Basef Amama Pol Nandaꞌam Mafeꞌma Esis Romi 16 - Basef Buꞌwami Godi

Pol na'ipasa nemaf bu'unai amam nematawa hiesi

¹ Ae' a'ipipa ma pimafi Fibi andeande', akwa'w heniti'mafa afa'ikwi kwanda' maol kwagiambama esis Kristen sape Senkria.

² Fibi kwape la'ifikwa Dembinai. Ea' ipe' peso' opalefa akwa'w si'i waf bu'unai ape' amam nematawa Godi manda'anai. I'i akwa'w okom nimanina ma anom amamaga, ipe' pigiambama'w. Dei' main, akwa'w kwagiambama ae' wapoti'.

³ Ipe' penda'mas nemaf bu'unai Akwila naloma waulu'mana Prisila ea' pi'ipaso danifel ae'anai. Esis bias ape' mandao'oma manda' maol etin Krais Jisasi. Fowa' esis sandandombol endilisi ma sagiambama ae'. Nemaf anama enis sa'i sehe, esis ina umbamahas, owa'.

⁴ Sa'i awi ma soga' sigiambama ae' epe namowe. Ea' ina ae' atowe anifela esis bias, owa'etin. Esis Kristen hiesi fowa' sololama Godi wapoti', sanifelis.

⁵ Ea' ipe' pese'asa nemaf bu'unai ma danifela ae'anai esis Kristen isima safe' sandatama etifigin sape ipat asasinai. Ea' pi'ipago Epainetus nemaf bu'unai ae'anai anan alupunai ae'anai endilisi. Anan nali' nombale'ef Krais nali'ma epes hiesi etap hiagoma Esia.

⁶ Ipe' penda'makwago nemaf bu'unai Maria. Akwa'w kwanda' maol lu'unai ma kwagiambamepa.

⁷ Ipe' pese'amo danifel noloma nemaf bu'unai ae'anai ma amam amama Andronikus noloma Junias, amam wapoti' Judaimi si'i ae'. Amam manda' kalabus maloma ae'i. Amam aposel ma'i amam biam manda' maol bu'unai Godi. Amam mali'ma ae' mombale'efa Krais.

⁸ Ipe' pi'ipago Ampliatusa nemaf bu'unai ma danifel ae'anai. Anan alupunai ae'anai endilisi ma nape la'ifinama Dembinai.

⁹ Pi'ipago Urbanus nemaf bu'unai ae'anai, anan nanda' maol atotona naloma ae' ma maol Kraisi. Ea' i'ipago Stakisa nemaf bu'unai wapoti'. Anan alupunai ae'anai endilisi.

¹⁰ Ea' pi'ipago Apelesa nemaf bu'unai ae'anai, anan agel nandawalapana naila Krais endilisi. Pi'ipasago danifel ma nemaf bu'unai ae'anai ma esis sape ipat atotonai Aristobulusi.

¹¹ Pi'ipago Herodiona nemaf bu'unai ae'anai, anan Juda wapoti' si'i ae'. Pi'ipasago danifel ma nemaf bu'unai ae'anai esis wambota atotona Narsisusi sombale'efa Dembinai.

¹² Pi'ipawago nemaf bu'unai ae'anai ma Trifina kwaloma Trifosa, awo biawa wanda' maol lu'unai Dembinai. Pese'akw nemaf bu'unai ae'anai ma Persis, akwa'w alupu'wi ae'akwi endilisi, kwanda' maol lu'unai ma Dembinai.

¹³ Pi'ipago Rufusa nemaf bu'unai anan epen bu'unai naloma mama'wana anani'wi ae' wapoti' efala'w mama'we.

¹⁴ Pi'ipasago danifel ae'anai ma nemaf bu'unai ma Asinkritus, Flegon, Hermes, Patrobas, maloma Hermas, ea' esis Kristen sape saloma esis.

¹⁵ Ipe' pi'ipasago nemaf bu'unai neloma danifel ae'anai ma Filologus noloma Julia, ea' Nereus noloma heniti'mana anani'wi, ea' Olimpas, soloma esis amam nematawa hiesi Godi sape saloma esisi.

¹⁶ Waf anama ape' amam nematawa Godi, ipe' hipei atona etin pese'asa lagof esis sahin owan hiesi pinifelis. Amam nematawa Kristen hiesi sape na'ae sanda'mepago nemaf bu'unai sandanifamepa.

Enis epes sanda' esis Kristen sandawal biefis sanda'as awes

¹⁷ Alupipei, ae' a'ipipa basef la'ifimi pindumafuma andeande' pepoma enis epes sanda' waf aonai sanda' ipe' Kristen pendawal biefipa sosambala basef amama ipe' pefa'ami. Waf anama esis sanda' epes hiesi sanda' waf aonai. Ipe' pese'as alafugah epes isima.

¹⁸ Esis ina sanda' maola Dembinai ape'inai Kraisi, owa'etin. Saila ukupa alop asasinai atona. Sanda' basef atom usiusihimi ma sambaso'ma opalef sa'ipa epes isima owa' sogawa andeande' waf aonai o bu'unai.

¹⁹ Ipe' paila God, dei' epes hiesi sogawepa ea'. Amama atom dei' ae' andanifel ma ipe'. Ae' a'i ipe' pegawa waf bu'unai endilisi, ea' ipe' ina pegawa waf aonai, owa'.

²⁰ God anan ofagonama opaf awanena, nogota bandana ma nofa'asa Satan nofe' owina bo'wagah ipe'imi. Ae' ahali' God anda' betena Dembinai ape'inai Jisas Krais nigiambamepa na'a nope la'ela'ef nolomepa.

Enis epes sanda' nemaf bu'unai sa'ipa esis Rom

²¹ Wanda' maol atini Timoti anan nasapa'ago danifel ma nemaf bu'unai ma ipe'. Lusius naloma Jeson naloma Sosipater, amam Juda wapoti' si'i ae', amam wapoti' masapa' nemaf bu'unai ma ipe'.

²² Ae' Tertius, efa' malogola Pol anda'ago basef amama. Ae' asapa' basefa nemaf bu'unai mafe'mago ipe' ma agel Dembinai ape'inai.

²³ Gaius nasapa'ago danifel nemaf bu'unai ma ipe'. Anan numafi ae' Pol andeande' ipat ananinai, ea' numafi esis Kristen hiesi wapoti' safi'i sandatama etifigin na'ae. Erastus anan nanda' maola gavman numafi otamba taun wambel anama, ea' sahalomapa ape'inai Kwartus, amam biam masapa'o basefa danifel nemaf bu'unai ma ipe'.

²⁴ [Ae' anda' betena Dembinai ape'inai Jisas Krais nigiambamepa na'a numafipa ma nope nolomago ipe' hipei. Endilisi.]

Ape' mefela agel Godi

^25-26 Ape' mefela agel Godi lu'una. Anan la'ifinai ma nonda'epa petaga la'ifipa ma basef bu'wami ananimi awalapami, amama basef bu'wami ma'i Jisas Krais. Basef amama fowa' nimeguf hiami ata' mape mandambaho', ea' dei' mataga alihima basef amama fowa' amam profet manda'ami afa' wawalapam alihim. God nape namunai la'ela'ef na'i basef la'ifimi ma basef amama bu'wami dei' mataga mandawalap alihima epes hiesi etap anama hiagoma ma esis hiesi sembale'efana.

²⁷ Anan atotona nogawa endilisi. Ape' mefela agel ananinai la'ela'ef. Jisas Krais atona nogiambamapa monda'am na'ama. Endilisi.