Basef Amama Pol Nandaꞌam Mafeꞌma Esis Romi 3 - Basef Buꞌwami Godi

God naila basef Ananimi atom

¹ Dei' esis Juda sikila' enis epes owa' Judaisi ma maina waf bu'unai? Maina waf bu'unai natagama waf anama satopa' alopanai?

² Waf bu'unai hianai natagamana. Waf nali'i anama. God nali' nase'asa basef Ananimi endilisimi atom esis Juda ma sumafiam silam.

³ Endilisi, enis ina sombale'efa basef amama andeande'. Ea' dei' ata' si'i main? A'i waf anama aonai esis sanda'anai anona nemaf nonda' God nokwaha basef endilisimi Ananimi?

⁴ Owa'etin. Ape' mi'i basef mi'i, epes hiesi sambaso'ami, ea' God atona na'i basef endilisimi la'ela'ef nanda' maol andeande' si'i Baibel na'iam, “Amam nematawa hiesi seme' basef ine'imi si'i endilisimi atom. Nemaf anama enis epes si'i sonda'mena basef, ine' nikila'as.”

^5-6 Dei' i'ipipa anom basef ape' epes ukup ma'iami. Basef amama na'ama. Dei' ata' mama? I'i waf aonai ape' manda'anai nawalapa waf bu'unai Godi nataga alihina, ape' nambimb mi'iam mi'imama? Mi'i God nanda' waf aonai okom wandafunai nogwamapa waf aonai ape' manda'anai? Owa'etin. I'i God nonda' waf aonai, dei' Anan nowaloga waf amam nematawa hiesi sanda'anai ma main? Owa'etin.

⁷ Enis epes ukup ma'i etin sambaso'am sa'i na'ama sa'i, “I'i epes hiesi siti waf aonai ape' manda'anai noloma waf Godi endilisinai ma sowalogana, sogawa waf Godi nikila' waf ape' manda'anai. Ea' waf ape' manda'anai nawalapa agel Godi lu'una. Ea' na'ama God ina nambimb nogwamapa waf aonai ape' manda'anai, owa'.” Owa'etin. Epes isima sambaso'ami.

⁸ I'i ape' mila basef amama baso'maimi, mefe' mefe' mi'i, “Awi, ape' monda' waf aonai ma muwalapai waf bu'unai Godi.” Endilisi, enis epes sambaso'am sa'i basef findiwama ae' sa'i ae' a'iam na'ama. Owa'etin. Epes isima sa'i basef amama, anona nemaf God nogwamasa waf aonai esis sanda'anai.

Ina enin epen bo'wen andeande' nape, owa'etin

⁹ Dei' si'i main? Basef amama do'okimi ma'i main? Ma'i ape' Juda mikila' enis epes owa' Judaisi ma waf bu'unai? Owa'etin. Ae' ihi'ambepa basef ea', waf aonai nase'ala ape' hiapai, esis Juda saloma isima owa' Judaisi wapoti'.

¹⁰ Baibel na'i na'ama na'i, “Ina enin epen bo'wen andeande' nape, owa'etin.

¹¹ Ina enin epen negawa waf bu'unai. Ina enin epen nanda' maol nagolopa God, owa'.

¹² Epes hiesi sololama eaf bu'unai sataga epes sanda' waf aonai. Ina enin epen nanda' waf bu'unai, owa'. Ina enin atitin bo'wen.

¹³ Malogof asasimi mandahama si'i hi'agilif sawa epes saga'i, mindihianama alihim mape. Esis sa'i basef hiami baso'maimi maloma basef hiami mamumami ma sahambombaga enis epes si'i numbut nape igufi naha epes saga'i.

¹⁴ La'ela'ef ukup asasimi wandafum endilisi sa'i basef awami atoma sase'a nimanimi enis epes.

¹⁵ Esis mehip saha enis epes saga'.

¹⁶ La'ela'ef sahambombaga epes hiesi sase'asa nimanimi hiami.

¹⁷ Opalef asasimi ina mape awanem seape opalef atifim soloma enis epes, owa'.

¹⁸ Esis ina ukup maimaila God umbamahasana ma saila waf Ananinai, owa'.”

