Basef Amama Pol Nandaꞌam Mafeꞌma Esis Romi 15 - Basef Buꞌwami Godi

Ape' mila okom Kraisi

¹ Ape' epes mombale'efana la'ifipa, maol ape'inai anama ma migiambama epes isima bale'ef owa' la'ifinai. Esis ina la'ifisa sofa' nimanimi asasimi, isima ape' migiambamas mofa' nimanimi asasimi molomas. Ape' ina mila ukup ape'imi atom, owa'.

² Ape' hiapai atona etin monda' maol migiambama epes sape felefele'ma ape' ma anona nemaf sofa' waf bu'unai sotaga la'ifis.

³ Ape' mogawa Krais wapoti' ina naila okom ananinai atona, owa'. Waf aonai natagamana si'i Baibel na'i, Krais na'ipa God na'i, “Epes sa'i basef findiwama ine' ea' basef amama atom mafi'i mase'ala ae'.”

⁴ Dei' main, basef hiami fowa' amam manda'am mail Baibeli manda'am mawalipa ape'. Basef amama monda'apa motaga la'ifipa mi'i endilisi God nigiambamapa ma mope andeande'.

⁵ Ape' mofa' pepel ma God atona nanda'apa mataga la'ifipa mombale'efana. Ae' a'i anan nigiambamepa pila waf Krais Jisasi endilisi pefa' ukup etifim.

⁶ Ama ipe' pepe opalef etifim ea' malogof etifim pefela agel Godi, anan Dembinai ape'inai Jisas Krais Ahalomana.

Krais nagiambama esis Juda saloma isima owa' Judaisi wapoti'

⁷ Ea' ipe' hipei ukup mimila esis sahin owan pese'asa opalef esis si'i Krais wapoti' nase'apa okom ape', ma epes hiesi sefela agel Godi lu'una.

⁸ Ae' a'ipipa na'ama. Krais nafi'i nataga nanda' maol nape owina nagiambama esis Juda. Anan nanda'am na'ama ma nihi'ambasa God na'i basef endilisimi atom. Basef amama endilisimi atom fowa' na'iam naloma dambami bafasas akupas asasimi mandawalap alihim.

⁹ Krais nanda' maol anama ma nagiambama esis sololama Godi owa' Judaisi wapoti' sogawa God na'i esis uwahipisa sefela agel ananinai lu'una, si'i Baibel na'iam na'i. David na'ipa God na'i, “Anona nemaf ae' ewalapa basef i'i agel ine'inai ma enis epes owa' Judaisi sololama ine'i. Ea' enda' anom awalef efela agel ine'inai.”

¹⁰ Ea' anom basef Baibeli ma'iam na'ama wapoti' ma'i, “Ipe' epes fowa' peloloma Godi, pendanifel peloma esis wambota Ananinai.”

¹¹ Ea' anom basef Baibelimi ma'iam na'ama wapoti' ma'i, “Ipe' hipei fowa' peloloma Godi, pefela agel Dembinai. Penda' anom awelef pefela agel Ananinai.”

¹² Ea' Aisaia wapoti' na'iam na'i, “Anona nemaf anona aman notaga wambota Jesi. Aman anama notaga nope Dembinai ma esis sololama Godi numafias ea' sombale'efana si'i endilisi anona nemaf anan nigiambamas.”

¹³ Ape' mogawa endilisi God nagiambamapa ma mope andeande'. God anan ofagonama amama. Dei' ae' a'i ipe' pembale'efana nonda' danifel lu'unai noloma opalef awanemi motaga si'ima ipe'. Ea' a'i pepel Ambal Bu'unai Ananinai nonda'epa pegawa endilisi God nigiambamepa ea' piti pepel Ananinai.

¹⁴ Ipe' alupipei ae'ipei, opaf ae'anai egawa endilisi ma ipe' panda' waf bu'unai la'ela'ef ea' pegawa gawa hianai naninani. Ea' ipe' wila ma pese'asa nomonas bu'wami sahin owan.

¹⁵ Ea' anom basef ali' a'ipipa amama la'ifimi atom. Ea' ae' ina umbamahe ma a'ipipa basef amama, owa'. A'i efela ukup ipe'imi. Dei' main, God nase'e okoma ae' nagiambame na'a.

¹⁶ Ea' anan nanda'e ape anda' maola Krais Jisas anda'am la'afena esis sololama Godi owa' Judaisi. Anda' maol si'i amam mondolali ma Godi awalapa basef bu'wami ananimi. Ae' a'i efa'ai epes isima owa' Judaisi sifi'mai Anan ea' Ambal Bu'unai Ananinai nonda'as sotaga epes Godi etis bo'wes andeande' ese'anas Anan si'i ofa anan okom na'iami endilisi.

