Taitus 3 - Basef Buꞌwami Godi

Ape' mitu la'ifipa ma waf bu'unai

¹ Ine' la'ela'ef la'ifinama nefela esis amam nematawa ma sope owina amam gavman dembemi, amam la'ifimi mumafi esis ma sila basef amamumi. Ea' esis sondandombama sonda' opeh hiami bu'wami.

² Esis owa' sonda' enin epen findiwan ma basef awami. Esis ina sifitap, owa'. Sope opalef awanem. Esis la'ela'ef sope sonda' waf so'uso'umbilinai ma epes hiesi.

³ Ine' negawa fowa' ape' wapoti' owa' ukup bo'om, ape' mosambala basef ea' Satan nambaso'mapa. Ape' mape owina waf naninani aonai opalef mohafema waf aonai ma alop nandanifel. Ape' mafe' maloma waf anama ukup aoma enis epes ma kowalapama amamaga asasimi. Esis sofala ape' naumbih asasipai ea' ape' wapoti' manda' naumbih malomas.

⁴ Ea' God, anan nofa'apa motanimani, anan alupunai ape'inai okom nainailapa. Nemaf anama waf anama ananinai nataga nafe' alihina.

⁵ Anan ina okom napoma anona waf bu'unai ape' manda'anai dei' nofa'apai, owa'. Okom dahowinai ananinai atona nofa'apa motanimani. Anan nasa'opapa ea' mataga awasi dambaipai, Ambal Bu'unai Godi nase'apa ambal namunai ma ape'.

⁶ Ama opeh Jisas Kraisi, Anan nofa'apa motanimani, God nase'apa Ambal Bu'unai Ananinai nafi'i hianai endilisi ma ape' si'i nakolo'wai pepel ma ape'.

⁷ Anan nanda'am na'ama ma na'i ape' epes bo'wepa andeande' ma okom anama Jisasi atona lu'unai nainaila ape'. Ea' nandandepapa ma mofa' ambal namunai mope andeande' la'ela'ef. Ea' ape' mombale'efana mape mohafana.

⁸ Basef amama endilisimi ma ape' hiapai mombale'efam. Ae' a'i newalapa basef amama ni'iam mehipa epes isima sombale'efa God ea'i ukup mopoma situ la'ifisa waf bu'unai. Basef amama ma Jisas Krais naloma God, amama bu'wami ma migiambama epes.

⁹ Ea' basef amama mamumami falafumi esis sa'iama sosambala waf bu'unai, sa'i sondahihianama sa'i agof hiami bafasas akupas asasisi etis, sofitapa mi'uli fowa' God naso' Mosesanai, amama ine' nindihi'amam. Dei' main, ape' mogawa basef amama ina magimbamepa mawalapa anona waf bu'unai, owa'.

¹⁰ Emi egafin nanda' esis Kristen sandawal sataga biefisi, inima nesambala basef bu'wami. Ine' nehagofa okom ananinai ni'ipana basef la'ifimi ma nihi'amban, atetef o bif. Ama enin owa' neme' basef ine'imi, nekwahin newa' alafugan.

¹¹ Ine' negawa epen inima nakwaha eaf bu'unai ea'. Waf aonai ananinai nihi'ambapa mogawa enin epen awani.

Anom basef tu'wanim akutaimi

¹² Anona nemaf ae' i'i esapa' Artemas o Tikikus nofe'mago ine', ine' ulal nifi'mai ae' mehip wambel anama Nikopolis. Ine' negawa ae' ai'am ea' ma ipani Nikopolis nogota anama aonama asaf lu'unai nalai.

¹³ Ine' numafi Senas nogawa mi'uli esis Romi noloma Apolos andeande'. Ea' nigiambamama amamaga amam mofa'am mofe' wambel hiagoma ma nambimb ina amamaga a'am eaf, owa'.

¹⁴ Ea' esis Kristen amam nematawa ape'isi sonda' waf sope la'ifisa opeh bu'wami mamumami sigiambama epes isima amamaga a'asi. Na'ama esis Kristen sope etin ea' ukup mose'asa sonda' waf bu'unai Godi.

¹⁵ Amam nematawa sape salome na'ae esis sandanifel salomago ine'. Ine' nendanifel nelomago emi egafis ukup maimaila afa' sombale'efa God salomafa. Ae' a'i God nigiambamepago ipe' na'a nope nolomago ipe' hipei nonda'epa pataga la'ifipa. Ea' ma'um.