1 Ikabakan 1 - Ebaibuli

¹ Amojoŋit ekabaka Daudi kokokosanite noi; kimukosi ŋes kigoen. Konye mam abu komwanu.

² Kanuka ŋun kotemasi ikejaanakinakake ŋes atiar, “Komoikinai abekot nakatumunan ekajakait ekabaka: kobwoi ŋesi kakonyen nuka eka baka aiŋarakinit ŋes; koperenenei ŋin katorobukon, tetere ejakaitika ekabaka edumuni amwanis.”

³ Kosodete komout apese naatemel anatar iikoruno kere luka Isirael, kodumut Abisag Asunamit, koyaut ŋes mama ejai ekabaka.

⁴ Kitemelel apese noi; kiŋarakinite ekabaka, kijaanaki ŋes; konye mam eka baka abu kojen ŋes.

⁵ Kosodi Adoniya okoku loka Kagit aitopoloor bon atiar, “Araun eoŋ ekabaka.” Kitemonok ŋesi agalin ka ikebwanenok, ka ituŋa akaisakany akerenen koiŋarenike.

⁶ Mam papake abu kitakadikinite ŋes kaijarake kere ebe, “Kanukinyo iswamaa ijo ŋun?” Kerai ŋesi da etuŋanan lootemel; aurio ŋes akaulo ka Abisalom.

⁷ Kinerut ŋesi kaYoab okoku loka Seruia, ka Abiatar esasedoti: kotupasi Adoniya kiŋarakis ŋes.

⁸ Konye Sadok esasedoti, ka Benaia okoku loka Yekoiada, ka Natan enabi, ka Simei, ka Rei, ka ituŋa lukirigin luka Daudi mam ajaas ka Adoniya.

⁹ Koarak Adoniya amerekekin ka imoŋin ka lukasiepai amoru naka Sokelet, naidunyas ka En-rogel; konyarau ŋesi iinacanake kere odwe luka ekabaka, ka ituŋa kere luka Yuda ikejaanakinak luka ekabaka:

¹⁰ Konye mam abu konyarau Natan enabi, ka Benaia, ka ituŋa lukirigin, ka Solomon onaeeke.

¹¹ Kosodi Natan atemar Bat-seba toto naka Solomon atiar, “Mam kereka jo ipupunit ebe erum Adoniya okoku loka Kagit, komam Daudi ekapoloniwok ejeŋi?

¹² Aso do kobia, keŋaiŋait, kener kajo tetere itajari akoniijar, ka aijar da naka okokukon Solomon.

¹³ Kolot, koloma ijo mama ejai eka baka Daudi, kotema ŋes atiar, ‘Ekajakait, wu ekabaka, mam jo iyapoikinic akejaanakinanikon ebe, “Abeit irumi Solomon okokukon atupakin eoŋ, iboikini ŋesi oicoloŋoka loka ajakanut”? Aso kanukinyo irumia Adoniya?’

¹⁴ Koany, nape iriŋa ijo inerasi kekabaka, kalomuni eoŋ da atupakin jo, aitogogoŋ akirokon.”

¹⁵ Koloma Bat-seba agola mama ejai ekabaka. Amojoŋit ekabaka noi; kijaanakini Abisag Asunamit ekabaka.

¹⁶ Kokukum Bat-seba, kisuded mama ejai ekabaka. Kotema ekabaka ŋes atiar, “Inyo bo ikoto ijo?”

¹⁷ Kotema ŋes atiar, “Ekajakait, ibu ijo kiyapoik akejaanakinanikon kolimite EJAKAIT Ekonideke ebe, ‘Abeit irumi Solomon okokukon atupakin eoŋ, iboikini ŋesi oicoloŋoka loka ajakanut.’

¹⁸ Kwana, koany, irumit Adoniya: ijo da, ekaiakait ekabaka, mam iieni:

¹⁹ Aar imoŋin ka lukasiepai ka amerekekin nuipu noi, anyara odwe kere luka ekabaka, ka Abiatar esasedoti, ka Yoab ekapolon loka aiore: konye mam abu konyara Solomon ekejaanakinanikono

²⁰ Ŋo da, ekajakait ekabaka, kisesenete akonye kere nuka Isirael jo, tetere ilimokini kes iŋai iboikini oicoloŋ loka ekajakait ekabaka atupakin ŋes,

²¹ Arai mere kwaŋin, keiotoor ekajakait ekabaka kalukapapaake, kimarakinio eoŋ ka Solomon okokuka kwape ikadiakanarak.”

²² Ido koany, naperina ŋesi ineras kekabaka, kolom Natan enabi.

²³ Kolimokinai ekabaka ebe, “Koany, Natan enabi lo,” Kelom ŋesi mama ejai ekabaka, kokukum kakonyen nuka ekabaka kitulur akouke.

²⁴ Kotema Natan atiar, “Ekajakait, wu ekabaka, kibala teni kolo ijo ebe, ‘Adoniya irumi atupakin eoŋ, ŋes iboikini oicoloŋoka loka ajakanut”?

²⁵ Naarai alot ŋesi lolo, aar imoŋin ka lukasiepai ka amerekekin nuipu noi, anyara odwe kere luka ekabaka, ka ikapolok luka aiore, ka Abiatar esasedoti: ido koany, enyamete, emasete kakonyeneke, kobalas atiar, ‘Kidari Edeke ekabaka Adoniya.’

²⁶ Konye eoŋ, ekejaanakinanikon, ka Sadok esasedoti, ka Benaia okoku loka Yekoiada, ka Solomon ekejaanakinanikon, mam abu konyara.

²⁷ Kerai kereka nin akirot nakiswamai ejakaitika ekabaka, komam itodiarit mama ejaas ikejaanakinakakon ŋol loiboikini oicoloŋ loka ekajakait ekabaka atupakin ŋes?”