¹⁹ Ea' dei' ape' mogawa maim basef Godi mape mi'uli Anan fowa' naso' Mosesanai na'i ape' Juda mope owina mi'uli anama milana. Ea' ina la'ifipa mailana andeande', owa'. Ea' ina enin epen la'ifina ni'i, “Ae' epen bu'uwei andeande',” owa'etin. Ape' epes hiapai ganima hiagoma, ofagema mapoma ape' ma naep Godi anona nemaf nowaloga ape' nowalapa waf aonai ape' manda'anai.

²⁰ Dei' main, waf anama maila mi'uli anama, owa' enin epen atitin anona nemaf nefa' agel epen bu'unai andeande' ma naep Godi, owa'. Mi'uli anama nihi'ambapa waf aonai ape' manda'anai.

Emi egafis sembale'efa Kraisi, esis agof mataga epes bu'wasi Godi

²¹ Ea' dei' waf bu'unai Godi nataga alihiguma nandawalap. Anama ina nataga nagi'ma waf saila mi'uli fowa' gani God naso' Mosesanai, owa'. Anama nataga anona eaf na'ama. Basef hiami Godi mail buki mawalapai waf anama. Anom mail mi'uli anama God fowa' naso' Mosesanai ea' anom amam profet hiami manda'anai.

²² Waf anama na'ama. Emi egafis sembale'efa Jisas Kraisi, isima God nofalas na'i epes bu'wasi. Ea' ape' epes hiapai mombale'efa Kraisi, God nanda'apa na'ama etin, esis Juda saloma isima owa' Judaisi wapoti'.

²³ Ape' epes hiapai manda' waf aonai mumbisila' mi'uli Godi ea' ina la'ifipama anona nemaf muti mafifili bu'unai Ananinai, owa'.

²⁴ Ea' God nati ape' uwahipipa nandahomapa. Ape' mombale'efa Krais Jisas ea' God na'i ape' epes bu'upai. Ape' ina mase'ana anom amamaga matalona, owa'. Anan nagiambamapa ma Krais Jisas ea' natagahepa natalapa ma mape wafifipa.

²⁵ God nihi'ambasana Krais Jisas alihina ma amam nematawa hiesi na'ama. Anan naga' esimbel ananimi malo mali'amona okom wandafunai Godi ma nakwaha waf aonai emi egafis sembale'efanai. Ga' Krais Jisasi atona dei' God nihi'ambapa waf bu'unai na'ama. Fowa' nanda' esis amam nematawa sa'osa'ombemas ea' ina nogwamasa waf aonai esis sanda'anai, owa'.

²⁶ Anan nanda'am na'ama ma nogwamasa waf aonai esis sanda'anai ma dei' nihi'ambapa waf bu'unai ananinai nataga alihiguma. Amama atom dei' ape' mogawa Anan bu'unai endilisi na'i emi egafis sembale'efa Jisasi sataga epes bu'wasi.

²⁷ Ea' dei' ape' eaf a'apa ma mefela agof ape'imi atom lu'um, owa'. Eaf anama ea' naso'. Main de'im mahefa eaf anama? A'i waf anama maila mi'uli God naso' Mosesanai? Owa'etin! Waf mombale'efa Jisasanai atona nahopa eaf anama.

²⁸ Ape' mogawa emi egafis sembale'efa Jisas atona, God na'i esis sataga epes bu'wasi andeande'. Ea' esis ina saila mi'uli anama God fowa' naso' Mosesanai, owa'.

²⁹ Dei' mama? A'i God Anan Dembinai esis Judai atona? Owa'etin. Anan Dembinai esis isima owa' Judaisi wapoti'.

³⁰ Dei' main, God anan anama atona. Anan na'i basef atifim mafe'ma epes hiesi. Emi egafis sembale'efa Krais Jisasi, nambimb God ni'i esis epes bu'wasi andeande, esis Juda saila waf satopa' alopanai saloma isima owa' Judaisi wapoti'.

³¹ Amama atom dei' bale'ef anama ape' ina mi'i ape' matopa' basefa mi'uli anama God fowa' naso' Mosesanai, owa'. Ape' mombale'efa Krais Jisas dei' mawalapa basef ofagema ma mi'uli anama.