Basef Amama Pol Nandaꞌam Mafeꞌma Esis Romi 8 - Basef Buꞌwami Godi

Krais nakwahomapa waf aonai ea' nase'apa Ambal Bu'unai Godi ma ape'

¹ Basef amama mali'i ofagema amama. Ape' amam nematawa mape la'ifipa maloma Krais Jisas, ina ata' anom basef dei' ma God nonda'mapa basef lu'wami mofa' nimanimi ma waf aonai ape' manda'anai, owa'etin.

² Dei' main, pepel Ambal Bu'unai Godi nase'apa ambal namunai ape', anan natagahepa ma pepel waf aonai naloma pepel naga'i. Anan nanda'am na'ama ma Krais Jisas atona ea' mape la'ifipa ma anan dei' mape wafifipa.

³ Maol anama mi'uli anama God fowa' naso' Mosesanai owa' la'ifina nonda'ana, God nanda'ana. Dei' main, opalef ape' epesi ina la'ifim. Dei' God nanda' maol anama na'ama. Nasapa'i Nogalomana Ananinai atona nafi'i nataga si'i ape' epes manda' waf aonai. Ama nokwahomapa waf aonai hi'alana. Anan nafi'i ma nokwaha waf aonai ape' epesi noloma nimanimi ma waf anama ea' God nase'anam mapoma anan atona. God nanda'am na'ama dei' nanda' basefa waf aonai ape' manda'anai.

⁴ Anan nanda'am na'ama ma ape' mofe' mila waf bu'unai nape mi'uli anama. Dei' main, ape' dei' ina mafe' maila fe' anama opalef apimi, owa'. Mafe' maila fe' dambainai Ambal Bu'unai Godi.

⁵ Epes saila waf opalef apimi safi'i, ukup asasimi mape la'ifim maila amamaga amama opalef apimi maimailami. Ea' epes emi egafis safe' saila Ambal Bu'unai Godi, ukup asasimi mape la'ifim maila amamaga okom Ambal Bu'unai na'iami.

⁶ I'i ukup epes isima mapoma amamaga awami ma opalef apimi asasimi, amama mawalapai ga' higililas. Ea' emi egafis ukup asasimi la'ifim mopoma amamaga Ambal Godi, epes isima dei' nape ambal namunai opalef mape awanem.

⁷ Emi egafis ukup mila waf apinai, isima sataga naumbih Godi. Dei' main, esis ina sape owina mi'uli hianai Godi, owa'. Ina la'ifisa sila mi'uli anama, owa'.

⁸ Emi egafis sape owina waf apinai, epes isima ina la'ifisa sonda' waf God okom na'ianai, owa'.

⁹ I'i Ambal Bu'unai Godi nupaipa, ipe' ina ata' pape owina waf anama apinai aonai ma okom apinai, owa'. Ipe' pape owina waf Ambal Bu'unai Godi. Ea' emi egafis Spirit Ambal Kraisi owa' nopaisi, isima ina epes Kraisi, owa'.

¹⁰ Waf aonai fowa' panda'anai naha alop ipe'inai ma anona nemaf pega'. Ea' i'i Krais nape nomona ipe', ipe' pape namipei. Dei' main, Krais nanda'epa pataga bo'wepa ma naep Godi.

¹¹ Fowa' God nafela Jisas notanima nohafel hi'agif. Ea' Ambal ananinai nagiambamepa na'ama. Ipe' epes emi egafipa Ambal Bu'unai Godi napaipa nomon, nase'epa ambal namunai alop ipe'inai wapoti'. Ipe' paga' ea', dei' anan nanda'epa pape namipa.

Ambal Bu'unai Godi nanda'apa mataga awasi ananipai

¹² Ipe' alupipei wambota Kraisi, anom basef magi'ma amama ma'i Krais natalepa ma maol lu'unai dei' ape' anona wiaf ata' notaomapa ma mila okom Ambal Bu'unai Godi. Ea' ape' wiaf a'apa ma mofe' mila opaf anama apinai, owa'.

