Basef Amama Pol Nandaꞌam Mafeꞌma Esis Romi 11 - Basef Buꞌwami Godi

Israel epes hiesi God nagiambama tu'wanis etis

¹ Dei' a'i ihali'ipa, God nali'amona Israel hiesi epes ananisi? Owa'etin! Ae' wapoti' Israeliwei esimbel Abrahami, wambota Benjamini.

² Epes hiesi isima Godi anan fowa' nandandepas ea', ina nali'amonas, owa'. Ipe' pegawa basef Elaijai mail Baibeli. Elaija nanda' beten nanda' kotima esis Israela God, na'i na'ama na'i,

³ “Dembinai, esis saha amam profet maga'. Ea' sahambombaga balatagw ine'imi sondolaliminama. Ea' ae' atowe ata' la'ela'ef ape profet anda' maola ine'. Dei' esis sagolopa ae' ma sehe ega'.”

⁴ Ea' God nagwamana maim basef Elaija? Anan na'ipana na'i, “Ae' efa'ai epes hiesi 7,000-peleis ae'asi, isima ina sanda' lotuma god baso'amunai Baal, owa'.”

⁵ Amama na'ama etin si'i dei' wapoti' epes isima tu'wanis sape, God fowa' nati uwahipis nandahomas etin. Amama atom dei' nosahe'as sape epes ananisi etis.

⁶ Anan nati uwahipis nagiambamas etin nandandepas. Anan ina okom na'i anona maol bu'unai esis sanda'anai nandandepas, owa'etin. I'i esis sonda' maol bu'unai ma God nosahe'as, anan ina nati uwahipis nagiambamas etin nandandepas, owa'. I'i na'amai, waf anama nati uwahipisanai anama falafunai atona, owa' endilisinai.

⁷ Dei' ape' ata' mi'iam mi'imama? Waf anama God nati epes na'i bo'wes andeande', anama esis Israel sanda' maol lu'unai ma sa'i sofa'anai, ina sofa'ana, owa'. Fowa' God nandandepa esis tu'wanis etis ea' amama atom sofa'ana. Na'ama esis Israel hiesi opalef asasimi maso'as ea',

⁸ si'i buk Baibel na'i, “God nanda' opalef asasimi si'i sa'oh. Nanda' naep asasimi ina mati ea' esis ina same' basef ofagema, owa'etin. Sape na'ama etin safi'i sataga dei'.”

⁹ Devit wapoti' na'i basef amama atoma waf opalef esis Israeli maso'as ea' na'i, “Ae' a'i nemaf anama esis sope sea' gwa'aimi lu'wami atom, God nowa'as nogwamasa waf aonai esis sanda'anai si'i mandelef sambe'am mail alialefa mowa' mafis, ea' si'i isalef waiwa sanda'am mapoma mafis.

¹⁰ Ae' a'i naep asasimi motaga walufuma ina nambimb siti. Ae' a'i ine' nenda' nimanimi mindiwa alafugah asasimi ma la'ela'ef sope na'ama etin.”

Anona nemaf God nofa'ai esis owa' Judaisi sotanimani wapoti'

¹¹ Dei' ae' ahali'ipa. Esis Juda hiesi sandasisi'ip sowa hegililas? Owa'etin! Esis sololama eaf sanda' waf aonai, amama atom dei' God notanima nofa' enis epes owa' Judaisi sotanima safe'ma anan. God nanda'am na'ama ma esis Juda ata' siti waf anama bu'unai nanda'masana esis sololama Anani ma anona nemaf esis Juda kowalasa waf anama bu'unai God nanda'masanai.

¹² Esis Juda sowa' alafugaha God, amama atom dei' anan nagiambama amam nematawa hiesi etapasi sape wambel hiagomai. Esis Juda sololama waf Godi, amama atom dei' God nagiambama isima owa' Judaisi nofa'as sotanimani. Ea' nemaf anama esis Juda hiesi dende'ma ikwaf God okom ma'ianai sotanima sifi'mai anan, esis epes hiesi owa' Judaisi, God nigiambamas endilisi ma nofa'ai hiesi sotanimani.

¹³ Dei' ese'epa anom basef ipe' etipa owa' Judaipei. God nasapa'e afe'ma anda' maola esis owa' Judaisi si'i ipe'. Ea' andanifela maol anama bu'unai dei' anda'anai.

¹⁴ Maol anama ae' okom na'iana endilisi ma efela esis Juda wambota ae'asi ma kowalasa ipe' dei' pape andeande' paloma God. Ama ae' efa' esis Juda tu'wanis etis sotanimani sifi'mai God.

¹⁵ Anan nowa' alafuga ma esis, amama atom dei' nofa'ai enis epes etap hiagoma sataga okom atotona salomana. Ama anona nemaf God nose'as opafa esis Juda sotanimani sifi'mai anan, sondanifel endilisi. Nagiambama epes hiesi etap hiagoma sotanima sope andeande' sondanifel si'i sondanifel ma enis epes saga' sotanima sohafel wapoti'.

¹⁶ Waf anama esis Juda anona nemaf sotanima sefe'ma God si'i basef wamon etin na'ama ma'i, i'i bret tu'wanina nali'i sanda'ana sase'anana Godi bo'ona, bret si'ina wapoti' Godi bo'ona atona. I'i esis sose'ana nombalef lawagim God, agufunama si'ina wapoti' Godi atona.

¹⁷ God nindiwam nelefata anom agof lawah oliv ea' nofa'ai anona agela anona lawag oliv aolupunai nuwataniana lawag anama sawana aof. Ipe' owa' Judaipei, ipe' si'i agel lawag anama aolupunai. Amama atom dei' ipe' pefa' amamaga maim bu'wami mataga ma epes isima Juda si'i agel lawag anama aolupunai nofa' ifata nombalef lawag sawana nape aofi.

