1 Samuel 1 - Ebaibuli

¹ Kosodi kojai etuŋanan loka Ramataim-sopim loka akwap nakiukon naka Epuraim, ekekiror Elukana okoku loka Yerokam, okoku loka Eliku, okoku loka Toku, okoku loka Sup, Epuraimut.

² Kojaas ŋes aŋor aarei; adiopet ekekiror Kana, naee da ekekiror Penina: ajaas Penina idwe, konyc amameete Kana idwe,

³ Kosodi konyounenei etuŋanan ŋol koreke ŋolikaru, kolosenenei aima ka ainakin asuban mama ejai EJAKAIT loka ajoresio kotoma Silo, Kojaas ŋina odwe iarei luka Eli, Kopuni ka Pinekas, isasedotin luka EJAKAIT.

⁴ Kosodi kedol apaaran nakeinakinia Elukana asuban, koinanak akeberu Penina, ka ikedwe kere lusap ka lupesur, akorakineta;

⁵ Konye koinak Kana akorakineta aarei: naarai kemina ŋesi Kana, konye kegolit EJAKAIT akeliliget.

⁶ Konye kitunyunyurik noi akainike ŋes, kisiyalonono da, naarai kegolit EJAKAIT akeliliget.

⁷ Kiswamaenenei kwaŋin nolikaru, nakeloseneneo togo loka EJAKAIT, kitunyunyuranakini ya kwaŋin: tape emonyi akiyo, kogir ainyam.

⁸ Kobala okilenike Elukana ŋes ebe, “Kana, inyo bo imonyi ijo? Inyo bo kitukurwo ainyam? Inyo da itururwoo ekonitau? Mam kereka eoŋ etelekarit idwe itomon kaiokis kamakon?”

⁹ Kosodi konyou Kana kedaut ainyam koSilo, kedaut da aimat. Kiboie Eli esasedoti koicoloŋoke kokek loka eyekalu loka EJAKAIT.

¹⁰ Koriebi ŋin eketau, kilip EJAKAIT, komony noi akiyo.

¹¹ Kiyapoik aiyaposit, kobala ebe, “Wu EJAKAIT loka ajoresio, abeit arai kisesen iean luka akonibulesit, kiitunite eoŋ komam kimurwokini akonibulesit, konye kiinak akonibulesit ikoku yenisapat, asa ainakini EJAKAIT ŋes apaarasia kere nuka aijarake, kwabo mam eiutet icaki akonke.”

¹² Kosodi kanen, nakiyatakinia ailip kakonyen nuka EJAKAIT, kosesen Eli akeituk,

¹³ Naarai eneranakin Kana kotauke; akeituk bon kesubanakin, konye komam epupo eporoto; tape eomit Eli ebe emer.

¹⁴ Kobala Eli ŋes ebe, “Itodoli wori ameranakin? Kosac ebino ŋol.”

¹⁵ Koboŋok Kana kobala ebe, “Mam, ejakait, arai eoŋ aberu naitururwei etau; mam amasit ebino karaida nuitemercte, konye abolorit ekatau akonyen nuka EJAKAIT.

¹⁶ Sirikiinyara akonibulesit akoku naka Belial; naarai roma airurumaka naelitokina ido toma anyunyurikinika ŋes enerar kiton kwana.”

¹⁷ Koboŋok Eli ebe, “Kolot kainapakina; ido koinak Edeke loka Isirael ŋun nuilip ŋes.”

¹⁸ Kinera atiar, “Kodum akonibulesit arereŋ kakonyenekon.” Kosodi kolot aberu, konyam, komam bobo imujurur.

¹⁹ Kosodete konyout tupuruc sek, komaata EJAKAIT, kobonosi, kodolo togokee Rama; kojen Elukana aberuke Kana; kiitu EJAKAIT ŋes.

²⁰ Kosodi kanen, kedolo apaarasia, kopotuu Kana, kidou ikoku; komaik ekekiror Samuel, naarai elipuni kama ejai EJAKAIT.

²¹ Kosodi kolot ekes Elukana, ka ekekike kere, ainakin asuban mama ejai EJAKAIT nuka nolikaru, ka aiyapositike,

²² Konye mam Kana abu kolot; naarai kobala ŋesi okilenike ebe, “Mam eoŋ alosi aitodol naejakaria ikoku, kasodi konyet ayaŋaar aitodiar akonyen nuka EJAKAIT, kiboienenei kaŋina apaarasia kere.”

²³ Kobala Elukana okilenike ebe, “Kiswama nuitojokit ijo; kopaik aitodol naejakaria ikoku; konye kitogogon EJAKAIT akekiro.” Kosodi kosalak aberu nen kitanak ikoku, aitodol nekitajakaaria.

²⁴ Kosodi kedau aitajakaar, koyana kouparos kaŋes, kojaas kimonin iuni, ka epa ediopet loka akiria, ka etuo loka ebino, koyaŋa togo loka EJAKAIT Silo; koroko ikoku edit,

²⁵ Koarata emoŋ, koinut Eli ikoku.

²⁶ Kobala ebe, “Wu ekajakait, kwape ejaria ekonitau, ekajakait, eoŋ aberu naabu kabwoi kama ijai, elipi EJAKAIT.

²⁷ Yen ŋes ikoku yenabu kelip; ido abu EJAKAIT kainak nuelipit ŋes,

²⁸ Ŋes ainakinia mama ejai EJAKAIT; eroko eiari einakinitai EJAKAIT.” Komaata EJAKAIT kaŋina.