Basef Amama Pol Nandaꞌam Mafeꞌma Esis Romi 5 - Basef Buꞌwami Godi

God na'i ape' epes bu'upai

¹ Basef ofagema mape mali'i amama, bale'ef ape'inai atona dei' God nofalapa epes bu'upai. Amama atom dei' Dembinai ape'inai Jisas Krais nanda'apa mape opalef etifim awanem maloma God.

² Anan atona eafa ape' mombale'efana mope nomona okom Godi nainaila ape' endilisi nandahomapa nefa'apai dei' mape andeande'. Ape' mogawa endilisi mape mohafa anona nemaf God nofa'apa mope molomana miti nafifili Ananinai. Bale'ef anama nanda'apa mandanifel ma amama.

³ Ape' ina mandanifela amama atom, owa'. Ape' mandanifela nimanimi meatagamapa wapoti'. Dei' main, ape' mogawa mofa'ama monda'apa la'ifipa.

⁴ I'i ape' mitu la'ifipama amamaga amama meagwamba ape'i, God ni'i aho'mapa. Amama atom dei' ape' mogawa endilisi Anan naila basef ananimi andeande' ma nigiambamapa mope mohafa nafifili pepel ananinai anona nemaf neatagai.

⁵ I'i ape' mogawa endilisi na'ama, bale'ef ape'inai ina anona nemaf hegililana, owa'. Dei' main, God nase'apa Ambal Bu'unai Ananinai ea' waf okom nainailapa nape lu'una opalef ape'imi.

⁶ Amama na'ama. Fowa' ape' ina la'ifipa ma monda' waf bu'unai, nogota anama God nandandepana Krais naga'ma ape' mowa' alafugaha Godi.

⁷ Ipe' ukup mape ma'imama? Enin epen na'i nega'ma nigiambama emi egalin na'i nila mi'uli Godi? A'i ina enis si'i a'e, owa'. Ea' i'i enin epen bo'wen endilisi, enin wila ma nega' nigiambama enin epen bu'wani.

⁸ Ape' ata' manda' waf aonai, Krais naga' nagiambamapa. Ea' dei' God nihi'ambapa okom lu'unai nainaila ape' nandawalap alihina.

⁹ Anan naga' esimbel ananimi malo dei' God nofalapa epes bu'upai. Amama atom dei' ape' mogawa endilisi Krais natagahepa ma okom wandafunai Godi.

¹⁰ Fowa' ape' ata' mape naumbih Godi, ea' dei' nanda'apa mataga alupipai ananipai opalef etifim malomana. Anan nanda'am na'ama ma Nogalomana Ananinai naga'ma ape'. Amama atom dei' ape' mape alupipai Godi mogawa endilisi Krais nape namona ma anona nemaf nofa'apa motanimani mofe' molomana mope.

¹¹ Ea' ina amama atom, owa'. Ape' mandanifel ma God. Dei' main? Fowa' ape' mape naumbih Ananipai ea' dei' Dembinai ape'inai Jisas Krais nali'amona naumbih ape'imi nanda'apa mataga alupipai malomana. Ea' dei' mandanifel ma Anan.

Adam nawalapai ga', ea' Jisas nawalapai ambal namunai

¹² Ape' mogawa amama. Aman atotona nali' nanda' waf aonai, dei' waf aonai nape opalef amam nematawa etapasi hiesi. Ea' dei' waf aonai nefa'ai ga' nafi'i, dei' ga' naha epes hiesi saga'. Dei' main, epes hiesi sanda' waf aonai.

¹³ Fowa' gani nogota anama God ata' owa' nose'anai mi'uli Ananinai Moses, waf aonai nali' nataga nape etap anae'. I'i basefa mi'uli anama owa'etin, dei' God ina nawaloga epesa waf aonai esis sanda'anai, owa'.

¹⁴ Ea' ga' nataga nape nogota anama Adami nafi'i nataga nogota Mosesi. Epes isima hiesi ina sogawa mi'uli God fowa' naso' Mosesanai, owa'. Ea' ga' natagamas saga' hi'alas. Fowa' God nase'ana mi'uli Ananinai Adam, ea' Adam natopa'ana. Enis epes ina satopa'ana si'i Adam natopa'ana, owa'. Ea' ga' natagamas saga' wapoti'. Aman anama Adam nanda' ikwafa aman anona nemaf neatagai.

¹⁵ Waf God nandahomapa anai ma Jisas Krais naloma waf aonai Adam nanda'anai ina na'ama etin, owa'. Aman anama Adam atotona nanda' waf aonai, dei' nanda' epes hiesi saga'. Ea' God nandahomapa, waf anama nataga lu'una endilisi ma aman atotona Jisas Krais. Ea' ape' dei' mofa' amamaga amama presen Godi nikila' ga' anama ea' nataga lu'una endilisi ma nandahoma epes hiesi.

¹⁶ Waf bu'unai God nandahomapa anai anama ina nape etifigin naloma waf aonai aman anama atotona nanda'anai, owa'. Aman anama nanda' waf atotona aonai. Ea' God nawalogapa epes hiapai na'i, “Ipe' awepa hi'alepa endilisi.” Ape' manda' waf aonai hianai ea' God okom nainailapa nandahomapa na'i ape' epes bu'upai.

¹⁷ Aman anama atotona nanda' waf aonai. Amama atom dei' ga' nataga ma epes hiesi ma aman anama atona. Ea' maol aman anama atotona Jisas Krais nanda'anai lu'una endilisi nikila' ga' ma nagiambama epes isima hiesi. Epes isima owagama sope namisi ma sope dembesi si'i king. Epes isima God nandahomas endilisi.

¹⁸ Dei' ape' mape na'ama. Fowa' waf aonai atotona nanda' ape' hiapai higilalapa. Ea' na'ama etin waf bu'unai atotona natagahepa ma waf aonai nanda'apa dei' mape namepa.

¹⁹ Aman atotona nosambala basef Godi dei' ape' hiapai mape manda' waf aonai. Ea' na'ama etin aman bu'unai atotona naila basef amama andeande' dei' ape' hiapai mataga epes bu'upai ma naep Godi.

²⁰ Ea' mi'uli anama God fowa' naso' Mosesanai natagama esis sogawa waf esis sanda'anai aona satopa' mi'uli anama. Ea' esis ina sakwaha waf anama aonai, owa'. Sanda'ana hianai endilisi. Ea' eaf God nandahomasanai nataga lu'una endilisi ma esis.

²¹ Fowa' waf aonai nataga lu'una ma ape' hiapai dei' maga'. Ea' dei' waf God nandahomapa anai nikila' waf anama aonai. Anan nandahomapa ea' nofalapa amam nematawa bu'upai ma mofa' ambal namunai nape la'ela'ef ma Dembinai ape'inai Jisas Krais.