1 Ikabakan 21 - Ebaibuli

¹ Kosodi kanen kokau kanun, kejai Nabos Eyesereelit emanikor loka emusabibu lokejai Yesereel, keapia ketogo loti loka Akab ekabaka loka Samaria.

² Kosodi Akab kobala Nabos ebe, “Ae emanikorikon loka emusabibu koraun lokaŋ araun emanikor loka edia, naarai eapie kekatogo; kainakini eoŋ jo emanikor ece loka emusabibu loitelekarit aiokis: arai bo itoiokit, kainakini apesan kwape eiaar eketiai.’

³ Kobala Nabos Akab ebe, “Madi EJAKAIT, eoŋ ainakin jo airumet naka lukapapaaka.’

⁴ Kobu Akab togoke ekadakinit ido konyunyura kanuka akirot nakelimokini Nabos Eyesereelit ŋes: naarai enera atiar, “Mam kainakini jo airumet naka lukapapaaka.’ Korior kaperisike, kimwana akekonyen, koner ainyam.

⁵ Konye kobu aberuke Yesebel mama ejai, kobala ŋes ebe, “Inyo bo etakadiki ekonitau kwaŋin, tape ineri ainyam?”

⁶ Kobala ŋes ebe, “Naarai ener kaNabos Eyesereelit, kalimok ŋes ebe, ‘Ae ekonimanikor loka emusabibu kagwel kapesan; arai bo isiyalamikinit kesiee keeemanikor’: kabonok ebe, ‘Mam kainakini ekamanikor loka emusabibu.’’’

⁷ Kobala ŋes aberuke Yesebel ebe, “Mere kereka jo iyait ajakanut naka Isirael? Konyou, konyam inyamat, kolakar ekonitau: kainakini eoŋ jo emanikor loka emusabibu loka Nabos Eyesereelit.’

⁸ Kwaŋin kiwadik ŋes ibaluan kokiror loka Akab, kipueak kes akeipucet, kijuka ibaluan mama ejaas imakio ka ikapolok lukejaas oreke, lukiboiete kaNabos,

⁹ Kiwadik obaluan kinera atiar, “Kolimos ailuŋ, kibwaikis Nabos akonyen nuka ituŋa:

¹⁰ Kisibwaata ituŋa iarei, idwe luka Belial kakonyeneke, kitorona ŋes, kobalas ebe, ‘Ibu konerok Edeke ka ekabaka da.’ Koyanaasi konyet, kibiribiroto kamor, kotwana.’

¹¹ Kosodete ituŋa lukoreken, imakio ka ikapolok lukiboiete koreken, kiswamata kwape kieorakinia Yesebel, kwape kiwadikatere obaluan luejukakini ŋesi kes.

¹² Kolimos ailuŋ, kibwaikis Nabos akonyen nuka ituŋa,

¹³ Kopotu ituŋa iarei, idwe luka Belial, kiboikinos akonyeneke: kitorona odwe luka Belial Nabos kakonyen nuka ituŋa, atiar, “Abu Nabos konerok Edeke ka ekabaka da.’ Kitolomasi ŋes kina naka ere, kibiribiroto kamor, kotwana.

¹⁴ Kiyakiasi neejai Yesebel atiar, “Ebiribirii Nabos kamor, atwana.’

¹⁵ Kosodi kanen, kiira Yesebel ebe ebiribirii Nabos kamor, atwana da, kolimok Yesebel Akab atiar, “Konyou, kirum emanikor loka emusabibu loka Nabos loagirit ainakin jo agwel kapesan: naarai mam Nabos eroko ejari, konye atwana.”

¹⁶ Kosodi kanen, kiira Akeb ebe atwana Nabos, konyou Akab kijesar omanikor loka emusabibu loka Nabos Eyesereelit airum.

¹⁷ Kobu akirot naka EJAKAIT mama ejai Eliya Etisibit, atiar,

¹⁸ “Konyou kiiesar airiamun ka Akab ekabaka loka Isirael, loiboie koSamaria: koany, ejai omanikor loka emusabibu loka Nabos Eyesereelit airum.

¹⁹ Ido kolimok ŋes atiar,’ Inera EJAKAIT kwanata ebe, “Iar, irum da?’” Kolimok da atiar, ‘Inera EJAKAIT kwanata ebe, “Aibois nakemeoto inokwo aokot nuka Nabos, emeete da kwaŋin inokwo akoniwokot, nupekon.”’”

²⁰ Kotema Akab Eliya atiar, “Kiany ijo eoŋ, ijo lokasurupika?” Koboŋok atiar, “Kaany; naarai igwelari bon aswam nueroko kakonyen nuka EJAKAIT.

²¹ Koany, ayauni nukaronok mama ijai, ido kapiar jo eut, adaun da kama ejai Akab ŋinikoku yenisapat, ka ŋin yeneenen, ka yenimam eenen koIsirael.

²² Ido etuluori ekonikek aputoor loka Yeroboam okoku loka Nebat, ka aputoor ekek loka Baasa okoku loka Akiya, kanuka aitunyunyurikin nakitunyunyurikini, aitidiakanar Isirael.

²³ Ido kiner EJAKAIT nuka Yesebel da atiar, ‘Enyamakinete inokwo Yesebel arwatat naka Yesereel.’

²⁴ Yenika Akab yenetwanikini ore enyamenenete inokwo; ido nin yenetwanikini ais enyamenenete akweny nuka apak.’

²⁵ (Konye emamei yeneputos ka Akab lokegwelar elopet aswam nueroko kakonyen nuka EJAKAIT lokitapaari aberuke Yesebel.

²⁶ Kiswamaenenei noi nuketal katuparit aputosia, kwape ejaatar kere nukiswamaenenete Imorain, lukireneari kolo EJAKAIT kakonyen nuka idwe luka Isirael.)

²⁷ Kosodi kanen, kiira Akab akiro nun, koeilicil ikenapen, konap ipukoi, koluŋ, koper kopukoi, kolot etwanit akuan,

²⁸ Kobu akirot naka EJAKAIT mama ejai Eliya Etisibit, kobala ebe,

²⁹ “Iany ijo Akab kwape etasonikinor kakonyeneka? Naarai etasonikin kakonyeneka, mam ayauni aronis ŋin kapaarasiake: konye kapaarasia nuka okokuke ŋes ayaunia aronis ŋin okekike.”