Basef Amama Pol Nandaꞌam Mafeꞌma Esis Romi 13 - Basef Buꞌwami Godi

Ape' mope owina amam gavman

¹ Epes hiesi sope owina amam gavman. Ape' mogawa ina anona gavman nataga na'a, owa'. Maol hianai gavmani nataga lagel Godi atona. Ea' gavman amama hiami mapani, God atona nanda'am mape.

² I'i emi egafis sesambala basef gavmani, esis sesambala waf Godi wapoti'. I'i emi sesambala amam, anona nemaf sofa' nimanimi awami ma waf anama esis sanda'anai.

³ Amam gavman ina mapoma maumbelis epes isima sanda' waf bu'unai, owa'. Amam mapoma maumbelis epes isima sanda' waf aonai. I'i ipe' pindaiwa'ma umbamehepama amam gavman, penda' waf bu'unai atona ma amam anona nemaf minifela agof ipe'imi.

⁴ Amam gavman manda' maol Godi magiambamepa pepe andeande'. I'i ipe' penda' waf aonai, ipe' umbamehepamam. Ipe' pegawa bainat anama amam gavman mahapilanai, ina mahapilana na'a, owa'. Manda' maol Godi ma mogwa nimanimi awami ma isima sanda' waf aonai.

⁵ Na'ama dei' ape' mope owina gavman. Ea' ina umbamehepama nimanimi awami atom ea' mila basef amamumi, owa'. Ape' mila basef mape opalef ape'imi nomon ma'iami monda'am na'ama.

⁶ Amama atom dei' ipe' panda' takis. Dei' main, amam gavman manda'mana maol Godi la'ifim mumafi maol anama atona la'ela'ef.

⁷ Ipe' maol anama napomepa ma pese'am amamaga mamumami enis epes, pese'am. Amam mofa'asa takis, pese'ama takis. Amam mofa'asa moni maima motala waf mi'uli gavmani, pese'am. Dembemi hiami manda' maol bu'unai nandahama epes sefela agof amamumi, pefe' owina amam. Ipe' pendanifel ma pefela agofa anom amam, pefela agof amamumi.

Ape' ukup mimila sahin owan ape'isi endilisi

⁸ Ipe' ina pewaola anona wiafa moni main notaol ama enin epen, owa'. Ea' anona wiaf atotona notaol ma ape' la'ela'ef. Wiaf anma ukup ipe'imi mimila sahin owan hiesi. Dei' main, emi egafis ukup maimaila enis epes, esis saila mi'uli anama Godi endilisi.

⁹ Ape' mogawa mi'uli anama na'iam na'ama na'i, “Ine' owa' nehambombaga waf daso'amainai ea' owa' neha enis amam nematawa soga', owa' nokowalef, ea' ina kowalena ma amamaga enis epesi, owa'.” Mi'uli anama naloma mi'uli hianai napani wapoti', ofagena anama atona na'i na'ama na'i, “Ine' okom ninila enis epes na'ama etin si'i ipe' ukup mapoma ipe' etipa.”

¹⁰ Emi egafis ukup maimaila enis epes sase' opalefa esis isima ina sanda' waf aonai ma esis, owa'. Emi egafis ukup maimaila enis epes esis saila mi'uli anama endilisi.

Ape' monda' waf bu'unai mope andeande'

¹¹ Ae' a'i ipe' penda' waf anama. Dei' main, ipe' pegawa nogota anae' mapeinai. Nogota anae' ipe' pekwaha koh pehafel. Ipe' pegawa fowa' ape' mataga mombale'efana dambaipa, nemaf anama God na'i nefa'apa motanimani ata' napani laogon, ea' dei' nataga felefele'.

¹² Owamb na'i hi'ilana ea' felefele'ma lola notaga. Na'ama andeande'ma ape' mokwaha waf hianai aonai owambunai ma monda' waf bu'unai alipunai pepe la'ifipa si'i mofa' walitapa mahagasa wandafa waf aonai.

¹³ Ape' mope andeande' si'i epes sape alipi. Ina mea' embel la'ifimi mohaga mogaol ea' mopan mi'i basef wandafumi, owa'. Ape' ina monda' waf so'a waolanai monda' salamala basef awami. Ape' ina monda' migimigah mopa' ea' kowalepa ma amamaga enis epesi, owa'.

¹⁴ Ea' dei' pefa' Dembinai Jisas Krais ea' pindawisana si'i luwaguf amama lu'wami sanda' wandafami pefa'ama pelam. Ipe' ina ukup motamea pila ukup awami alop atonaimi, owa'.