lokajaran.”

³⁷ Kotema Daudi atiar, “EJAKAIT loabu ketajar kabelekeka nuka eŋatuny, ka abelekeka nuka edubu, ketajari da kakan naka Epilisitiat kanol.” Kotema Saul Daudi atiar, “Kolot, ejauni Edeke kajo.”

³⁸ Kitanap Saul Daudi inapeneke, kidokok aboko naka aisinit akouke, kitanap ekooti loka aisinit.

³⁹ Koenik Daudi ekekileŋ anapitoke; kitetemo alosit; naarai mam anaikinit, Kotema Daudi Saul atiar, “Mam apedori alosit kalu; naarai mam lem anaikinit.” Kolaca Daudi kes.

⁴⁰ Kitin ekebela kakanike, koseu alica akany nuerurut kosamai, kibwaik oriagike lokicokis lokejaatar, toma ocoeke; kojai da akeporocet akanike; kikunyak Epilisitiat.

⁴¹ Kobunok Epilisitiat koapik Daudi; kinarenikinit etuŋanan loetinenenei ekebuku.

⁴² Kenolenol Epilisitiat, koany Daudi, komen; naarai kerai isapat, ikarenan, ido itemel.

⁴³ Kotema Epilisitiat Daudi atiar, “Arai kereka eoŋ ekiŋok, ibuni neajai kibelai?” Kilam Epilisitiat Daudi kama ejaas idekesioke,

⁴⁴ Kotema Epilisitiat Daudi atiar, “Bia neajai, kakorak akonikuan akweny nuka apak, ka itiaij luka ais.”

⁴⁵ Kotema Daudi Epilisitiat atiar, “Ibuni ijo neajai kekilen, ka eliru, ka akwara; konye eoŋ abunit mama ijai kokiror loka EJAKAIT loka ajoresio, Edeke loka ajoresio nuka Isirael nuidorit.

⁴⁶ Kikorakini lolo EJAKAIT akanika; kenomi jo, ajepari da akonikou; ido akorakini lolo akweny nuka apak, ka itian luka amagoro, atesin nuka ajore naka Ipilisitian; kojenut akwapin kere ebe ejai Edeke toma Isirael:

⁴⁷ Kojen teni atukot na kere ebe mam EJAKAIT itajari kekilen ka akwara; naarai ejie erai loka EJAKAIT, ŋes da kikorakini yes akanikosi.”

⁴⁸ Kosodi kanen, kenyou Epilisitiat, kobu kikunyak airiamakin kaDaudi, kisunya Daudi, kodinirir neejai aiore airiamakin kEpilisitiat.

⁴⁹ Kirupa Daudi akan oriagike, kolem alicait, kiiliil, koporocik, kocam Epilisitiat oreeteke; koloma alicait oreeteke, kibiror ebuburia,

⁵⁰ Kipiko Daudi kwaŋin Epilisitiat kaporoeet ka alicait, kocam Epilisitiat, koar; konye komamei ekileŋ kakan naka Daudi.

⁵¹ Kosodi konemesiar Daudi, kieak Epilisitiat, kitin ekekileŋ, kout kakuraruke, koar, kojep akekou. Keanyut Ipilisitian ebe atwana ekadedenanikec, kokerata.

⁵² Konyout ituŋa luka Isirael ka luka Yuda, ibwoŋas, korukoriata Ipilisitian aitodol neidolio Gat, korutei luka Ekuron. Kibironokinos Ipilisitian lukimusuŋitai orot loebei Saarim, kiton Gat, ka Ekuron.

⁵³ Kobonut idwe luka Isirael karukitor Ipilisitian, konatata iidukurunukee.

⁵⁴ Kolem Daudi akou naka Epilisitiat koyau Yerusalem; konye kinadak lujiisike owemake.

⁵⁵ Keanyu Saul Daudi elosi asurokin Epilisitiat, kotema Abiner ekapolon loka aiore atiar, “Abiner, okoku lokanai esapat ŋol?” Kobala Abiner ebe, “Kwape ejaria ekonitau, wu ekabaka, mam ajeni.”

⁵⁶ Kotema ekabaka atiar, “Kinit iŋai bo papa loka esapat kaŋol.”

⁵⁷ Napebonuni Daudi kaiar Epilisitiat, koyana Abiner ŋes, koyana mama ejai Saul kitinite akou naka Epilisitiat,

⁵⁸ Kotema Saul ŋes atiar, “Iŋai bo papakon, ijo esapat?” Koboŋok Daudi atiar, “Arai eoŋ okoku loka ebulesitikon Yese Ebetelekemit.”