Basef Amama Pol Nandaꞌam Mafeꞌma Esis Romi 9 - Basef Buꞌwami Godi

Pol okom aona ma esis Israel. Esis hiesi ina sombale'efa God, owa'

¹ Basef amama ae' a'iemi endilisi, ae' aman Kraisi ea' ina ambase'am, owa'. Ambal Bu'unai Godi nihi'ambe nalome umafi basef mape opaf nomoni mihi'ambe ma'ipi a'i basef endilisimi atom.

² Basef amama na'ama. Opaf ae'anai nimanina endilisi ea' okom na'i nataga aona la'ela'ef.

³ Ae' okom na'i endilisi ma a'i God nofa'ai esis alupusi esimbel ae'ami Israel sotanimani. I'i anona eaf nope, ae' enda' betena Kraisa ae' hegigili eho'ofa esis sefe' wambel bu'unai heven, ea' ae' owa'.

⁴ Ape' Israel God nandandepapa ea', nanda'apa mataga awasi ananipai ea' na'i aho'ma miti' nafifili ananinai. Anan na'i basef ananimi endilisimi atom nalomapa ea' nase'apa mi'uli bu'unai ananinai naloma waf endilisinai monda' lotumanai. Ape' mofa' basef amama God na'i endilisimi atomi.

⁵ Bafapapa akupapa ape'imi dambami mali'i amama ape'imi atom. Ea' esimbel ape'imi atom, Krais nataga epen, anan God nandandepana nasapa'ana nafi'i, nape nali'ma epes saloma amamaga hiami numafiam. Anan God endilisinai ea' mefela agel ananinai la'ela'ef. Endilisi.

God nandandepa esis amam nematawa ananisi atis

⁶ Ea' basef amama God na'ipa esis Israel na'i endilisimi atom ina higilalam etin, owa'. Epes sataga wambota Israeli, hiesi ina Israel endilisi God nandandepas ananisi etis, owa'. Esis ina sombale'efana.

⁷ Ea' ape' ina mi'iam na'ama mi'i, “Esis sataga esimbel Abrahami esis hiesi sombale'efa God sape batawisana ananisi,” owa'. Enis ina sombale'efa Anan, owa'. Fowa' gani God na'ipana na'ama na'i, “Esis esimbel Aisaki atom owagama sofa' agel wambota ine'inai.”

⁸ Amama na'ama. Enis batawis Abrahami ina awasi Godi, owa'. Isima sataga basef amama God na'i endilisimi atom na'ipa Abrahamami, agel napomas ea' bafasana Abrahami endilisi.

⁹ Basef amama endilisimi atom ma'i na'ama ma'i, “Nemaf anama andandepana ea', anona nemaf itanimai ea' Sara kola awani aman.”

¹⁰ Ea' ina amama atom, owa'. Bafapana biam Rebekai ahalomam atotona ea' Aisak atona ahalomapa ape'inai.

^11-12 Na'ama God okom na'i ea' ma waf nandandepa epesi. Anan ina okom na'i maol epes sanda'anai ea' nandandepas, owa'. Bafasana amama biam ata' mape nomona opaf akwa'unai God na'ipakw na'i, “Nali'i dembinai nope owina awagufunai nagi'i. Sahalomana anona nemaf nonda'mana maol owalomana.” God naila okom ananinai atona dei' na'ipakw na'ama. Anan ina okom na'i anona maol bu'unai aonai amam anona nemaf monda'anai, owa'. Anan naila okom ananinai atona na'i basef na'ama.

¹³ Amama si'i Baibel na'i, “Ae' okom nainaila Jekop, ea' Iso andaiwa'mana endilisi.”

¹⁴ Ea' ape' dei' ata' mi'i main? Mi'i, “God nanda' waf aonai?” Owa'etin!

¹⁵ Anan fowa' na'ipa Moses na'i, “Endilisi, anona nemaf ae' i'i uwahipis emi egafis i'i uwahipisi ea' igiambama emi egafis ae' okom na'i igiambamasi.”

¹⁶ Ea' ape' ina mi'i ukup epesi atom maloma maol epesi atona sanda' God nagiambamapa, owa'. God atona nati ape' uwahipipa dei' okom Ananinai atona nagiambamapa etin.

¹⁷ Ea' Baibel na'i God na'ipa dembinai king Fero na'ama na'i, “Ae' a'i ihi'ambasa pepel ae'anai epes hiesi ma anona nemaf sowalapa agel ae'anai ma etap hiagoma. Amama atom dei' afelena nanda' amamaga amama.”

