Basef Amama Pol Nandaꞌam Mafeꞌma Esis Romi 6 - Basef Buꞌwami Godi

Ape' maga' maloma Krais ea' mofa' ambal namunai malomana

¹ Enis epes sambaso'mas sa'i na'ama. Sa'i ape' monda' waf aonai la'ela'ef ma waf God nandahomapanai notaga lu'una. Ape' mi'iam na'ama o owa'?

² Owa'etin. Waf aonai atotona, dei' ape' maga'. Dei' maina ape' ata' monda' waf aonai atona? Owa'etin, hapainai.

³ Ipe' pegawa ape' emi egafipa mofa' baptaisa mape la'ifipa maloma Jisas Krais mofa' baptaisa ga' Ananinai.

⁴ Baptais anama ape' la'ifipa maloma ga' Jisasi, God nawapa maloma Krais hi'agif. Pepel bu'unai Ahalomanai atona nafela Krais nohafel hi'agif. Ea' na'ama etina ape' mohafel wapoti' mape la'ifipa manda' waf dambainai ma ambal namunai etap anae'.

Ape' mupe namipai moloma Krais mupe la'ela'ef hihif

⁵ Ape' la'ifipa maloma Kraisa ga' anama ananinai si'i Anan naga'. Ea' na'ama etin anona nemaf ape' motaga la'ifipa mohafel wapoti' molomana.

⁶ Ape' mogawa opalef apimi ape'imi maga' mail lawag usi'inai tu'wanainai maloma Krais ea' God natofa waf aonai nanda' maol nape alop ape'inai. Amama atom dei' ape' ina mape owina waf aonai wapoti', owa'.

⁷ Dei' main, anona aman naga'i, ina ata' nape owina waf aonai wapoti', owa'.

⁸ Ape' maga' maloma Krais. Ea' mogawa endilisi aona nemaf mope ambal namunai molomana wapoti'.

⁹ Ape' mogawa God nafela Krais nohafel hi'agif. Amama atom Anan ina anona nemaf noga' wapoti', owa'. Ga' ina la'ifina natofa Anan, owa'.

¹⁰ Anan naga' nemaf atotona ma waf aonai ape' manda'anai ea' ma'um. Ga' anama atona Anan nahambombaga pepel anama ma waf aonai nafe' hi'alana. Anan dei' nape ambal namunai naila okom Godi atona.

¹¹ Ea' na'ama etina ipe' wapoti' ukup mopoma ipe' pakwaha waf aonai si'i epes saga'i. Ipe' ukup mopoma ipe' pape la'ifipa paloma Krais Jisas pape namipei paloma God.

¹² Ipe' ina pi'i aho'ma waf aonai nope notaga la'ifina numafi ipe', owa'. Na'ama waf anama aonai nohonde'epa ea' pila waf alop atonai.

¹³ Ipe' ina pese' lagof bo'wagah ipe'imi mefe'ma penda' waf aonai, owa'. Pese' ipe' pefe'ma God atona moloma ukup ipe'imi hi'ilama anan atona si'i epes sotanima sohafel hi'agif wapoti' sape namisi. Ipe' pese'ana alop wa'ana hi'ilana Goda penda' waf bu'unai.

¹⁴ Ipe' pegawa waf aonai ina ata' nape lu'unama ipe' wapoti', owa'. Dei' main, ipe' dei' ina ata' pape owina mi'uli anama God fowa' naso' Mosesanai ma pilana, owa'. Ipe' pape owina waf Godi atona okom nainailapa ma nandahomapa.

Ape' dei' mape manda' maola waf bu'unai

¹⁵ Ea' dei' ape' ata' monda'am mi'imama? Ape' ina mape owina mi'uli anama God fowa naso' Mosesanai, owa'. Ape' dei' mape owina waf anama God nandahomapa etin. Ea' dei' ape' monda' waf aonai? Owa'etin endilisi!

¹⁶ I'i ipe' pese' ipe' etipa penda' maol pepe owina aman emi, ipe' la'ifipa ma pilana. I'i ipe' pese' opalefa waf aonai, ipe' pape owina waf anama nonda'epa pega'. Ea' i'i ipe' pese' opalefa waf bu'unai pepe owina God petaga bu'upei ma naep ananimi.

¹⁷ Endilisi, fowa' ipe' pape owina waf aonai nanda'epa panda'ana. Ea' God nanda'epa pape owina basef ananimi pailam ea' pase'ana opalef hi'alama paila basef amama ipe' pefa'ami. Ea' ape' manifela God.

¹⁸ Anan natagahepa ma pepel waf aonai, dei' pataga epes panda' maol pape owina waf bu'unai natagahepa ma waf aonai.

¹⁹ Ukup ipe'imi ina dei' la'ifim, owa'. Amama atom dei' aila ukup ape' epesi a'iam alihim a'i. Fowa' ipe' ata' pase' alop ipe'inai wa'ana pape owina waf aonai naninani naloma waf hianai sosambala mi'uli Godi ea' nandepa panda'ana. Ea' dei' peso' alop wa'ana hi'ilana pepe owina waf bu'unai ma pepe epes Godi etipa.

²⁰ Fowa' ipe' ata' pape owina waf aonai, nogota anama ipe' ata' pape peloloma waf bu'unai.

²¹ Ipe' pefa' amamaga maim bu'wami ma waf aonai fowa' panda'anai, ma dei' ipe' ambagof aoma waf anama? Owa'etin. Waf anama nawalapai ga' atona.

²² Ea' dei' God natagahepa ma waf aonai nanda'epa pape panda' maola anan pape owina anan la'ela'ef. Maol anama nola gwa'aimi amama. Ipe' pepe bo'wepa ananipei etipa ma pefa' ambal namunai pepe andeande' la'ela'ef.

²³ Waf aonai nagwamasa awami ma isima sanda' maola waf aonai. Awami amama. Esis anona nemaf soga' etin higililas. Ea' God dei' nase'apai presen bu'unai etin, anama ambal namunai nape la'ela'efi ma mope la'ifipa moloma Krais Jisas.