Basef Amama Pol Nandaꞌam Mafeꞌma Esis Romi 2 - Basef Buꞌwami Godi

Basefa kot God anona nemaf nonda'masana notaga alihina bo'ona endilisi

¹ Ipe' emi egafipa pa'i enis epes sanda' waf aonai, ofagema ipe'imi atom. Peme', ipe' pa'i basef na'ama, ipe' wapoti' panda'am si'i esis sanda'am. Dei' main, isima ipe' pa'i basef na'ama, ipa panda' waf aonai si'i pa'i esis sanda'anai.

² Ape' mogawa God anona nemaf nonda' kotima epes sanda' waf anama aonai ma basef endilisimi atom.

³ Ipe' emi egafipa pa'i enis epes sanda' waf naninani aonai, ipe' wapoti' panda' waf anama. Dei' ipe' ukup mape ma'imama? Ipe' anona nemaf la'ifipama pindihi'ama basef God nonda' kotimasami pefa' pefe'? Owa'etin.

⁴ God nanda'epa andeande' endilisi, ea' ata' nape nohafepa nogota launai, ina nagwamepa waf aonai nase'epa nimanimi ulal, owa'. Waf anama bu'unai Godi ipe' ukup ma'i falafunai? Anan nanda'mepa waf anama bu'unai ma ata' pemboma opalef. A'i ipe' pegawa amama?

⁵ Ipe' pesambala basefi, dei' ina ata' pamboma opalef, owa'. Ipe' petagama nimanimi lu'wami mupei'ipa. Ama nemaf okom wandafunai Godi notaga alihina ma kot nowaloga epes hiesi ma basef endilisimi ananimi.

⁶ “Nemaf anama anan nowalogamasa waf epesi atona etin, nogwamasana nondahama waf esis sanda'anai.”

⁷ Enis epes sape la'ifis la'ela'efa waf bu'unai sagolopa eafa sofa' agof lu'wami, siti nafifili ma sope andeande' la'ela'ef. Epes isima God anona nemaf nonda'as sope andeande' la'ela'ef.

⁸ Ea' enis ukup mapoma esis etis sowa' alafugaha basef endilisimi saila waf aonai. Epes isima anona nemaf God okom wandafuna endilisi nindaiwa'masa waf aonai esis sanda'anai.

⁹ Epes isima hiesi sanda' waf aonai anona nemaf nimanimi lu'wami motagamas. Esis Juda sili' ea' isima owa' Judaisi wapoti' sigi' solomas.

¹⁰ Ea' God anona nemaf nose'asa pe bu'unai ma nafifili noloma agof lu'wami moloma opalef awanemi epes isima hiesi sanda' waf bu'unai. Esis Juda sili' ea' isima owa' Judaisi sigi'.

¹¹ Dei' main, Anan nowaloga epes hiesi ma ikwaf bu'unai atona.

¹² Anan okom na'i na'ama. Emi egafis owa' seagawa mi'uli God fowa' naso' Mosesanai, esis sanda' waf aonai, anona nemaf higililas. Ea' epes Juda sogawa mi'uli anama ea'i ma dei' sanda' waf aonai, anona nemaf nowalogasa mi'uli anama atona.

¹³ Ina epes isima same' mi'uli etini sataga bo'wes andeande'ma naep Godi, owa'. Emi egafis same' basefa saila mi'uli anama, amama atom anona nemaf God ni'i esis bo'wes andeande'.

¹⁴ Epes isima ina Judaisi, waf asasinai na'ama. Esis mi'uli a'as, ea' maina nemaf saila basef mape nomon opalef asasimi, waf anama nataga si'i mi'uli asasinai. Esis mi'uli Godi a'as, ea' endilisi saila waf anama ma opalef asasimi.

¹⁵ Waf anama asasinai nihi'ambapa basefa mi'uli anama mape ukup asasimi. Ea' basef mape opalef asasimi nomon, amama wapoti' mihi'ambapa na'ama etin. Dei' main, ukup asasimi ma'iam mihi'ambas alihim na'ama. Anom nimeguf manda' kotimasa waf aonai esis sanda'anai ea' anom nimeguf ukup asasimi ma'i andeande' na'ama etin si'i waf esis sanda'anai.

