1 Ikorinton 2 - Ebaibuli

¹ Eoŋ da, iinacan, naabunio mamakus, mam abunit alimonokin yes nukaiyeiyea nuka Edeke kakiro nuejijim karaida kacoa.

² Naarai abu kenerunite ainyein ajenun adiokirot kokidiŋikus, dimarai Yesu Kristo loebubukinitoi.

³ Eoŋ da naajaar mamakus, akalanyana, kakurian ka amaran naepol;

⁴ akakirot ka akalimonokin da mam keraas akiro nukacoa nuijodoete, dimarai nuitodiarito Emoyo ka apedor,

⁵ tetere akusiiyuun mam egoŋakina acoa naka ituŋa dimarai toma apedor naka Edeke.

⁶ Konye ejai acoa nakinera kama kaluapolokoto konye mam erai acoa naka ikar kalu, karaida naka ikayaitok luka ikar kalu, luepote amameun,

⁷ konye kinera acoa naka Edeke kotoma nukaiyeiyea, acoa naibwaitai, nakicorakinit Edeke eriŋa ikar ejauna, kanuka aibusesuwok.

⁸ Mam ikayaitok luka ikar kalu apotu kojenut ŋin; naarai arai kejenete timam kibubukis Ejakait lokaibuses.

⁹ Konye kwape kiwadikatere ebe, “Numam keanyunit akoŋu, karaida akit aibiun, Numam kelomarito da otau loka ituŋanan Nuetia nen nukitemokinit Edeke lueminasi ŋes.”

¹⁰ Konye kipukok Edeke oni kanuka Emoyo. Naarai irerei Emoyo kere, kiton nuidulok nuka Edeke.

¹¹ Naarai iŋai tope kotuŋa yenejeni aomisio nuka ituŋa, dimarai emoyo loka ituŋanan loejai kotomakeŋ? Kwape kwaŋin emamei yenejeni aomisio nuka Edeke dimarai Emoyo loka Edeke,

¹² Konye oni, mam kidumunit emoyo loka akwap, dimarai Emoyo loebuni kama ejai Edeke, tetere kijenuni ainakineta nukiinakini Edeke oni atitai.

¹³ Kinera ŋun mere kakiro nuisisianakini acoa naka etuŋanane, dimarai nuisisianakini Emoyo, kitiiriani nuka emoyo kanuka emoyo.

¹⁴ Ituŋanan kauruuneteke mam ecamuni akiro nuka Emoyo loka Edeke, naarai eraas nukabaŋaanut mamakeŋ, kwabo mam epedori ajenun kes naarai emisiikinio kanuka emoyo.

¹⁵ Konye ituŋanan yenika emoyo emisiikini kere, kwabo emamei yenemisiikini ŋes.

¹⁶ “Naarai iŋai kereka ejenunit aomisio nuka Ejakait, tetere ituutoori ŋes?” Konye kijaa oni kaomisio nuka Kristo.