1 Petero 5 - Ebaibuli

¹ Aso eoŋ loarai ekimat aupakus ka ekajenan da loka aisiriebio naka Kristo, ekamoran da loka aibuses naekoto apukorio, ecori imakio kotomakus:

² kicokienenete esipan loka Edeke lokotomakus, mere kanuka aitiŋaikinio, dimarai kanuka alosikinit, mere kanuka ameda nakileic, dimarai koipud,

³ mere kwape lueyaito kagogoŋ nukibeito, konye koraut aanyuneta nuka esipan.

⁴ Kosodi naetakanunia Ekecokon lokapolon, idumunete aboko nakaibuses namam erinyori.

⁵ Yes da ikatumunak kwape kwaŋin, kononokikis imakio. Konapito yesi kere aitasonikino bonik ka bonik, naarai “itepegi Edeke luiwoŋoko, konye einakini luitasonos asianut.”

⁶ Aso kitasonikinos kokwap kakan nailerit naka Edeke, tetere kitopoloori yes kedol apak.

⁷ Kowoikis ŋes aiyalononokus kere, naarai epod ŋesi yes.

⁸ Kinyeis amer, kokwenyenenete. Lokasurupikus Satan irimirimi kwape eŋatuny loegat, emoot yenenyamari.

⁹ Kitepegata ŋes, kicasito kaiyuun, kojenete ebe itodolitoi aisiriebio ŋipeŋin koinacanakus luejaas akwapin.

¹⁰ Konye Edeke lokasianut kere, lokinyarakinit yes aibusesuke naka ikar kere toma Kristo, kidaut aisiriebio apak naedit, kitetemikini yes, kiticat, ka aitogogoŋ da.

¹¹ Kojai ayait mamakeŋ ikar ka ikar. Amen.

¹² Kejukakinit yes ebalua lo kakan naka Siluano, loaomit eoŋ araut onace lomunot, kewadikakinit kakiro nuikidioko, kecor ka aitejenikin noi ebe ŋin ŋes asianut obe naka Edeke, kobwaata yesi kotomakeŋ.

¹³ Kiyogai yes ŋin naejai Babulon, naseuna aupakus, ka Marako da okokuka.

¹⁴ Kiyoganakinos kainu nakamin. Ainapakin kojai mamakus kere luijaas toma Kristo.