¹⁶ Amama anona nemaf motaga na'ama etina nemaf anama God nowaloga waf hianai epes hiesi sanda'anai. Nemaf anama Anan ni'i wila ma Jisas Krais nope dembinai nogwaloga waf hianai asasinai nandambahi'i noloma basef sa'iam sambahe'ami. Basef bu'wami Godi ae' awalapami amama atom.

Esis Juda sombale'efa mi'uli anama God fowa' naso' Mosesanai sa'i mi'uli anama anona nemaf nigiambamas

¹⁷ Ipe' pefala pa'i ipe' Juda pembale'efa mi'uli anama fowa' God naso' Mosesanai la'ifipa nigiambamepa pihi'ama okom wandafunai Godi. Ea' ipe' pefela agof ipe'imi pa'i, “Ape' mogawa God endilisinai.”

¹⁸ Ea' ipe' pegawa okom God na'i penda'ana ma pila waf mi'uli anama ma ukup mi'i waf bu'unai pilana.

¹⁹ Ipe' pegawana pa'i ipe' epes pegawa basef Godi ma pi'ipa epes isima naep maso'asi ea' pape si'i nagwapina epes isima sape akoti ma pihi'ambas.

²⁰ Ipe' epes gawaipei pawalipa isima gawa a'asi saloma enis epes owa' Judaisi sape si'i awasi ata' sa'wisi. Dei' main, ipe' pegawa pa'i basef endilisimi hiami maloma gawa hianai nape mi'uli anama pelafana pegawana.

²¹ Basef amama atom hiami mali'i dei' motanima mila ipe'. Ipe' pawalipa enis epes ea' ipe' owa' ata' pili' piwalipa ipe' etipa? Ipe' pawalipasa basef enis epes pa'i, “Ipe' ina penda' wal, owa'”, ea' ae' a'i ipe' wapoti' panda' wali?

²² Ipe' pawalipasa basef ma enis epes pa'i, “Ipe' ina pehambombaga waf daso'amainai, owa'.” Ea' ipe' wapoti' panda' waf anama aonai? Ipe' pandaiwa'ma god baso'omainai ea' pakowalopam amamaga ma'oh ifagw epes sanda' lotuma god anama baso'omainai. Na'ama ina andeande', owa'.

²³ Ipe' pefela agof ipe'imi atom lu'um pa'i, “Ape' mogawa mi'uli Godi fowa' naso' Mosesanai.” Ea' ipe' pimbisila' mi'uli anama panda' waf anama atona dei' pahambombaga agel Godi.

²⁴ Waf ipe' panda'anai aona si'i basef mail buki ma'iam ma'i, “Ofagema ipe' Judai atom, dei' esis owa' Judaisi sa'i basef sanda' agel Godi findiwana.”

Waf satopa' alopanai ina nagiambama epes, owa'. Sombale'efa God atona sotaga dambaisi

²⁵ I'i ipe' Juda pembale'efa mi'uli anama God fowa' naso' Mosesanai pilana endilisi, waf anama patopa' alopanai bu'unai. Ea' i'i ipe' pimbisila' mi'uli anama, petaga si'i epes owa' Judaisi ea' petaga na'ama etin si'i ipe' owa' peatopa' alopi.

²⁶ Epes isima owa' Judaisi seatopa'masa alopi, esis sape na'ama. I'i esis sila waf anama hianai bu'unai ma mi'uli anama, nambimb sogawa God sotaga si'i isima satopa'mas alopi ma naep Godi.

²⁷ Endilisi esis owa' Judaisi nambimb sofa' basef mila ipe' Juda. Dei' main, ipe' pegawa mi'uli anama Godi nape buki ea' patopa' alop ipe'inai ea' pimbisila' mi'uli anama. Ea' esis isima owa' seatopa' alopi saila mi'uli anama.

²⁸ I'i ipe' epes Judaipei patopa' alop atona, ipe' ina Juda endilisipei, owa'. Ea' waf anama patopa' alopanai ina waf endilisinai ma ipe', owa'.

²⁹ Ipe' epes hipei Juda. I'i opalef ipe'imi motaga dambaim, ipe' Juda endilisipei. Waf patopa' alopanai, God nanda'ana opalef ipe'imi nomon. Amama ina matagama basefa mi'uli nail buki, owa'. Ambal Godi atona nanda'am. Emi egafis senda'am na'ama, esis agof a'asa naep epesi. Ea' esis agof lu'uma naep Godi atom.