1 Ikabakan 3 - Ebaibuli

¹ Kiticatai ajakanut kakan naka Solomon. Korau Solomon ekamuran loka Parao ekabaka loko Misiri, koyana akoku naka Parao, koyau ŋes ore loka Daudi, aitodol nekedaunia aiduk eketogo, ka etogo loka EJAKAIT, ka arwatat naka Yerusalem airimor.

² Konye apotu ituŋa koinakis asuban kaiboisio nuiceleleete, naarai mam ber adukokinitai ekiror loka EJAKAIT etogo kiton apaarasia nun.

³ Komina Solomon EJAKAIT, kolosenenei kokisila luka Daudi papake: konye abu koinak asuban, kisupuruuni da lukisupurununio kaiboisio nuiceleleete.

⁴ Kolot ekabaka Gibeon ainakin asuban kaŋina; naarai kerai ŋin aibois naieelelei nakapolon: abu Solomon koinak ainakineta nuieweio alukumit kotem kanol.

⁵ Kitaanyikin EJAKAIT Solomon koGibeon kotoma airujasit kuare: kotema Edeke atiar, cc Kilipai nakainakini jo.”

⁶ Kotema Solomon atiar, “Ibu ijo kitodik ekejaanakinanikon Daudi papaka asianut naepol, kwape aloseneneo kakonyenekon kabeit, kadolit, ka etau loetenara kamakon; kinadakinit ijo ŋes asianut na naepol, koinak ŋes okoku aiboikin oicoloŋoke loka ajakanut, kwape eiaar lolo,

⁷ Kwana da, wu EJAKAIT Ekadeke, idakak ijo ekeiaanakinanikon araun ekabaka aibois naka Daudi papaka: arai eoŋ ikoku yenididi; mam ajeni alomar karaida alomun.

⁸ Ejai da ekejaanakinanikon kidiŋ otunakon luibu koseu, ituŋa luipu lumam epedorio aimar karaida aibil kes kanuka aipues.

⁹ Aso koinak ekejaanakinanikon etau lokapirianut atubokin ikonituŋa, tetere atiaki eoŋ ajokis ka aronis; naarai iŋai epedori atubokin ikonituŋa lu luipu?”

¹⁰ Kitoiok EJAKAIT akirot nin naelipit Solomon,

¹¹ Kotema Edeke ŋes atiar, “Naarai ilipit ijo akirot nin, komam ilipit aibut ikar luipu; karaida ailip abar, karaida ailip aijar naka lukasurupokon; konye ilipit apirianut aitiak itubesia;

¹² Koany, eswama kwape ejaar akonikirot; koany, kainak jo etau lokaeoa ka apirianut; emamei lem sek loeriakas kaio, mam da enyouni ece atupakin jo loeriakakinos kaio.

¹³ Kainak da numam jo ilipit, abar, ka ayonio, mam ejaunos kokabakan lueriakuunete kajo apaarasiakon kere,

¹⁴ Ido arai ilosenenei korotinika, korieenenei ikakisila ka aicorakinetaka, kwape aloseneneo Daudi papakon, ŋes konyet eyatakinia apaarasiakon.”

¹⁵ Kokweny Solomon, ido koany, kerai airujasit: kobu Yerusalem, kobwo koinaren kasaduku naka aitutuket naka EJAKAIT, koinak ainakincta nuicweio, koinak ainakineta nuka ainapakin, kipoik ikejaanakinakake kere epucit.

¹⁶ Kosodi do kopotu aŋor aarei, nukeraas nudotia, mama ejai ekabaka, kobwaata kakonyeneke,

¹⁷ Kobala aberu adiopet ebe, “Wu ekaiakait, kiperi eoŋ ka aberu na ediopetogo; abu eoŋ kedou ikoku koiai ŋesi da togo.

¹⁸ Kosodi kanen, ketuboros apaarasia auni nakadau aidoun, kidoun aberu na da; kija isio nepepe; komamei icetuŋanan kasio kotogo, dimarai isio aarei bonik kotogo.

¹⁹ Kotwana ikoku yenika aberu kana kuare; naarai abu ŋesi kicikak,

²⁰ Konyou ŋesi kidinebai, koyana ikakoku kosiepika nakeiotoo akejaanakinanikon, kiperik atorobuke, kiperik ikokuke yenatwanit atorobuka.

²¹ Naanyounia eoŋ tupuruc aitanak ikakoku, koany, etwanit: konye kadau airere ŋes tupuruc, koany, mam arai ikakoku, yenauriei eoŋ.”

²² Kotema aberu ace atiar, “Mam; konye yenikajaran ijes ikakoku, ka yenikatwan erai ikonikoku.” Kotema ya da ebe, “Mam; konye yenikatwan erai ikonikoku, ka yenikajaran ŋes ikakoku.” Kineras kwaŋin kakonyen nuka ekabaka,

²³ Kosodi ekabaka atemar atiar, “Ebala adiopet ebe, ‘Yen ŋes ikakoku yeneiari, ikonikoku da yenetwanit’: ka naee da ebala ebe, ‘Mam; konye ikonikoku yenetwanit, ka ikakoku yenejari.’’’

²⁴ Kotema ekabaka atiar, “Koomikinai ekileŋ.” Koinut ekabaka ekileŋ.

²⁵ Kotema ekabaka atiar, “Kotiak ikoku yenejari irwan aarei, koinak adiopet atutubet ka naee da atutubet.”

²⁶ Kosodi aberu nakerai ikoku yenejari yenike einer kekabaka, naarai arieba noi eketau ikekoku, kotema atiar, “Wu ekajakait, koinak ŋes ikoku yeneiari, konye sirikiar ŋes.” Konye kobala naee ebe, “Mam eraun yenika, karaida yenikon; kotiak ŋes.”

²⁷ Kosodi ekabaka aboŋokin ebe, “Koinak nin ikoku yenejari, konye sirikiar ŋes: ŋin ŋes totoke.”

²⁸ Kopup Isirael kere nuka etube loatubi ekabaka; koyonito ekabaka; naarai apotu koanyut ebe ejai acoa naka Edeke kaŋes airab.