Taitus 1 - Basef Buꞌwami Godi

¹ Ae' Pol anda' maola Godi, ae' aposel Jisas Kraisi. Anan nandandepe ma eawalipasa basef ananimi. Anan nasapa'e ma igiambama esis amam nematawa nandandepas ea' ananisi ma enda'as sotaga la'ifis sombale'efana sogawa basef endilisimi ma sila waf ananinai.

² Ae' anda' maola agiambama bale'ef asasinai ma esis sogawa ma sondanifel sope sohafa ambal anama namunai nope andeande' la'ela'ef. Fowa' gani God ata' owa' nonda' anom amamaga motaga etap anae', anan nali' na'iam ma nose'apa ambal anama ape'. Anan ina nambaso'ami, owa'.

³ Anom nimeguf mafe'ma ea', nogota anama anan atona nandandepana ea', anan nafela amam amama mawalapa basef ananimi alihim. God anan nofa'apa motanimani, anan na'iam dei' nase'e opeh amama ma ewalapa basef amama.

⁴ Ae' anda' basef amama mafe'mago ine' Taitus. Ine' nembale'efa God na'ama etin si'i ape' hiapai mombale'efana. Amama atom dei' ine' nogalome ae'inai endilisi. Ae' a'i God ahalomapa noloma Krais Jisas anan nofa'apa motanimani, amam biam migiambamena na'a okom ine'inai nope awanena.

Basef amam agufumi mumafi esis Kristeni

⁵ Ae' akwahina napani ailan Krita nendondomba opeh amama ata' owa' nimbefama nambimb nendandepa anom agufumi mumafi esis Kristeni wambel hiagoma, si'i fowa' a'ipina. Ea' basef amamumi mape na'ama.

⁶ Anona aman i'i owa' nonda' anona waf aonai ma naep esis amam nematawai ma anan noso' nemata'w atoto'w ma batawisana ananisi sombale'efa Krais esis basef a'as, ina sonda' anona waf aonai, sape andeande' seme' basef. Amam manda' waf anama, ine' nenda'am mope agufumi.

⁷ Ine' negawa agufumi mumafi esis Kristeni, amam mumafi opeh Godi. Ea' amam amama fe' pe amamunai andeande'ma anona nemaf esis amam nematawa ina siti anona waf aonai amam manda'anai, owa'. Anona aman ama amam agufumi, anan ina nonda' waf aonai, o okom wandafuna mehip, owa'. Anan ina nea' embel nohaga nogaol nohas etin, owa'. Anan ina okom nohafel ni'ini'i endilisi ma nonda' waf aonai ma nofa' otamba, owa'.

⁸ Anan nimafi emi egafis sifi'i lauguni anona wambel. Anan okom ni'i waf bu'unai hianai Godi ea' nope andeande'. Anan numafi okom ananinai atona andeande'.

⁹ Anan nombale'efa basef amama bu'wami ape' mawalipasami andeande'. Ea' anan la'ifinama ni'ipa enis epes nefela ukup asasimi ma nonda'as sataga la'ifisa basef amama bu'wami. Ea' la'ifinama ni'ipa isima sosambala basef bu'wami ma someme'ma basef asasimi ina endilisimi, owa'.

Anona ailan Krit enis epes sambaso'ami sape

¹⁰ Epes hiesi ina saila basef, owa'. Sosambalom. Esis sanda' basef etin sa'iam sambaso'ma enis epes. Esis hiesi wambota Judai satopa' alop.

¹¹ Esis sandandam na'ama, esis sa'i sombaso'mas sofa'asa otamba moni maim enis epesi. Ea' sawalipa enisa waf anama ape' Kristen mandaiwa'manai. Esis sanda' waf anama atona dei' sahambombaga wambotagw epes hiesi. Ea' ine' nesopama malogof asasimi isima sanda'am na'ama.

¹² Fowa' anona aman Kritinai anan gawainai si'i profet na'im na'ama na'i, “Fowa' gani endilisi esis Krit sape epes sambaso'ami ea' dei' wapoti' ata' sape na'ama etin. Esis si'i mafis mape aolopi awami. Ala'uta nas endilisi, sa'oh etin sa' gwa'aimi hiami.”

¹³ Basef amama endilisimi. Ea' ine' ni'ipasa basef la'ifimi ma seme'am sogawa endilisi waf aonai esis sanda'anai ma ata' somboma opalef. Ama bale'ef asasinai ata' notaga bo'ona.

¹⁴ Ine' ni'ipasa basef la'ifimi ma esis sokwaha basef mamumami falafumi esis Judai ma mi'uli epes isima sowa' alafugaha basef endilisimi.

¹⁵ Ukup epes isima opalef bo'oma waf bu'unai, amamaga hiami bo'om andeande' ma esis. Ea' ukup epes isima aom ea' esis owa' sombale'efa Kraisi, opalef asasimi ina bo'om, owa'. Ukup asasimi maloma basef mape opalef asasimi nomoni aom endilisi.

¹⁶ Malogof asasimi sa'iam na'ama sa'i, “Ape' mogawa God.” Ea' fe' asasinai nawalapa esis sowa' alafugaha God. God anan nandaiwa'ma esis endilisi. Epes isima sosambala basef, ina la'ifisa sonda' anona waf bu'unai, owa'.