Basef Amama Pol Nandaꞌam Mafeꞌma Esis Romi 7 - Basef Buꞌwami Godi

Basef womun etina waf sandaso'amainai na'ipapa dei' manda' maola waf bu'unai ma opaf dambainai

¹ Ipe' alupipei, ipe' pegawa mi'uli ma waf daso'amainai ea'. Ea' pegawa andeande'ma basef amama dei' a'ipipami. Nogota anama epen ata' nape namin, enin ata' nape owina mi'uli anama.

² Basef ofagema ma mi'uli anama amama. I'i ano'w nemata'w kwaso' amani, ma anan ata' nopan namunai, mi'uli anama ata' newa'ana naloma akwa'w ata' sape etifis. I'i waulunama'w noga', mi'uli anama newa'asi pele'atana kwape wafifi'w.

³ Ea' i'i anan aman ata' nope ambal napaina ma waulu'mana kofe' kweaso' anona aman, sofala'w si'i akwa'w kwanda' waf aonai. Ea' i'i aman akwa'unai noga', mi'uli anama ina ata' newa'as etifis wapoti', owa'. Akwa'w kwandatagah kwape wafifi'w. Esis ina si'i basefa akwa'w si'i akwa'w kwanda' so'a wauli, owa'.

⁴ Ipe' alupipei ae'ipei, ae' a'i i'ipipa basef amama ofagema. Ape' hiapai mape la'ifipa maloma Krais ea' amama atom dei' maga' ea'. Dei' mi'uli anama God fowa' nase' Mosesanai ina ata' nowa'apa la'ifipa wapoti', owa'. Ape' mape la'ifipa paloma Jisas aman God nafelona nohafel hi'agif wapoti' ea' monda' maol ananinai atona.

⁵ Fowa' ata' mape la'ela'efa opalef apimi, mi'uli anama God fowa' naso' Mosesanai nafilai ukup awami ma alop ape'inai. Ea' manda' maola waf aonai nawalapai ga'.

⁶ Ea' ape' dei' maga' maloma Krais makwaha amamaga mowa'apa la'ifipa. Ea' mi'uli anama ina ata' nowa'apa wapoti', owa'. Mape wafifipa. Dei' ape' ina ata' manda' maol maila mi'uli anama amam manda'ana nail buki, owa'. Ape' manda' maola waf dambainai Ambal Bu'unai Godi nanda'anai.

Waf aonai nahambombaga ape'

⁷ Mi'uli anama God fowa' naso' Mosesanai nape na'ama. Dei' ape' ata' mi'iam mi'imama? Mi'i mi'uli atona waf aonai o owa'? Owa'etin! Mi'uli anama God fowa' naso' Mosesanai nihi'ambe maina waf aonai ofagena ma egawana. Waf anama kowalasanai nape na'ama. Mi'uli anama na'iam na'ama na'i, “Ina kowalena ma anom amamaga anona amani, owa'.” I'i mi'uli anama owa' nihi'ambe na'ama, ae' ina egawa waf aonai kowalasanai, owa'.

⁸ Mi'uli anama si'i anama eafa waf aonai nefela okom nanda' ae' kowalema amamaga hiami. I'i mi'uli anama owa'etin, ae' waf aonai a'e.

^9-10 Fowa' gani mi'uli anama ata' owa', nogota anama ata' ape okom nase'e lolaiwi ma waf aonai. Anom nimeguf mafe'ma ea' basef ofagema ma mi'uli anama mafi'mai ae' ea' waf aonai nohafel nafe' ambal ae'anai ea' nahe aga'ma mi'uli anama. Do'ok li' God nanda' mi'uli ananinai ma nefela ambal namunai ea' ae' ine' efa' ambal namunai ma mi'uli anama, owa'. Mi'uli anama nahe aga' etin.

¹¹ Dei' main, waf aonai nasopama eafa mi'uli anama ea' nambaso'me. Mi'uli anama nafela okoma ae' nihi'ambe waf aonai nahe aga'.

¹² Ea' ape' mogawa mi'uli atona anan bo'ona andeande'. Basef amama hiami mape mi'uli anama bo'om wapoti'.

¹³ A'i mi'uli anama bu'unai nahe aga'? Owa'etin! Waf aonai atona nahe aga'. Ea' amamaga amama si'i anona eafa waf aonai nahe aga' ma waf anama aonai ofagena nataga nandawalap. Ea' mi'uli anama nihi'ambapa waf aonai ofagena, waf anama aona endilisi.

Waf aonai nembalo' ukup ape'imi

¹⁴ Ape' mogawa mi'uli anama nafi'i Ambal Bu'unai Godi nihi'ambapa okom Ananinai. Ea' ae' okom apinai nape ina aila okom Godi, owa'. Waf aonai nembale'e anda' maola waf anama aonai.

¹⁵ Ea' dei' ae' ina egawa waf ofagena anda'anai, owa'. Waf ae' okom na'ina'iana a'i enda'anai, anama ina anda'ana, owa'.

¹⁶ Okom ae'anai atona a'iam na'ama a'i aho'ma mi'uli anama bu'unai ma eme'ana ilana. Owa'etin. Ina ailana, owa'. Ae' andaiwa'ma enda' waf aonai. Ea' anda' waf anama atona.

¹⁷ Ea' ina ae' atowe anda'ana, owa'. Waf aonai nape opaf ae'anai nomon, anama atona nanda'am.

¹⁸ Ae' egawa opaf ae'anai nomon, ina anom nomonas bu'wami mape, owa'. Opaf anama apinai ae'anai atona nahambombage. Endilisi, ae' okom na'i enda' waf bu'unai atona, owa'. Ina la'ifiwi anda'ana, owa'.

^19-20 Waf bu'unai okom na'i enda'anai, anama ina anda'ana, owa'. Ea' waf aonai andaiwa'ma eanda'anai, anama atona anda'ana. Ea' ae' egawa ina ae' aila okom anda' amama, owa'. Waf aonai nape opaf ae'anai nomon, anama atona nanda'e anda'am.

²¹ Amama atom dei' ati waf na'amainai nape ae'. Okom na'i enda' waf bu'unai, ea' waf aonai nape opaf ae'anai na'ipi anda'am.

²² Okom atona ae'anai dei' nainaila endilisi mi'uli anama God fowa' naso' Mosesanai andanifamana.

²³ Ea' ati anona waf nape alop si'ina wa'ana ae'anai nomon. Ea' waf anama napa' naloma mi'uli anama nape okom ae'anai. Waf anama atona nape alop wa'ana ae'anai nembalo' ae' nanda'e anda' maola waf anama aonai.

²⁴ Ea' uwahipiwi! Ae' epen danifel a'e, okom nimaninaiwei. Emi egalin netagahowe ma opaf apinai dei' nahe aga'i?

²⁵ Ae' anifela God! Anan atona nanda' Jisas Krais Dembinai ape'inai natagahowe ape wafifiwi. Dei' ape na'ama. Okom ae'anai atona, ape owin mi'uli anama, ea' opaf apinai ape owina pepel waf aonai.