¹⁸ Ape' mogawa i'i God ni'i nigiambama enin epen etin, anan nigiambaman. Ea' i'i nosopama okom enin epen, anan nosopama okom ananinai.

Okom wandafunai Godi naloma dahowe ananinai

¹⁹ Ea' anona ma ipe' atuwasi ni'ipa ae' na'ama ni'i, “I'i na'ama, dei' maina God ata' na'iam etin na'i epen ofagema mapomana waf aonai anan nanda'anai? Emi la'ifina nesambalo' okom Godi? Owa'etin.”

²⁰ Ipe' epes emi egafipa ma pi'i pinifala God? Owa'. A'i malep sanda' nombol sanda'anai la'ifina ninifala aman anama nanda'anai ni'i, “Dei' maina ine' nanda'e na'ama?” Owa'etin.

²¹ Aman nanda' malihi nefa'ai anona etap nanda' maloh biam, anona maol bu'unai, anona falafunai maol aonai. Endilisi amama andeande'.

²² God wapoti' nanda'am na'ama etin si'i aman nanda' malihi. Fowa' nanda' epes sataga ea' naila okom ananinai atona na'i aho'ma enis epes sefe' eaf hagililasanai. Esis safe' eaf anama, ea' anan ina nagwamasa waf aonai esis sanda'anai ulal, owa'. Anan ata' nanimbelis nape nohafas nogota laonai ma anona nemaf nohambombagas. Dei' main, anan na'i nowalapa okom wandafunai ananinai notaga alihina noloma pepel ananinai ma epes hiesi sogawana.

²³ Anan na'i nowalapam motaga alihim amamaga nafifili bu'unai ananinai ma enis epes anan nati uwahipis sogawam. Epes isima anan naila okom ananinai atona fowa' nandandepasa nose'asa nafifili esis.

²⁴ Amama ma'i ape' atepa. Anan nofalapa ea'. Ina nofala enis Juda etis, owa'. Nofala enis owa' Judaisi wapoti'.

²⁵ Basef amama aman profet Hosea fowa' gani nanda'ami wapoti' ma'i na'ama ma'i, “Esis amam nematawa isima fowa' ina epes ae'asi, anona nemaf i'i epes isima ae'asi, ea' epes isima fowa' ae' owa' okom ninilas ese'asa opaf, anona nemaf okom ninilas.

²⁶ Ea' wambel ali' a'ipas a'i, ‘Ipe' ina epes ae'ipei’, anona nemaf wambel anama atona sofalas si'i, ‘Awasi God nape namunai la'ela'ef ananisi.’ ”

²⁷ Fowa' profet Aisaia nanda' ikwafa esis Israel na'ama na'i, “I'i esis Israel sotaga hias endilisi si'i wesan na'oh naoh akata, ea' hapaisi. Anona nemaf Dembinai nofa'ai kwawie'is nofa'as sotanimani nokwahomasa waf aonai.

²⁸ Anan anona nemaf nonda'masa basef la'ifimi notopa'am mehip nogwamasa nimanimi epes hiesi etapasi hi'ilas.”

²⁹ Ea' na'ama etin si'i fowa' Aisaia na'iama esis amam nematawa Israel na'i, “I'i Dembinai la'ifinai numafi amamaga hiami owa' neasopama nimanimi epes isima sape etap anae', anona nemaf ape' motaga higililapa si'i wambel anama biafina Sodom naloma Gomora. Owa'etin. Anan nasopamam ea'.”

Esis Israel sanda' maola sofa' waf bu'unai

³⁰ Dei' ape' ata' mi'iam mi'imama? Ape' mi'iam na'ama mi'i, “Esis owa' Judaisi ina sanda' maol lu'unai ma sefa' waf bu'unai, esis sefa'am ea'. Esis sembale'efa God sefa' waf anama bu'unai.

³¹ Ea' esis Israel sanda' maol lu'unai ma saila mi'uli God fowa' naso' Mosesanai ma sefa' waf anama bu'unai, esis ina sefa'ana, owa'.”

³² Dei' main, esis sandaiwa'ma sembale'efana sofa' waf bu'unai. Esis ukup ma'i sonda' maol atona sefa'ana. Na'ama sandasisi'ip anona owap sowa.

³³ Amama si'i Baibel na'i, “Peme! Ae' ambe' anona owap wambel lu'unai esis Israel agel Saion. Owap anama pepel napaina nohambombaga epes sondasisi'ip sowa. Ea' emi egafis sembale'efa aman anama, anona nemaf esis ina ukup aom, owa'. Sope sondanifel.”