Taitus 2 - Basef Buꞌwami Godi

¹ Ea' ine' ni'ipa esis amam nematawa ma basef bu'wami ma waf esis sanda'anai mila basef amama bu'wami. Ine' ni'ipas na'ama.

Basef amam nematawa isima hagasi

² Amam hagami owa' mea' embel mohaga mogaol. Amam ukup mope andeande'ma waf bu'unai ea' nomonas mopaim mumafi alop andeande'. Amam mope andeande'ma bale'ef amamunai nope bo'ona atona ma waf anama ukup mila God ea' mila epes wapoti'. Ea' mitu la'ifima nimanimi hiami.

³ Ea' awau nematawa hagiwai wapoti' ope andeande'. Awau owa' ohas wi'ipas enis epes, owa'. Awau owa' wea' embel hiami ohaga ogaol. Awau ope si'i tisa nawalipasa waf bu'unai.

⁴ Awau hagiwai wihi'amba nematawa awama awiawai ma onda' waf na'ama. Ukup awaumi mimila amam wahupawa awaumi moloma awasi awausi.

⁵ Ea' awau umafi nomonas awaumi andeande'ma ope bo'owa andeande' endilisi. Ea' umafi ifagw awaumi andeande' ma wigiambama amam moloma awasi awausi. Awau ope owina amam wahupawa awaumi. Awau onda' waf anama hianai bu'unai hi'ilana epes ina siti anona waf aonai awaunai ea' sonda' basef Godi findiwam, owa'.

Basef amam awomimi

⁶ Ea' na'ama etin, ine' nefela ukup amam amama awomimi nenda' ukup la'ifim mopaim mumafi alop andeande'.

⁷ Ine' etina nenda' waf bu'unai atona amam mutilina ma milina monda' waf hianai bu'unai. Opeh amama niwalipa epes, ine' owa' ni'iam moloma basef awami, owa'. Ni'ipas basef bu'wami endilisimi atom. Okom ine'inai nopoma waf bu'unai atona nenda' opeh amama niwalipas la'ela'ef.

⁸ Ine' ni'i basef bu'wami atoma enis epes ina siti anona waf aonai ma opeh amama nanda'ami, owa'. Ama esis naumbih nambimb sofa' ambagof awami. Dei' main, esis ina siti anona waf aonai ma afa' ma si'i anom basef awami, owa'.

Basef epes isima agof a'asi sanda' opeh atomi

⁹ Ine' ni'ipa isima agof a'asi sape owina enis epes sanda' opeh atomi ni'ipas ni'i, esis some' basef agufumi sope owina amam. Ea' sonda' opeh bu'wami mamumami hiami amam ukup ma'iami. Esis ina sogwa anom basef agufumi sohahali'am, owa'.

¹⁰ Esis ina sokowalopa anom amamaga amamumi, owa'. Esis sila basef amamumi andeande'. Ama anona nemaf esis sofela agela basef amama ape' mawalapama epesi lu'um. Basef amama Godi nofa'ai ape' motanimani mope andeande'.

Ape' mope andeande' mohafa nemaf dembinai Krais niefi'ianai

¹¹ Ape' mogawa okom Godi lu'unai nainaila ape' ma nigiambamapa na'a anama nataga nandawalap ea', epes hiesi wambota lounai agufisi saloma agof a'asi hi'alas satolona. Ama nofa' amam nematawa nokwahomapa waf aonai mutanimani mofe'ma anan.

¹² Waf God nigiambama na'ai mawalapa ape' ma mokwaha waf anama mowa' alafugaha Godi, ea' mokwaha ukup amama awami ma waf etapanai, mope andeande' nogota anae'.

¹³ Nogota anama ape' mape mohafa danifela anama lu'unai mape mohafanai. Ape' mape mohafa pepel nafifili God Dembinai ape'inai nofa'apa motanimani, anan Jisas Krais anona nemaf notaga nondawalap.

¹⁴ Krais anan nakwaha ambal bu'unai ananinai ma natala ape' natagahepa ma waf aonai hianai mosambala mi'uli Godi. Anan na'i nondombasa ape' ma motaga epes ananipai atepa bu'upai, ukup mohafela monda' opeh lu'wami ma mila waf hianai bu'unai.

¹⁵ La'ela'ef ine' ni'ipasa basef amama. Ea' nenda' epes sataga la'ifisa sila basef amama ni'ipasa basef la'ifimi si'i anona dembinai agel lu'unai. Ea' nesambala waf aonai esis sanda'anai. Ae' andaiwa'ma enin epen ni'i ine' aman falafinai, owa'.