¹³ I'i ipe' pefe' pila waf anama opaf apinai, anona nemaf ipe' pega'. I'i ipe' peha waf aonai ipe'inai noga' ma pepel Ambal Bu'unai Godi, anona nemaf pepe namipa.

¹⁴ Emi egafis saila wafa Ambal Bu'unai Godi, isima dei' sape awasi Godi wambota ananinai.

¹⁵ Dei' main, ipe' ina pefa' Ambal Bu'unai Godi nowa'epa la'ifipa si'i sanda' kalabusi ma ata' umbamehepa wapoti', owa'. Ipe' pefa' Ambal Bu'unai anama nanda'epa pataga awasi Godi. Pepel Ambal Bu'unai atona dei' mofalana ma'i, “Ahalomapa! Ahalomapa!”

¹⁶ Ambal Bu'unai Godi atona nape la'ifina ma ape' nagiambama ambagof ape'imi ea' dei' mawalapa basef ma'iam alihim, mape awasi Godi.

¹⁷ Ape' mape awasi Godi. Ea' anona nemaf mofa' amamaga bu'wami Ahalomapai moloma amamaga anan nambe'ama Krais numafiami mofa'am moloma Krais. I'i dei' ape' mofa' nimanimi molomana, anona nemaf mofa' pe bu'unai endilisi nonda'apa mififil molomana.

Anona nemaf ape' mofa' pe bu'unai endilisi mupe mififil moloma Krais

¹⁸ Ae' okom na'i pe anama bu'unai anona nemaf notaga nondawalapa ape' gani ilif heven, anama anona nemaf nikila' endilisi nimanimi amama ape' dei' mefa'am nogota anae'.

¹⁹ Amamaga hiami lu'wami so'umi God nanda'ami maloma ape' epes wapoti' maniga mati endilisi ea' mape mohafa nogota ape'inai ma awasi Godi anona nemaf sotaga sondawalap alihis.

²⁰ Dei' amamaga amama lu'um so'um maloma ape' epes ata' mape wafifipa, maol a'apa. Ina ape' atepa mola ukup manda'am mape, owa'. God atona nanda'apa mape na'ama nahopapa mape owina anan mape mohafa amamaga lu'wami anona nemaf na'i neanda' ma ape'ami.

²¹ Dei' amamaga awami amama hiami mowa' amamaga God nanda'ami maloma ape' epes wapoti' mowa'apa manda'apa folo'walapa aopa. Ea' anona nemaf God notofa amamaga amama awami ea' mofa' nafifili Ananinai mupe wafifipa andeande'. Mofa' amama God nandandepam mapoma wambota ananinai.

²² Ape' mogawa amamaga hiami lu'wami so'umi God nanda'ami mame' nimanimi si'i nemata'w kwa'i kola awani. Ea' amamaga amama malef kwapete' mape mafi'i mataga dei'.

²³ Ea' ina amamaga amama atom, owa'. Ape' mogawa ape' epes ananipai wapoti', God okom na'i anona nemaf owagama nigiambamapa ma mope andeande'. Ea' dei' anan nali' nase'apa Ambal Bu'unai Ananinai. Ambal Anama nase'apana etin. Ea' ape' wapoti' mame' nimanimi mawal malef mape mohafa anona nemaf God nonda'apa motaga awasi Ananipai endilisi. Nemaf anama nese'apa alop dambainai namunai.

²⁴ God nofa'apa motanimani dei' mombale'afana mape mohafana nonda'apa motaga endilisi dahama dahama ma amamaga amama bu'wami. Ea' amamaga mape mohafami matolom ea', ape' ina ata' mope mohafam wapoti', owa'. I'i enin epen niti amamaga amama nape nehafami ea', dei' maina ata' nepe nehafam wapoti'? Owa'.

²⁵ Ea' amamaga ape' ata' owa' meatulumi ape' mogawa endilisi anona nemaf mofa'ami, amama ape' ukup la'ifim mapomam ea' mape mohafam.

