1 Ikabakan 12 - Ebaibuli1 Kolot Rekoboam Sekem: naarai kinotara Isirael kere Sekem aitaraun ŋes ekabaka, 2 Kosodi kanen, kepupu Yeroboam okoku loka Nebat ŋun, (naarai kerina ejai Misiri, neakeriarit anyoun kakonyen nuka ekabaka Solomon, kiboienenei Yeroboam koMisiri. Aponi kijukarai anyaraun ŋes.) 3 Kobu Yeroboam ka ekodet kere loka Isirael, kinerata kaRekoboam ebe, 4 “Abu papakon kitalanir ajookotokosi: aso do kitebeben aswam naetiono naka papakon, ka ajookotoke naelanir naebwaikinit mamakosi, isio da kijaanakini jo.’ 5 Kotema kes atiar, “Koloto kodaut apaarasia auni, kosodete aboŋun mamakan.” Koloto ituŋa. 6 Kinerut eka baka Rekoboam kimakio, lukebwoenenete kakonyen nuka Solomon papake eroko ejari, ebe, “Ibalas bo yesi ai eoŋ aboŋokin ituŋa ŋul?” 7 Kobalas ŋes atiar, “Arai ikoto araun ekeiaanakinan mama ejaas ituŋa lu lolo, kokoto aijaanakin kes, Koboŋok kes, kolimok akiro nuejok, aso eraunos kesi ikonikejaanakinak ikar kere.” 8 Konye kola ainerun naka imakio naapesikinito ŋes, kinerut kikatumunak luapolounete kaŋes, luabwoete kakonyeneke. 9 Kotema kes atiar, “Ibalas bo yesi ai, kabonokis ituija ŋul, luapotu kabalas eoŋ ebe, ‘Kitebeben ajookot nakibwaikini papakon mamakosi’?” 10 Kotemasi ikatumunak luapolounete kaŋes ebe, “Kolimok ituŋa lu lukibalas jo ebe, ‘Abu papakon kitalanir ajookotokosi konye jo kitebeben ŋes kamakosi’; ilimokini kes kwanata ebe, ‘Ebur ekabokorit lodidi aitelekar aŋabet naka papaka, 11 Aso do abu papaka kisibwok yes aiookot naelanir, eyatakini do eoŋ aiookotokus: abu papaka koswala yes kidasc, konye eoŋ kaswalari yes kikiritona.’’’ 12 Aso kobu Yeroboam ka ituŋa kere mama ejai Rekoboam apaaran nakiwuniet, kwape eeorakinia ekabaka ebe, “Kobonut bobo apaaran nakiwuniet.” 13 Koboŋok ekabaka ituŋa kaisiejakin, kola ainerun naka imakio naapesikinito ŋes: 14 Kinera kakes kwape ajaar ainerun naka ikatumunak ebe, “Abu papaka kitalanir ajookotokus, konye eoŋ eyatakini ajookotokus: abu papaka koswala yes kidase, konye eoŋ kaswalari yes kikiritona.” 15 Aso mam abu ekabaka kopup ituŋa; naarai kerai akirot naabu EJAKAIT koyau, tetere itieasi akekirot naabu EJAKAIT kiner kama ka Akiya Esilonit mama ejai Yeroboam okoku loka Nebat. 16 Keanyu Isirael kere ebe mam abu ekabaka kopup kes, kobonokis ituŋa ekabaka ebe, “Anyoin akorakinetekosi kama ka Daudi? Ido emamei sio airumet kotoma okoku loka Yese: Ape ma owemanakus, wu Isirael: Daudi, koanyanar do ekonikek.” Koloto do luka Isirael owemanakee. 17 Konye kirum Rekoboam idwe luka Isirael luibojete koreria luka Yuda. 18 Kosodi ekabaka Rekoboam aijukar Adoram, loapolokinit esolo; abu Isirael kere kibiribir ŋes kamor, kotwana. Kiwonya ekabaka Rekoboam adokar agalike akerit Yerusalem. 19 Kwaŋin kipaliik do Isirael ekek loka Daudi, kiton lolo. 20 Kosodi kanen, kepupu Isirael kere ebe Aboŋu Yeroboam, kijukasi anyaraun ŋes abunore atukot, kitaraut ŋes ekabaka koIsirael kere: amamei yenatupit ekek loka Daudi, dimarai ateker naka Yuda bon. 21 Kedol Rekoboam Yerusalem, kotukonok ŋesi lukokek loka Yuda kere, ka ateker naka Benyamin, ituŋa lueseunitai ilukumin akwatat ka akaisakanykauni, lukeraas ikaiiok, aitiji ekek loka Isirael, ainyakun ajakanut bobo neejai Rekoboam okoku loka Solomon. 22 Konye kobu akirot naka Edeke mama ejai Semaia etuŋanan loka Edeke ebe, 23 “Kolimok Rekoboam okoku loka Solomon, ekabaka loka Yuda, ka ekek kere loka Yuda ka Benyamin, ka ituŋa ice da ebe, 24 ‘Inera EJAKAIT kwanata ebe, Mam ilosete, ido mam ijiikinos kiinacanakus idwe luka Isirael: kobono ŋolituŋanan togoke; naarai erai akirot na nakaŋ.’’’ Kosodete kopuput akirot naka EJAKAIT, kobonosi, koloto kwape ajaar akirot naka EJAKAIT. 25 Kosodi Yeroboam aiduk Sekem akwap nakiukon naka Epuraim, kiboienenei kaŋina; konyou ŋesi kanen, koduk Penuel. 26 Kotema Yeroboam kotauke atiar, “Kwana eboŋori ajakanut okek loka Daudi: 27 Arai kelosenenoto ituŋa lu ainanakin asuban togo loka EJAKAIT Yerusalem, ibelokinos bobo itauon luka ituŋa kalu mama ejai ejakaitikec, Rekoboam ekabaka loka Yuda; kaarete eoŋ, eboŋorete do mama ejai Rekoboam ekabaka loka Yuda.” 28 Kosodi kineru ekabaka, kiswamau itak iarei luka esabu; kotema kes atiar, “Erai akirot naepol yes alosenen Yerusalem; koany idekesiokon, ijo Isirael, lukitolomunete jo kakwap nako Misiri.” 29 Kosipok idiopet Betel, ka ice da kosipok Dan. 30 Koraun akirot nin adiakaret: naarai kolosenenoto ituŋa ice aima idiopet Betel, ice da mape Dan, 31 Kodukok itogoi aiboisio nuiceleleete, koseu icetuŋa kotuna kere kitarau isasedotin, lumam keraas idwe luka Lebi. 32 Kicorak Yeroboam epueit kolap lokikanyetekauni, kapaaran nakitomonet kakany naka elap, kwape kepucit loejai Yuda, kolot ŋesi otem; kiswama kwaŋin da koBetel, koinak asuban mama ejaas itak luabu kiswamau: kibwaik isasedotin luka aiboisio nuiceleleete nuabu kiswamau koBetel. 33 Kolot otem loabu kiswamau koBetel kapaaran nakitomonet kakany kolap lokikanyetekauni, ŋes elap loabu ŋesi koseu kotauke: kicorak epueit kanuka idwe luka Isirael, kolot otem aisupuruun lukisupurununo. |
Ateso Old Version Bible © United Bible Societies, 1961.
Bible Society of Uganda