Basef Amama Pol Nandaꞌam Mafeꞌma Esis Romi 14 - Basef Buꞌwami Godi

Ape' ina mowaloga fe' esis sahin owani, owa'

¹ Emi egafis sembale'efana, bale'ef asasinai owa' la'ifina, isima ipe' pese'as opalef ipe'imi pefa'as pifi'i piwisi amam nematawa Kristen. Ea' ina pi'i pifitap pelomasa basef mamumami, owa'.

² Enis epes sembale'afana la'ifis, sa' gwa'aimi mamumami hiami. Ea' bale'ef enis epesi ina la'ifina na'ama ina sa' mafis maim, owa'.

³ Ea' epes isima sa' gwa'aimi mamumami, ina ukup aom mopoma epes isima owa' sea' mafisi, owa'. Ea' epes isima owa' sea' mafisi ina ukup aom mopoma epes isima sa' gwa'aimi mamumami sanda' waf aonai, owa'.

⁴ Ipe' ina pewaloga enin epen nanda' maola enin epen, owa'. I'i enin nitu la'ifina maol ananinai o newa, amama maol anan Dembinai numafi epen inima. Enin anona nemaf nitu la'ifin. Dei' main, Dembinai ananinai atona nonda'an nitu la'ifin.

⁵ Enin epen okom napoma anona nemaf lu'unai endilisi nikila' anom nimeguf hiami. Ea' enin epen na'i nimeguf hiami na'ama etin. Epes isima hiesi atona etin sowaloga ukup asasimi motamea.

⁶ Emi egafis ukup mi'i anona nemaf bo'ona endilisi, esis ukup ma' i Dembinai dei' sanda'am na'ama. Ea' emi egafis sa' gwa'aimi mamumami, esis ukup ma'i Dembinai ea' sa'am. Dei' main, esis sanifela God sa'am. Ea' epes isima owa' sea' gwa'aimi mamumami hiami, ukup ma'i Dembinai, dei' sandaiwa'ma anom gwa'aimi. Isima wapoti' sanifela God.

⁷ Ape' mogawa la'afena ape' ina enin epen nape etap anae' naila okom ananinai atona nape, owa'. Ea' ina enin epen naila okom ananinai atona naga', owa'.

⁸ I'i ape' mope, monda' maola mofela agel Dembinai. I'i moga', moga'ma mofela agel Dembinai. Ea' i'i ape' mope namepa o moga', ape' wambota Dembinai atepa.

⁹ Ea' amama atom Krais naga' notanima ambal napaina nohafel wapoti' ma nape Dembinai ma epes isima saga'i saloma isima ata' sape namusi.

¹⁰ Dei' maina ipe' pawaloga sahin owan ipe'isi ma waf asasinai ea' pa'ipas basef nimanimi? Na'amai owa'. Ipe' pegawa anona nemaf ape' hiapai hi'ilapa mitu gani God nope nowaloga epes hiesi ea' nowaloga ape'.

¹¹ Amama si'i Baibel na'iam na'i, “Dembinai na'iam na'ama na'i, ‘Ae' a'i endilisi, anona nemaf epes hiesi sindiwa nembawa sotawa sonda' lotuma ae' hi'ilas, ea' sowalapa basef alihim si'iam si'i ae' God endilisiwei.’ ”

¹² Ea' ape' mogawa ape' hiapai atona etin anona nemaf mi'ipa Goda waf hiami ofagena ape' manda'anai.

Ape' ina monda' anom amamaga mohambombaga sahin owan, owa'

¹³ Ea' ipe' ina pewaloga sahin owan ipe'isi ma waf esis sanda'anai wapoti', hapaimi. Ape' ukup mi'i na'ama mi'i ape' ina monda' anona wafa monda' owalomapa ape'inai nowa nonda' waf aonai, owa'.

¹⁴ Dembinai Jisas nawalipi egawa amama. Ina anom amamaga gwa'aimi mafis maim aom, owa'. Okom epeni atona na'i anom amamaga aom ea' nendaiwa'ma nogwa'am, amama motaga aoma anan.

¹⁵ I'i ipe' pea' anom gwa'aimi ea' dei' pehambombaga enis epes sahin owan ipe'isi, ipe' pegawa, ipe' ukup ina maimaila sahin owan ipe'isi, owa'. Krais naga' ma nofa'ai epes isima ipe'isi sahin owan. Ea' ipe' ina pehambombagas ma gwa'aimi ipe'imi.

¹⁶ Ipe' ina penda' anona waf enis sahin owan Kristen sitilipa nenda' ukup asasimi aom, owa'. I'i ipe' pi'i waf anama bu'unai, ipe' ina penda'ana naep asasimi, hapainai.

¹⁷ Waf anama sa' gwa'aimi embelanai, anama ina ofagena ma siowis wambota Godi numafias, owa'etin. Anama waf bu'unai naloma opalef awanemi maloma waf sandanifelamanai atona. Ambal Bu'unai Godi nase'apai waf anama.

¹⁸ Emi egafis sape sanda' maola Kraisi ma owa' sonda' anona waf nonda' Kristen ukup aom, anona nemaf God okom bo'ona ma waf asasinai ea' enis epes wapoti' sogawa esis epes bu'wasi.

¹⁹ Dei' ape' mila waf hianai nonda' ape' mope opalef etifim, ea' waf bu'unai hianai nonda' bale'ef sahin owani notaga la'ifina.

²⁰ Ina ukup mopoma gwa'aimi atom ea' pehambombaga maol Godi, owa'. Endilisi, amamaga hiami gwa'aimi bu'wami. Ea' i'i ipe' pea' anom gwa'aimi monda' enin epen newa nenda' waf aonai, ipe' wapoti' panda' waf aonai.

²¹ Ina andeande'ma pea' mafis moloma embel wain gwa'aimi maim, o penda' maim amamaga monda' owalomepa nowa ma waf aonai, owa'.

²² Ukup ipe'imi atom mi'i moloma Goda amamaga amama monda' owalomepa nowa. Epes ukup mopoma anom amamaga bu'wami, ukup asasimi ina manda' kotimasa amamaga gwa'aimi maim amama, owa'. Esis sandanifel.

²³ Ea' emi egafis ukup biefima sea'am, ofagema asasimi atom. Dei' main, esis ina sombale'ef la'ifis ma sa'am, owa'. Amamaga hiami epes owa' sombale'efa God sanda'ami, amama awami.