^26-27 Ea' Ambal Bu'unai Godi wapoti' nafi'i nagiambama ape' owa' la'ifipai nanda'apa la'ifipa. Maina nemaf ape' ukup owa' la'ifima mogawa basef amama mahali'anami, Ambal Ananinai nanda' beten nagiambamapa. Anan nanda' beten ea' anan ina nanda' beten nahali'ana ma anom basef, owa'. Nawal nalef etin nanda' beten. Ea' God nogawa ukup epesi hi'alam nogawa okom Ambal Ananinai wapoti'. Dei' main, nemaf anama Ambal Ananinai nanda' beten na'ama, Anan naila okom Godi nanda' betena ape' epes Ananipai.

²⁸ Maim amamaga ma'i meatagamapai, bu'wami awami hiami, God nanda'am manda' maol atom migiambama ape' epes ukup maimaila anani. Ape' epes nofalapa ea' ma monda' maol Ananinai mila okom Ananinai.

²⁹ Dei' main, epes isima God fowa' nogawas ea' nosahe'asa sotaga sondati na'ama etin si'i Nogalomana Ananinai ma Anan notaga nope si'i sahalomas dembinai ma esis sahin owan wambota ananinai.

³⁰ Epes isima fowa' nosahe'as ea', Anan nofalas wapoti'. Ea' isima nofalas ea'i, Anan na'i esis epes bu'wasi ananisi etis ma naep Ananimi ea' nase'as pepel nafifili ananinai ma anona nemaf seandati si'i Anan.

God okom nainailapa ina nakwahepa, owa'

³¹ Ape' mame' basefa amamaga amama bu'wami God nanda'mapami dei' muwataniam mi'imama? I'i God nagiambamapa, dei' anona nemaf ina enis la'ifisa sohambombagapa, owa'etin.

³² Anan ina umbamahanama nase'apai Nogalomana ananinai, owa'. Anan nasapa'anai nafi'i ma nagiambama ape' hiapai. Na'ama dei' anona nemaf Anan nose'apai anom amamaga hiami wapoti' moloma anan.

³³ Ape' epes nasahe'apa ea', anona nemaf emi egafis si'i ape' epes aopai manda' waf aonai? Owa'etin. God atona na'i ape' epes bu'upai andeande'.

³⁴ Anona nemaf ina enis epes sofalapa si'i ape' epes aopai ma God nogwamapa waf aonai ape'inai, owa'. Dei' main, Krais Jisas naga' notanima nohafel wapoti'. Ea' anan nape lagel da'isinai Godi nape la'ifinai ea' nanda' beten nagiambamapa wapoti'.

³⁵ Anona nemaf main de'im melefatapa ma mokwaha okom Kraisi nainailapai? I'i nimanimi motagamapa ma mofa' nimanimi ma nolomohapa, klos luwaguf maim a'apa o enis sohapa sonda'apa awepa ma i'i amamaga awami mi'i mohambombagapa, ma enis sohapa moga', anona nemaf amamaga amami melefatapa ma okom Kraisi nainailapa? Owa'etin.

³⁶ Endilisi, amamaga na'amaimi anona nemaf motagamapa si'i Baibel na'iam na'i, “Ape' mape amam nematawa Ine'ipai, amama atom dei' nimeguf hiami sa'i sohapa moga'. Satelepa si'i sipsipa sa'i sohapa moga' etin.”

³⁷ Ea' amamaga amama hapaimi. Krais anan okom nainailapa endilisi ea' la'ela'ef nanda'apa la'ifipa mikila' amamaga amama endilisi.

³⁸ Ae' egawa endilisi ina anom amamaga la'ifima anona nemaf melefatapa ma okom lu'unai Godi, owa'etin. Nemaf anama ape' moga' o mope, anan okom nainailapa la'ela'ef. Amam ensel maloma amamaga la'ifimi mamumami mape mumafi etapi, opa'wagufeh, ma'akw, naoh, ambagof awami mamumami wapoti' amamaga dei' mapani ea' anom anona nemaf migi' meatagai, amamaga la'ifimi awami,

³⁹ amamaga pepel aonai nape ilif etap owini, anom amamaga migi' meafi'i, amamaga amama hiami ina anona nemaf la'ifima melefatapa ma okom lu'unai Godi, owa'etin. Anan okom nainailapa la'ela'ef nihi'ambapa amama ma Krais Jisas Dembinai ape'inai.