Basef Amama Pol Nandaꞌam Mafeꞌma Esis Romi 12 - Basef Buꞌwami Godi

Ape' mondolali ma God mose'ana alop ape'inai si'ina ma Anan

¹ Alupipei, basef amama hiami mali'i endilisimi atom. Amama atom dei' ahali'ipa ma basef la'ifimi ma ipe' ukup mi'i okom lu'unai Godi nainaila ape' nati ape' uwahipipa. Ea' pindilali ma Anan si'i fowa' saha mafis sase'ana pese'ana alop ipe'inai si'ina hi'ilana. Alop ata' nope namona la'ela'ef pese'anana God atona hi'ilana ea' ananinai si'ina, si'i waf Anan okom na'ianai. Ipe' penda'am na'ama, penda' lotu endilisi ma God ukup ipe'imi nomon.

² Ipe' ina pepe na'ama etin si'i saila waf etapanai, owa'. Ipe' pi'i aho'ma God nonda' ukup ipe'imi nomon motaga dambaima waf ipe'inai notaga dambaina wapoti'. Penda'ama pegawa waf endilisinai God okom na'ianai. Waf anama bu'unai atona.

Ape' monda' maol mila gawa bu'unai God nase'apanai

³ God nagiambamas na'a, amama atom dei' a'ipipa atona etin. Ipe' pegawa waf naloma gawa ipe'inai nape na'imama, ipe' ina ukup mi'i ipe' etipa bu'upei endilisi, owa'. Ipe' ata' pewaloga ipe' andeande' pendahama bale'ef ipe'inai God nasi'ipanai.

⁴ Ape' mogawa alop ape'inai atotona, ea' sa'osa'ona hianai. Ea' anama hianai ina nanda' maol etifina, owa'. Nanda'ana deindei'.

⁵ Ea' na'ama etin ape' amam nematawa hiapai mape la'ifipama paloma Jisas Krais, ape' si'i alop atotona. Ea' ape' hiapai atona etin si'i mandagigiambama etin maloma anona alop wa'awa'ana hianai.

⁶ God nandahomapa etin nase'apa presen amamaga bu'wami ananimi maloma gawa naninani. I'i God nefela okom enin epeni ma newalapa anom basef, enin newalapam mondahama bale'ef ananinai.

⁷ Emi egafis sigiambama esis sahin owani, esis senda' maol anama endilisi sigiambama alupusi. Emi egafis gawaisi ma sihi'ambas si'i tisa, esis senda'ana endilisi sihi'ambas.

⁸ Ea' emi egafis segawa ma sefela ukup enis epes, esis senda' maol anama endilisi sefela ukup asasimi. Emi egafis sese'an amamaga enin alupini, esis sese'an hiam. Emi egafis sumafi anona maol, ukup asasimi mohafel endilisi ma maol anama sanda'anai. Emi egafis siti enin alupini uwahipin ma sigiambaman simafian, esis sendanifel sigiambaman.

Waf endilisinai ma ukup mimila esis sahin owan

⁹ Ipe' ukup maimaila esis sahin owan, ipe' ukup milas endilisi. Ipe' ina pembaso'am, owa'. Ipe' pewa' alafugah endilisi ma waf aonai, pepe la'ifipa endilisi ma waf bu'unai.

¹⁰ Ipe' pese'asa opalef esis sahin owan ukup milas endilisi. Ipe' hipei atona etin pefela agof isima enis epes etis.

¹¹ Ipe' penda' maol la'ifipa la'ela'ef ukup mohafel endilisi penda' maol Dembinai.

¹² Ipe' pepe pehafa Dembinai nigiambamepa. Ea' pendanifel etin pupe. I'i nimanimi meatagamepa, pitu la'ifipa. Ea' penda' beten nimeguf hiami la'ela'ef.

¹³ I'i amam nematawa Godi amamaga a'as, pigiambamas pese'asam. I'i epes anona wambel laugunasi sifi'i setagamepa, pimafias andeande'.

¹⁴ Epes sonda' waf aonai ma ipe', penda' beten pihali' Goda nigiambamas sope andeande'. Penda' betena esis. Ea' ipe' ina penda' beten pihali' Goda nohas, owa'.

¹⁵ Epes isima sondanifel, ipe' pendanifel pelomas. Ea' isima salifi, pelef pelomas.

¹⁶ Ipe' ukup mopoma sahin owan ipe'isi hi'ilas pepan opalef etifim pelomas, si'i ukup mapoma ipe' etipa. Ipe' ina ukup mi'i ipe' etipa pi'i dembipei, owa'. Pefe' peloma epes isima falafisi. Ipe' ina ukup mi'i ipe' etipa gawaipei, owa'.

¹⁷ I'i epes sonda' waf aonai ma ipe', ina pegwamasa waf aonai esis, owa'. Ipe' ukup mopoma waf bu'unai ma naep epes hiesi penda'ana.

¹⁸ Ipe' ina ukup mi'i wandaf, owa'. I'i ipe' la'ifipa, pepe opalef etifim pelomas hi'ilas.

¹⁹ Ipe' alupipei ae'ipei endilisi, ina pegwamasa waf aonai esis sanda'mepa anai, owa'. Ipe' pese'as sefe'ma Goda okom wandafunai nopoma esis ama nogwamasa waf aonai esis sanda'mepa anai. Dei' main, basef mail Baibeli ma'i, “Sogwamasa waf aonai ma enis epes sanda' waf aonai, amama maol ae'anai. Ae' atowe anona nemaf egwamasa waf anama aonai esis sanda'mepanai.” Dembinai na'i na'ama.

²⁰ Ea' ipe' penda'am si'i Baibel na'i, “I'i naumbih ipe'isi nolomohas, pese'asa gwa'aimi esis. I'i eap nose'as, pese'asa embel. I'i ipe' penda'am na'ama, anona nemaf penda' esis ambagof aoma waf aonai esis sanda'mapanai.”

²¹ Ea' dei' a'ipipa, ipe' ina pepe piti waf aonai nikila' ipe', owa'. Penda' waf bu'unai ma pehagofa waf anama aonai.