1 Ikabakan 2 - Ebaibuli

¹ Keapuunito apaarasia nuka Daudi nuka atwanareke; kicorak Solomon okokuke ebe,

² “Alosi eoŋ neelosete lukakwap kere: asa kogogonor, kitodiar kwape ekiliokit;

³ Korieenenei akirot naka EJAKAIT Ekonideke, alosenen korotinike, korieenenei ikekisila, ka aicorakinetake, ka itubesiake, ka aitejenunetake, kwape ejaatar nuiwadikatai kokisila luka Musa, tetere ikeriana kanun kere nuiswamai, ka neibelonokinor kere:

⁴ Tetere itogogoni EJAKAIT akekirot naenera kamaka ebe, ‘Arai eeoito ikonidwe erotokee, alosenen kakonyeneka kabeit kitauonokec kere, kaijarakec kere, (abala ŋesi ebe) Mam kimamikini ijo etuŋanan loirumi ajakanut naka Isirael.’

⁵ “Bobo da ijeni ijo da nuabu Yoab okoku loka Seruia keswamak eoŋ, nuabu ŋesi kiswamak ikapolok luarei luka ajoresio nuka Isirael, Abiner okoku loka Ner, ka Amasa okoku loka Yeter, luaari ŋesi, kobuko aokot nuka ejie kapak naka ainapakin, kojukok aokot nuka ejie arokobake naaenikinit kaŋabeteke, toma amukake da nuajaas akeieke.

⁶ Aso kiswama ijo kwape ejaar acoakon, sirikiyu akekou naabwaŋut akorwo alomar okatwak inapakina.

⁷ Konye kitodik odwe luka Barisilai Egileadit asianut, koraut ke si kanul kaluenyamete komesakon: naarai apotu kesi kekonakis eoŋ kwaŋin naakerea eoŋ Abisalom onaeekon.

⁸ Ido koany, ejai Simei okoku loka Gera, Ebenyamenit loka Bakurim mamakon, loabu kelam eoŋ eiamit loerono kapaaran naalosia Makanaim: konye abu ŋesi kobu airiamakin keoŋ Yorodan, keyapoik ŋes kalimite EJAKAIT ebe, ‘Mam kaari jo kekilen.’

⁹ Aso do siriwomit ebe mam ŋes egwaunit akirot, naarai ico ijo; ijenuni da nuibusakinit aiswamakin ŋes, itolomari kaokot akekou naabwanut akorwo ates.”

¹⁰ Kojotor Daudi kalukapapaake, kidaikinai ore loka Daudi.

¹¹ Apaarasia da nuerumitor Daudi Isirael emwaasi ikar akaisaoŋon: kirum ŋesi ikar ikanykaarei koKeburon, kirum da ikar akaisauni ka luuni ko Yerusalem.

¹² Kiboikin Solomon oicoloŋ loka Daudi papake; kicat noi akejakanut.

¹³ Kosodi Adoniya okoku loka Kagit abunore mama ejai Bat-seba toto naka Solomon. Kotema nin ŋes atiar, “Ibunit ijo kainapakin?” Kotema atiar, “Kainapakin.”

¹⁴ Ido kotema atiar, “Ejaas nuakoto einer kajo.” Kotema nin atiar, “Kiner cani.”

¹⁵ Kotema atiar, “Ŋeni ijo ebe kerai ajakanut nakan, kasesenete eoŋ luka Isirael kere tetere erumi: konye ebelokin ajakanut, araun naka onaeeka: naarai kerai nake kama ka EJAKAIT.

¹⁶ Kwana da kelipit jo adiopekirot, sirikiner.” Kotema ŋin ŋes atiar, “Kiner cani.”

¹⁷ Kotema atiar, “Keŋaiŋait, kilip Solomon ekabaka, (naarai mam ŋes kincrokin jo) kakorak Abisag Asunamit kerum.”

¹⁸ Kotema Bat-seba atiar, “Aso ejok; enerakini akonikiro mama ejai ekabaka.”

¹⁹ Kanuka nun abu Bat-seba koloma mama ejai ekabaka Solomon ailipakin Adoniya. Konyou ekabaka airiamakin kaŋes, kokukum kamake, kiboikin oicoloŋoke loka ajakanut, kicorak aibwaikin eicoloŋ loka toto naka ekabaka; kiboikin ŋesi akanike nakoteten.

²⁰ Kosodi ŋin atemar atiar, “Kelipit jo adiopekirot: sirikiner.” Kotema ekabaka ŋes atiar, “Kilip, toto, naarai mam eoŋ kanerokini jo.”

²¹ Kotema ŋes atiar, “Kokorakinai Abisag Asunamit onaeekon Adoniya airum.”

²² Koboŋok ekabaka Solomon totoke ebe, “Kanukinyo ilipia ijo Abisag Asunamit akorakinio Adoniya? Kilipakini ŋes ajakanut da; naarai erai onaceka lokapolon; kilipak ŋes, ka Abiatar esasedoti, ka Yoab okoku loka Seruia da.”

²³ Kosodi ekabaka Solomon aiyapo elimit EJAKAIT ebe, ‘Keswamak Edeke eoŋ kwaŋin ka adepar da, arai mam Adoniya elimunit akirot nin itia akeijar.’

