Basef Amama Pol Nandaꞌam Mafeꞌma Esis Romi 10 - Basef Buꞌwami Godi

Esis Israel ina sofa' waf bu'unai Godi, owa'

¹ Alupipei, okom ae'anai na'iam endilisi anda' betena anona nemaf God nofa' esis Israel nefa'as nokwahomas waf aonai sotanimani.

² Ae' egawa esis andeande' ea' a'i amama. Esis ukup mohafel endilisi sanda' maol la'ifinai ma sila God, ea' esis ina sogawa basef Godi endilisimi andeande', owa'.

^3-4 Esis ukup mahamahasa waf God nanda'anai ma ni'i ape' epes bu'upai. Ea' sanda'am sawalapa waf bu'unai asasinai atona saila mi'uli anama God fowa' naso' Mosesanai. Ea' esis ina safe' owina Goda na'i ape' epes bu'upai, owa'. Ea' Krais nafi'i nataga ea'. Amama atom dei' ape' ina ata' mape owina mi'uli anama, owa'. Anan nafi'i nawalapa amam nematawa emi egafis sembale'efa basef Ananimi dei' God nofalas na'i esis amam nematawa bo'wes andeande'.

⁵ Waf anama epen naila mi'uli anama ma God na'i anan bu'unai, Moses fowa' gani na'iam na'ama na'i, “Emi egafis saila waf anama hianai andeande' hi'alana, anona nemaf esis sefa' ambagof namumi ma saila mi'uli anama.”

⁶ Ea' waf emi egafis sembale'efa God sa'i Anan bu'unai, waf anama na'iam na'ama na'i, “Ipe' owa' ukup mi'i opalef ipe'imi mi'i, ‘Anona nemaf emi egalin nefe' nilata heven?’ ” ma nihali' Krais nisila'i, owa'.

⁷ Ea' ipe' owa' pi'iam na'ama pi'i, “Anona nemaf emi egalin nefe' newala wambel epes saga'i?” nihali' Krais notanimani. Na'ama wapoti' owa'.

⁸ Ea' basef amama ma epes sembale'efa God na'i esis bo'wes ma'i main? Basef amama ma'i na'ama ma'i, “Basef amama mape felefele'ma ipe', mape maloguf maloma opalef ipe'imi.” Basef ape' mombale'am mawalapam ma'iam amama.

⁹ I'i ipe' pewalapa basef amama alihim pi'i Jisas anan Dembinai ma pembale'efa God opalef ipe'imi pi'i God nafelona nohafel hi'agif wapoti', anona nemaf God nofa'ai ipe' wapoti' pitanimani.

¹⁰ Dei' main, ape' mombale'ef opalef ape'imi God na'i ape' amam nematawa mataga bu'upai andeande' ea'. Ea' mawalapa bale'ef ape'inai malogof ape'imi God nofa'apa nokwahomapa waf aonai motanimani.

¹¹ Amama si'i Baibel na'i, “Emi egafis sembale'efa anani, anona nemaf epes isima ina ukup aom, owa'.”

¹² Esis Juda saloma isima owa' Judaisi ea' na'ama etin, God Anan Dembinai atotona ape' hiapai. Ea' anan nagiambamapa nase'apa waf bu'unai etina emi egafis sofalona,

¹³ si'i Baibel na'i, “Emi egafis sa'i agel Dembinai ma sofalona, nofa'as nokwahomas waf aonai sotanimani.”

¹⁴ Ea' i'i esis owa' seambale'efa anan anona nemaf sofalana sogawana si'imama? Owa'etin. Ea' esis i'i owa' seame' basefa Anan, nambimb sombale'efana si'imama? Ea' i'i enis owa' sie'ipasa basef esis, dei' sogawam si'imama? Owa'etin.

¹⁵ I'i God owa' nosapa'i amam amama, dei' amam mefe' mowalapam mi'imama? Owa'etin. Si'i Baibel na'i na'ama na'i, “Ahalomafa! Maol anama epes sofa'i basef bu'wami ae'ami sifi'i, anama bu'unai endilisi!”

Esis Israel hiesi ina saila basef bu'wami Godi, owa'

¹⁶ Ina Israel hiesi saila basef amama bu'wami Godi, owa'etin. Fowa' profet anama Aisaia na'i na'ama na'i, “Dembinai, anona nemaf emi egafis sembale'ef basef amama esis seme'ama afa'? Owa'etin.”

¹⁷ Ape' mogawa, ape' hiapai mame' basef bu'wami ea' amama atom mafela bale'ef ape'inai. Ea' dei' basef amama mataga maina eaf? Amama mataga amam mawalapa basef Kraisi atom.

¹⁸ Ea' ae' a'iam na'ama. A'i esis ina same' basef amama bu'wami? Owa'etin. Esis same'am ea', si'i Baibel na'i, “Basef mafe' mandahama wambel hiagoma mafe'agon hi'alagon.”

¹⁹ Ae' etambel a'iam. A'i esis Israel sogawa basef amama bu'wami o owa'? Owa'etin. Esis sogawa. Moses nali' na'i basef amama na'i, “God na'ipa esis Israel na'i, ‘Ae' efa' enis amam nematawa falafisi, esis ina epes la'ifis sataga epes endilisisi, owa'. Ae' efa'asi igiambamas falafis anona nemaf ipe' kowalepama waf bu'unai ae' enda'masana esis. Ae' efa'ai epes isima owa' seagawa ae'i ea' anona nemaf ipe' pitilis ukup aomas.’ ”

²⁰ Aisaia ina umbamahana ma na'iam nawalapam, owa'etin. Anan nawalapam na'iam alihim na'ama na'i, “Epes isima owa' seagalopa ae', dei' satolowe ea'. Epes isima owa' seahali' ae', dei' ataga andawalapa esis.”

²¹ Ea' esis Israel anan ina na'ipas na'ama, owa'. Anan na'ipas anom basef na'i, “God na'i, ‘Epes isima satopa' basef sosambala basefi. Nogota launai endilisi ae' efalas anda' lagof iwaumasi. Owa'etin.’ ”