²⁸ Kosodi ekabaka Daudi aboŋokin ebe, “Konyarakinai Bat-seba.” Kobu nin mama ejai ekabaka, kobwo kakonyen nuka ekabaka.

²⁹ Kiyapo ekabaka kobala ebe, “Kwape eiaria EJAKAIT, loalaku akaijar koean kere,

³⁰ Abeit, kwape eyapoikinio jo alimit EJAKAIT, Edeke loka Isirael atiar, ‘Abeit irumi Solomon okokukon atupakin eoŋ, iboikini ŋesi oicoloŋoka loka ajakanut aiboisika’; abeit eswamai kwaŋin lolo.”

³¹ Kosodi Bat-seba aitulur akouke kwap, kisuded mama ejai ekabaka, kotema atiar, “Kojar ekajakait ekabaka Daudi ikar kere.”

³² Kotema ekabaka Daudi atiar, “Konyarakinai Sadok esasedoti, ka Natan enabi, ka Benaia okoku loka Yekoiada.” Kopotu kesi mama ejai ekabaka.

³³ Kotema ekabaka kes atiar, “Koyaŋaasi ikeiaanakinak luka eiakaitikus kayes, kisibwanenoto Solomon okokuka ekanyubu, koyaŋaasi ŋes Gikon:

³⁴ Kinyonyoanakis Sadok esasedoti ka Natan enabi ŋes akinyet araun ekabaka loka Isirael: kokutakis yesi arupepe, kobalasi ebe, ‘Kidar Edeke ekabaka Solomon.’

³⁵ Kosodete yesi atupakin ŋes, ebuni neai kiboikin oicoloŋoka; naarai eraun ŋesi ekabaka aiboisika: aseu eoŋ ŋes araun lokapolon loka Isirael ka Yuda.”

³⁶ Koboŋok Benaia okoku loka Yekoiada ekabaka atiar, “Kikote nepenen: kiner kwape kwaŋin EJAKAIT Edeke loka ejakaitika ekabaka.

³⁷ Kwape kejaenena EJAKAIT kejakaitika ekabaka, kojaenena kwaŋin ka Solomon da, kitopolo eicoloŋoke aitelekarit eicoloŋ loka ejakaitika ekabaka Daudi.”

³⁸ Aso kolot Sadok esasedoti, ka Natan enabi, ka Benaia okoku loka Yekoiada, ka Ikeretin ka Ipeletin, kisibwanenoto Solomon enyubu loka ekabaka Daudi, koyaut ŋes Gikon.

³⁹ Kolem Sadok esasedoti amumwarat naka akinyet koWema, kinyonyoik Solomon. Kokutakis arupepe; kobalas ituŋa kere ebe, “Kidar Edeke ekabaka Solomon.”

⁴⁰ Kopotu ituŋa kere atupakin ŋes, kokusete ituŋa alamarun, kolakara kaiyalama naepol, koeila akwap kanuka eporotokec.

⁴¹ Kiira Adoniya ka ipejok kere luajaas kaŋes kedaut kesi ainyam. Kepupu Yoab eporoto loka arupepe, kotema atiar, “Inyo bo ibwaanarere kore?”

⁴² Eroko inera ŋesi, koany, kobu Yonatan okoku loka Abiatar esasedoti; kotema Adoniya atiar, “Kolom; naarai irai ijo etuŋanan lokaibuses, iyaunit akiro nukajokak.”

⁴³ Koboŋok Yonatan Adoniya ebe, “Abeit etarau ejakaitiwok ekabaka Daudi Solomon ekabaka:

⁴⁴ Abu ekabaka kijuka Sadok esasedoti, ka Natan enabi, ka Benaia okoku loka Yekoiada, ka Ikeretin ka Ipeletin kaŋes, kisibwanenoto ŋes enyubu loka ekabaka.

⁴⁵ Apotu Sadok esasedoti ka Natan enabi kinyonyoikis ŋes akinyet araun ekabaka koGikon: apotu kopotu kaŋina elakara, ŋes ebwaaritor ere noi. Ŋol ŋes eeelet loipotu yesi kiirasi.

⁴⁶ Ido eboikin Solomon oicoloŋ loka ajakanut.

⁴⁷ Bobo da kopotu ikejaanakinak luka ekabaka ailipakin ejakaitiwok ekabaka Daudi arereŋ ebe, ‘Kitojok Edekekon ekiror loka Solomon aitelekar ekirorikon, kitopolo eicoloŋoke aitelekarit eicolonokon”: kokukum eka baka koitada.

⁴⁸ Ener ekabaka kwanata atiar, “Kiturltete EJAKAIT, Edeke loka Isirael, loainaki loiboie oicoloŋoka lolo, aanyut akakonye da.’”

⁴⁹ Kokuriakaros ipejok kere luka Adoniya, konyout, kolot ninituŋanan korotoke.

⁵⁰ Kokurianar Adoniya kanuka Solomon; konyou, kolot, kikam amumwara nuka etem.

⁵¹ Kolimokinai Solomon atiar, “Koany, akurianar Adoniya ekabaka Solomon: naarai, koany, ekamu ŋesi amumwara nuka etem ebe, ‘Kisiau ber eka baka Solomon aiyapoikin eoŋ ebe mam eari ekejaanakinanike kekileŋ.’’’

⁵² Kotema Solomon atiar, “Arai kitodiari bon araun etuŋanan lokaibuses, emameun etimatake loedoi kwapr konye arai ketakanu aronis kotomake, etwani bo ŋesi.’

⁵³ Aso kijuka ekabaka Solomon, koyaunai ŋes kotem, Kobu kisuded kama ejai ekabaka Solomon: kotema Solomon ŋes atiar, “Kolot togokon.”