Basef Amama Pol Nandaꞌam Mafeꞌma Esis Romi 4 - Basef Buꞌwami Godi

God na'i Abraham nembale'efana endilisi dei' nataga epen bu'unai

¹ Ape' mi'i basefa Abraham akunamapa ape' Judai mi'imama? Anan nanda' maina God na'i anan epen bu'unai?

² Endilisi Abraham ina nataga epen bu'unai ma nanda' maol bu'unai, owa'. Ea' ina nafela agel ananinai lu'una ma naep Godi, owa'. Anan nembale'efa God na'i epen bu'unai.

³ Baibel na'iam na'imama? Na'iam na'ama na'i, “Abraham nombale'efa God ea' God nati bale'ef ananinai na'i anan epen bu'unai.”

⁴ Ape' mogawa epes sanda' maoli ma sofa' amamaga ma maol sanda'anai, amamaga amama ina mi'iam mi'i mofa'am etin si'i presen, owa'. Amama amamaga satopa' maolami.

⁵ Na'ama God ina nati maol bu'unai epes sanda'anai ma ni'i esis epes bu'wasi, owa'. Anan nati emi egafis sembale'efana la'ifisi ma nefalas sanda' waf aonai sataga epes bu'wasi. Ea' God nati bale'ef asasinai dei' na'i esis epes bu'wasi.

⁶ Fowa' Devit wapoti' nanda' anom basef mail buk Baibela emi egafis God natilis na'i epes bu'wasi, isima sandanifel. Esis ina sanda' maol, owa'. Sembale'efana etin dei' na'i esis epes bu'wasi.

⁷ Devit nanda' basef amama na'i, “Emi egafis God nakwaha waf aonai esis sanda'anai, epes isima sandanifel.

⁸ Emi egafis Dembinai owa' okom nopoma waf aonai esis sanda'anai isima sandanifel.”

⁹ Epes isima Devit na'i sandanifel, epes isima satopa' alopi etis? Owa'etin. Isima owa' seatopa' alopi wapoti'. Dei' main, do'ok ae' a'ipipa Baibel na'i na'ama na'i, “Abraham nembale'efa God ea' God nati bale'ef ananinai na'i anan epen bu'unai.”

¹⁰ Dei' Abraham nape na'imama God okom napomana na'i epen bu'unai? Anan nali' natopa' alop ea' o ata' owa' neatopa' alop? Anan ina dei' natopa' alopa God na'i anan epen bu'unai, ata' owa'.

¹¹ Fowa' gani Abraham nali' nembale'efa God nofalana epen bu'unai. Ea' nagi' natopa' alop. Waf anama natopa' alopanai anona ikwaf God nihi'ambana na'ama na'i nemaf anama ata' owa' neatopa' alopanai God na'i anan epen bu'unai. Amama atom dei' anan nataga akunamas epes hiesi sombale'efa Godi owa' seatopa' alopi. Esis sembale'efa God atona dei' nofalas epes bu'wasi.

¹² Ea' anan akunamas epes isima Juda satopa' alopi wapoti'. Ea' esis ina satopa' alop atona, owa'. Esis saila bo'wagah Abrahami sombale'efa God si'i fowa' anan nembale'efana nogota anama ata' owa' neatopa' alop.

Basef endilisimi God na'iam naloma epes hiesi sembale'efanai

¹³ Fowa' gani God na'i basef endilisimi atom naloma Abraham na'i, “Ae' anona nemaf ese'ena etap hiagoma ine' neloma esis bafasena akusena ine'isi wapoti'.” Na'ama Abraham ina naila mi'uli anama God na'i noso' Mosesanai ma dei' na'i basef endilisimi nalomana na'ipana basef amama, ata' owa'. Abraham nali' nembale'efa God dei' nofalana epen bu'unai na'ipana basef amama.

¹⁴ Anom basef ma'ipapa amama mali'i na'ama ma'i, I'i epes sila mi'uli Godi ma sofa' amamaga amama God nease'asami, anona nemaf waf anama mombale'efa Godi nowala ea' basef endilisimi amama God na'iam nalomas wapoti' owa' la'ifim, owa'.

¹⁵ Dei' main, mi'uli anama nawalapa okom wandafunai Godi ma nose'as nemanimi isima sosambala basefa mi'uli anama. I'i ape' owa' mila basefa mi'uli anama, God okom wandafunai napomapa. I'i mi'uli anama owa', God ina ni'i epes sumbisila' mi'uli anama satopa'ana, owa'.

¹⁶ Abraham nembale'efa God. Amama atom dei' God na'ipana basef amama endilisimi atom bu'wami ma ape' mogawa endilisi God na'ipas basef amama wapoti' na'i ape' hiapai bafalomapa Abrahami, nase'apam etin si'i presen. Ina nase'asa epes isima saila mi'uli anama atona, owa'. Emi egafis sembale'efa God na'ama etin si'i Abrahami, esis wapoti'. Anan nali' nembale'efa God nataga bafalomapa nali' endilisi ma ape' hiapai emi egafipa dei' magi' membale'efa God.

¹⁷ Si'i Baibel na'i, God fowa' gani na'ipa Abraham na'i, “Ae' enda'ena nepe bafalomasa epes hiesi.” Abraham anan bafalomapa ape'inai ma naep Godi. Anan nembale'efa God atona nase'asa ambal namunai epes saga'i, ea' nofala amamaga hiami ata' owa' meatagai si'i mataga mape ea'.

¹⁸ Abraham ina dei' nati amamaga amama God na'ipanam na'i neanda'ami. Ea' anan nembale'ef endilisi si'i natolom ea'. Amama atom dei' nataga “Bafalomas esis amam nematawa hiesi.” Si'i fowa' God na'iam na'i, “Anona nemaf owagama epes hiesi wambota ine'inai sotaga na'ama.”

^19-20 Abraham hagona felefele'ma afagof 100-peleim, alop ananinai nowafa si'i naga'i. Ea' waulu'mana Sara hage'w wapoti' asa'w ina la'ifikwa kola awasi, owa'. Abraham okom napoma amama, ea' bale'ef ananinai ina nowala, owa'. Anan nembale'ef la'ifina ma basef God na'i endilisimi nalomana ma amamaga anona nemaf migi' meatagai. Bale'ef atona nanda'ana la'ifina ea' nafela agel Godi lu'una.

²¹ Anan nembale'efa God endilisi ma nogawa Anan la'ifinai ma nonda'am na'ama si'i fowa' na'i nonda'ama basef amama endilisimi.

²² Amama atom God okom napoma bale'ef ananinai ea' na'i, “Anan epen bu'unai.”

²³ Fowa' anona profet nanda' basef amama mape Baibeli ma'i na'ama ma'i, “God okom napoma anan epen bu'unai.” Amam profet ina manda' basef amama ma Abraham atona, owa'.

²⁴ Manda'ama ape' wapoti'. Ape' membale'efa God nafela Jisas Dembinai ape'inai nohafel hi'agif. Amama atom God nati bale'ef ape'inai ea' na'i ape' epes bu'upai.

²⁵ God nasapa' Jisas nafi'i naga'ma nakwaha waf aonai ape' manda'anai. Ea' nafelona hi'agifa na'i ape' epes bu'upai.