¹⁷ Ae' ape la'ifiwi aloma Krais Jisas ea' andanifel ma anda' maol Godi.

¹⁸ Krais atona nase'e pepel anda' maol anama. Anan nagiambame nanda'e la'ifiwi afe' anda' maol anama lu'unai awalipa esis owa' Judaisi ma silana some' basef ananimi. Ae' andaiwa'ma i'ipipa anom basef, owa'. Amama atom.

¹⁹ Ambal Bu'unai Godi nase'e pepel ananinai nanda'e la'ifiwi ma anda' ikwaf la'ifinai naninani. Epes hiesi sati maol anama ea' same' basef Godi sailam. Damba damba anda'am Jerusalem awalapa basef bu'wami ma Krais afe' laogoma hi'alagon etambili etap hiagoma Ilirikum.

²⁰ Fowa' damba damba afi'i ataga dei' ae' okom na'i endilisi ma enda' maol Godi ewalapa basef Ananimi bu'wami anagon esis ata' owa' sogawa Kraisi. Ae' andaiwa'ma igi' efe' ewalapam anagon enis epes sali' safe' sawalipasam, owa'.

²¹ Ea' ae' a'i ewalapam si'i basef mail Baibeli ma'iam, “Epes isima owa' enis sefe' sie'ipasa basefa Anan, anona nemaf seme'am sogawana. Ea' epes isima owa' seame' basefanai, anona nemaf seme'am sogawa Anan.”

²² Fowa' anda' maol anama awalipasa basef Kraisi. Maol anama nahopa eaf ae'anai nimeguf hiami ea' ina afe'mago ipe', ata' owa'.

Pol na'i nefe' niti Rom ea' nefe' etap hiagoma Spen wapoti'

²³ Ea' dei' maol ae'anai hi'alana na'ae. Afagof hiami ae' okom na'i endilisi ma efe'mago ipe'.

²⁴ Amama atom dei' a'i ata' ili' efo'o iti ipe' ea', efe' etap hiagoma Spen. Ea' a'i ata' ipan elomepa anom nimeguf nogota laona endanifel elomepa ea', ipe' pigiambame pitumi pehapone eaf nafe' Speni.

²⁵ Ea' dei' a'i efe' Jerusalem enda' maol igiambama esis amam nematawa Godi.

²⁶ Esis Kristen sape etap hiagoma Masedoniai saloma esis Kristen Griki sa'i basef sandame'mam ea' ma sowala amamaga asasimi sonda' tu'wanim mefe' Jerusalem, soso' esis amam nematawa Godi amamaga a'asi.

²⁷ Endilisi ukup asasimi atom ma'iam ea' dei' sanda'am na'ama. Ea' ae' a'i esis sowaolamasa anona wiaf notaoma esis Kristen sape Jerusalemi. Fowa' esis Juda sali' sawalipasa basef Godi ma sagiambama ambagof esis isima owa' Judaisi sape etap hiagoma Masedonia saloma esis Grik sapoma. Amama atom dei' andeande'ma esis sogwamasa wiaf anama esis Judai ma amamaga magiambama alopami.

²⁸ Ea' ae' a'i ata' enda' maol anama hi'ilana nili'. A'i ata' ese'asa amamaga amama bu'wami esis Jerusalem sofa'am andeande', ila eaf Speni efo'o itilipa.

²⁹ Ae' egawa nemaf anama efe'mago ipe', amamaga bu'wami Kraisi mope si'ima ae' efo'o etagamepa i'ipipam.

³⁰ Ape' mombale'efa Dembinai ape'inai Jisas Krais, ea' mogawa Ambal Bu'unai Godi nafela ukup ape'imi ma maimaila esis sahin owan ape'isi. Amama atom dei' a'ipipa basef la'ifimi a'i ipe' penda' maol lu'unai peloma ae' ma penda' betena God ma ae'.

³¹ Ipe' penda' betena Anan nigiambama ae' notagahowe ma lagof enis epes sape etap hiagoma Judiai owa' sombale'efa Kraisi. Ea' ipe' penda' betena God nonda' epes Ananisi sape Jerusalemi sondanifel ma maol anama agiambamas asa'as otamba amama.

³² I'i God ni'i a'e, efo'o etagamepa epe endanifel endilisi elomepa ata' epoma noma'w mope opalef awanem.

³³ God Anan ofagonama opalef awanemi. Ae' a'i Anan nope nolomago ipe' hipei. Endilisi.