²⁴ Aso do, kwape ejaria EJAKAIT, loabu keticat eoŋ, kesiboik oicoloŋ loka Daudi papaka, loabu kadumak eoŋ ekal, kwape kisumunio, abeit eario Adoniya lolo.”

²⁵ Kijuka ekabaka Solomon kakan naka Benaia okoku loka Yekoiada; kinom ŋes, kotwana,

²⁶ Abu ekabaka kotema Abiatar esasedoti atiar, “Kolot Anatot, alupokon; naarai ibus ijo atwanare: konye mam eoŋ kaari jo kwana, naarai ibu kodak asaduku naka EJAKAIT Edeke kakonyen nuka Daudi papaka, ido naarai kitieanitoi jo kanun kere nukiticanete papaka.”

²⁷ K wanin kirenea Solomon Abiatar kinyek araun esasedoti mama ejai EJAKAIT; tetere itodolikini akirot naka EJAKAIT, naabu kiner nuka ekek loka EH koSilo.

²⁸ Kopup Yoab nun; naarai abu Yoab kotup Adoniya, konye mam abu kotup Abisalom. Koker Yoab owema loka EJAKAIT, kikam amumwara nuka etem.

²⁹ Aponi kolimokinai ekabaka Solomon ebe, “Aker Yoab owema loka EJAKAIT, ido koany, ejai ariri ketem.” Kosodi Solomon aijukar Benaia okoku loka Yekoiada ebe, “Kolot, koar ŋes.’

³⁰ Kobu Benaia owema loka EJAKAIT, kotema ŋes atiar, “Inera ekabaka kwanata ebe, ‘Kolom.’’’ Kotema atiar, “Mam; konye atwanikini ne.” Kinyak Benaia akirot mama ejai ekabaka ebe, “Ebala Yoab kwaŋin, ido kabonok eoŋ kwaŋin.”

³¹ Kotema ekabaka ŋes atiar, “Kiswama kwape ebalar, koar ŋes, konuk ŋes; tetere ilemari aokot nuabu Yoab kobuko komam akirot, kamakaŋ, ka ekek loka papaka.

³² Kitebeik EJAKAIT aokotoke akouke elopet, naarai abu kinom ituŋa iarei luedolito ka luejok adepar ŋes, koar kes kekilen, komam papaka Daudi ejeŋi, kes Abiner okoku loka Ner, ekapolon loka ajore naka Isirael, ka Amasa okoku loka Yeter, ekapolon loka ajore naka Yuda.

³³ Kwaŋin kobeikis aokotokec akou naka Yoab, kakwes da nuka aurike ikar kere: konye mama ejai Daudi, ka aurike, ka ekekike, ka eicoloŋoke loka ajakanut, ejaun ainapakin naebuni kama ejai EJAKAIT ikar kere.”

³⁴ Kosodi Benaia okoku loka Yekoiada alosit, kinom ŋes, koar: konukakinai togoke modin,

³⁵ Kodakak ekabaka Benaia okoku loka Yekoiada ayait ajore aiboisike: kodakak ekabaka Sadok esasedoti aibois naka Abiatar.

³⁶ Kijuka ekabaka konyarau Simei, kotema ŋes atiar, “Kodukok etogokon Yerusalem, kiboienen kanen, sirikilom alosit nenice.

³⁷ Naarai apaaran nailomaria, adokar aguurut Kiduron, kojenu cut ebe abeit itwani; ebeikinete aokotokon akoukon.”

³⁸ Kotema Simei ekabaka atiar, “Iner ejok: kwape ebalar ejakaitika ekabaka, iswamai kwaŋin ekonikejaanakinan.” Kiboienenei Simei ko Yerusalem apaarasia nuipu.

³⁹ Kosodi kanen, ketuboros ikar iuni, apotu ibulesin iarei luka Simei kosiata neejai Akis, okoku loka Maaka, ekabaka loka Gat. Kolimokinai Simei ebe, “Koany, ejaas ikonibulesin Gat.”

⁴⁰ Konyou Simei, kopetak lupetan asigiriake, kolot Gat mama ejai Akis, amoot ikebulesin: kolot Simei, koyau ikebulesin koGat.

⁴¹ Aponi kolimokinai Solomon ebe anyou Simei koYerusalem alot Gat, Aboŋu da.

⁴² Kijuka ekabaka konyarau Simei, kotema ŋes atiar, “Mam abu kesiyapo jo kolimite EJAKAIT, ketogogon da kamakon ebe, ‘Kojen cut ebe apaaran nin nailomaria, ilosi nenice, abeit itwani?’ Ibu ijo kolimok eoŋ ebe, ‘Akirot nainera ijo ejok.’

⁴³ Aso kanukinyo mam ibu kidar aiyaposit naka EJAKAIT, ka aicorakinet naabu keeorak jo?”

⁴⁴ Ido kotema ekabaka Simei atiar, “Ŋeni ijo aronis naipupi otaukon, nakiswamakinit ijo Daudi papaka: kanuka ŋun inyakakini EJAKAIT akonironis akoukon,

⁴⁵ Konye isirerenio ekabaka Solomon, iticasio da eicoloŋ loka Daudi kakonyen nuka EJAKAIT ikar kere.”

⁴⁶ Aso kicorak ekabaka Benaia okoku loka Yekoiada; koloma, kinom ŋes, kotwana.