1 Petero 2 - Ebaibuli

¹ Aso kolemasi awai aronis kere, ka aimod kere, ka aisoswanut, ka ekokote, ka esiomit da kere.

² Kwape imukerun lupeurio kwape kwana kimielas akile nukemoyo nuemamei aimod, tetere kitopoloete yes adolore aitajario;

³ arai ipotu kiirata ajokis naka Ejakait.

⁴ Ipote mamakeg, amoru naejari, naanerete ituŋa, konye kama ejai Edeke erai naseuna, naketiai loepol;

⁵ ka yes da kwape amor nukajarak kidukio koraut etogo lokemoyo, esasedotene lokalaunan, ainanakin asuban nukemoyo, nuitojokit Edeke kanuka Yesu Kristo.

⁶ Naarai ejai toma nuiwadikatai ebe: “Koany, apesikini eoŋ koSion amoru nakapolon naka agor, Naseuna, naketiai loepol, Ido yeniyuuni ŋes mam irumete ileic.”

⁷ Aso mamakus luiyuunito erai ŋesi loketiai loepol; konye mamakec lumam iyuunito, “Amoru naanerete ikadukok, Araun nakapolon naka agor.”

⁸ Bobo da, “Amoru naitiguikinet, ka atiiba nakebiroron”; iguikinos akiro naarai mam erimarito, kwape elosikinitere kes.

⁹ Konye yes iraas ajena naseuna, esasedotene loka ekabakane, ateker nakalaunan, ituŋa obe luka Edeke, kosodete alimonokin nukajokak nuka ŋol lokinyarauni yes anyoun kamuton alomar toma aicake nakaumokin.

¹⁰ Mam kolo iraas ituŋake, konye kwana iraas ituŋa luka Edeke; mam kolo kitimitoi, konye kwana idumut aitimio.

¹¹ Luminan, keŋaiŋait yes kwape ikalotok ka ikeboiororok, ainacenen aiŋobel naka akuan, naejio kaijar.

¹² Kojaas kiponesio luejok kotoma Omo, tetere nakisiomiata yes bala ikeswamak nueroko, kitopoloosi Edeke kapaaran naka aanyanario kanuka aswamisiokus nuejokuka.

¹³ Kononokikis ŋiniicorakinet naka ituŋa kanuka Ejakait, arai erai naka ekabaka naarai ŋes itelekarit kere;

¹⁴ arai naka ikayaitok, luijukuni ŋesi aitican luiswamaete nueroko, ka aiturit da ŋul luiswamaete nuejok,

¹⁵ Naarai nuekoto Edeke kes nuta, yes aswam nuejok tetere itubutarete abaŋaanut naka ituŋa lueolito,

¹⁶ Luijakakaete, kwabo mere luitwasamaete aijakak ŋin bala araparet aronis; konye bala ibulesin luka Edeke.

¹⁷ Kitopoloorito ituŋa kere. Kominas iinacan. Koyoŋito Edeke, Kitopoloorito ekabaka,

¹⁸ Yes ibulesin, kononokikis ikusijaka kayoŋite kere, mere lukajokak bonik ka luiyapeperas, konye ka lukadedeŋak da.

¹⁹ Naarai na ŋes itojokitai, ituŋanan aŋirikin ican kanuka aiitun Edeke, isiriebio komameete akiro.

²⁰ Naarai aiturio anyoin, arai kidiakasi, kibapanar ititiŋikinete? Konye arai kiswamata nuejok, kisiriebi, ititiŋikinete, itojokitai ŋun, kama ejai Edeke.

²¹ Naarai aponi konyarakin ŋin, naarai Kristo da aponi kisiriebai kanukus, kinyekinia yes naanyunet tetere ituparete ikukutuke,

²² Mam ŋes abu kodiaka, karaida aimod adumun kaitukuke.

²³ Naamoromoroere ŋes, mam abu kinyaŋa aimor; naesiriebere, mam abu kitukurian; konye abu kijaikin mama ejai ŋol loetubokini kadolit.

²⁴ Abu ŋesi elopet kibwok adiakanaretawok kakuanake kokitoi, tetere nakidaunia atwanare kama ejaas adiakanareta, kajarata mama ejai adolit. Imacarinike kes kitaŋaleunete yes.

²⁵ Naarai ipotu kopaarito kwape amerekekin, konye kwana iboŋut mama ejai Ekecokon Ekaanyanaran da loka aijarakus.