¹⁸ Dei' ipe' owa' Judaipei ina pi'i ipe' etipa bu'upei pikila' esis Juda si'i agof amama God nindiwam, owa'. Ipe' ine pi'i ipe' bu'upei ea' esis epes awasi, owa'. Dei' main, ipe' ina penda' nombalef la'ifim, owa'. Nombalef atom monda' ipe' la'ifipa.

¹⁹ A'i ipe' pi'iam na'ama pi'i, “God nindiwa agof amama ma nowatani ape' si'i anona agel lawaginai.”

²⁰ Wila, andeande', ea' esis Juda ina sembale'efana, amama atom dei' nahape'as. Ea' ipe' pembale'efana dei' pape la'ifipa ma anan. Ea' ipe' owa' pefela agof ipe'imi pi'i ipe' etipa bu'upei, owa'. Ipe' umbamahepa pindumafuma andeande'.

²¹ Fowa' God ina na'i aho'ma esis Juda si'i agof amama lawag sawam aof mape la'ela'ef, owa'. Ipe' pindumafuma andeande'. Na'ama nonda'mepas na'ama etin si'i nanda' esis.

²² Ea' ipe' ukup ma'i andeande' okom biefim Godi uwahipimi maloma wandafumi wapoti'. Epes sakwaha waf ananinai, na'ipasa basef la'ifimi. Ea' ipe' God na'i uwahipipei, i'i ipe' pila uwahipimi amama, andeande'. I'i owa', anona nemaf notopa'epa wapoti'.

²³ I'i esis Juda sokwaha waf aonai sosambala God, anona nemaf nofa'as sotanimani si'i nowatania agof amama fowa' nindiwami. Endilisi, God la'ifinai ma nonda'ami na'ama.

²⁴ Ipe' pegawa fowa' ipe' ata' papani etin si'i lawag oliv aolupunai, ea' God nanda' anona maola ipe' natopa' anona agela lawag anama ea' nowataniana anona lawag oliv bu'unai sawana aofi. God nanda' maol anama. Endilisi, anona nemaf nofa' esis Juda sotanimani si'i agof nindiwam lawag sawana aof nuwataniam motanima mope lawag anama ananinai si'ina si'i notawa. Maol anama ina ahifina ma Anan, owa'.

God nati epes hiesi uwahipis nandahomas

²⁵ Alupipei, ae' andaiwa'ma ipe' ukup mohaga mogaola basef amama fowa' mandambahi'i dei' mandawalap alihim. Na'ama ipe' ukup mi'i ma ipe' etipa pi'i, “Ape' mogawa.” Basef amama fowa' mandambahi'i na'ama. Esis Israel opalef asasimi maso'as, ea' ina maso'as la'ela'ef mape, owa'. Mefe' mefe' mondahama nogota anama esis owa' Judaisi hiesi sifi'i sefe'ma God dende' ma ikwaf okom ananinai ma'ianai.

²⁶ Anona nemaf esis Israel hiesi God nofa'as nokwahomasa waf aonai esis sanda'anai sotanima sifi'mai Anan si'i Baibel na'iam na'i, “Anona nemaf aman anama nofa'as sotanimani, nupani wambel Saion nifi'i notagaha waf aonai esis wambota Jekopi sanda'anai, waf aonai sesambala basef Godi.

²⁷ Anona nemaf ekwaha waf hianai aonai esis sanda'anai, i'ipasa basef endilisimi atom i'iam elomas.”

²⁸ Esis Juda sosambala basef bu'wami Godi, sataga naumbih ananisi saho'ofa ipe' owa' Judaipei nofa'epa petanimani. Ea' God fowa' nandandepas ea' okom nainailas. Dei' main, anan okom napoma bafasas asasimi ma basef amama endilisimi atom fowa' gani na'iam nalomam.

²⁹ I'i God nondandepa enin epen nose'an presen bu'unai, anona nemaf anan ina nosambala basef amama ni'ipan ni'i hapaimi noho'ofam, owa'etin. Basef amama mope la'ela'ef.

³⁰ Fowa' ipe' owa' Judaipei pesambala basef Godi. Ea' esis Juda wapoti' sosambala basef amama. Amama atom dei' ipe' pefa' okom dahowinai Godi.

³¹ Ea' na'ama etin dei' esis Juda wapoti' sosambala basef ama dei' sofa' okom anama dahowinai Godi si'i ipe'.

³² God nanda' epes hiesi sope owina waf anama sosambala basef ma anan anona nemaf niti esis hiesi uwahipis nigiambamas na'a.

Ape' mofela agel Godi lu'una

³³ Ahalomafa! Okom Godi naloma gawa ananinai bu'unai lu'una endilisi. Ape' epes ina la'ifipa endilisi ma mogawa ofagema basef ananimi moloma okom ananinai hianai, owa'etin. Ape' owa' la'ifipa ma mowalapa basefa anan okom na'iami. Ea' ape' owa' mogawa waf hianai ananinai, owa'.

³⁴ Endilisi etis, si'i Baibel na'iam na'i, “Emi egafis sogawa okom Dembinai? Emi egafis sase'ana nomonas anan?

³⁵ Emi egafis sase'ana amamaga anan ama anona nemaf negwamasam? Owa'etin.”

³⁶ Anan nanda' amamaga hiami hi'alam mape ilif etapi numafiam. Ea' amamaga amama mape ma mefela agel ananinai atona. Ape' epes hiapai hi'ilapa mefela agel ananinai la'ela'ef. Endilisi.