Revelesen 9 - Basef Buꞌwami Godi

Ensel nafe'ma wanom biami nufapula biugel ananinai

¹ Ea' ensel anama nafe'ma wanom biami nufapula biugel ananinai, ati anona ondo'w nakwaha heven ilif nowai etap. Ondo'w anama anona ensel. Ea' esis sase'ana ki utainai ma anona hul nagal nowala etap owin. Hul anama owa' nefe' notambili nowala nafe' etin.

² Anan nawisi' uta hul anama ea' nogoh lu'wami mataga si'i nogoh malo nif lu'wami. Ea' nogoh amama malo mase'ala aon ilif, ea' aon alipunai naloma owambunai mataga akutim.

³ Ea' anom asagof si'i kwamu'wis lu'wami makwaha nogoh amama mowala etap. Ea' ensel anama nase'am pepel si'i pepel sipiawa mape etapi maha epesi.

⁴ Ea' mofa' basef na'ama ma'i, “Ipe' ina pehambombaga otalef o amamaga mamumami mataga etapi o anom lawah, owa'. Ipe' pehambombagago epes amama atom ikwaf Godi owa' notoma amagah asasimi.”

⁵ Ea' amam amama la'ifima mose'asa nimanimi epes isima mefe' mondahama aomb wanom biam, ea' ina mofa' pepel ma mohas soga', owa'. Ea' mase'asa nimanimi lu'wami endilisi ma epes isima si'i sipiawa maha epes same' nimanimi lu'wami.

⁶ Nemaf anama epes hiesi sogolopa eafa si'i seaga', owa'. Ina sati anona. Ga' nambimb nondafa'mas sofa' nimanimi lu'wami sope la'ela'ef.

⁷ Ae' ati asagof amama si'i hos mandondombol ma'i mopa'. Balagahima mandati si'i hagw dembemi atom mowalo'ami sanda' gol sanda'am matoma balagah amamumi. Ea' amagah amamumi si'i naep epesi sanda'am.

⁸ Balagah amamumi auf laomi si'i balagah nematawai. Nalelef amamumi si'i nalelef mafis wandafumi laionim.

⁹ Mafatagw amamumi mala siaogw si'i dunduwif si'i agofum pepel ea' behenagof amamumi manda'am mehip si'i hos mahondo' wilkar lu'unai hianai masagih mafe'ma wandaf.

¹⁰ Ahagwalef mailam si'i sipiawa ea' nalelef motawama moha hiesi mose'asa nombot aonai sefa' nimanimi lu'wami. Amama mape ahagwalef. Ahagwalef amamumi pepel ma moha epes aomb amama wanom biam.

¹¹ Amam anona king amamunai numafiam. King anama anan ensel numafi hul anama nagal nowala gani owin endilisi, nafe' etini. Diga esis Hibrui sa'i agel ensel anama sa'i, Abadon. Diga esis Griki sa'i, Apolion. Ofagema ma'i, “Aman nohambombaga amamaga hiami.”

¹² Nemaf aonai ma nimanimi lu'wami mali'i hi'alam. Ea' peme'! Nimanimi biefim ata' mapani nambimb motaga migi'.

Ensel anama nafe'ma wanom wanomi nufapula biugel ananinai

¹³ Ea' ensel anama nafe'ma wanom wanomi nufapula biugel ananinai, ame' anona malogel na'i natagai balata sondolalima Goda sanda' gol sanda'anai da'malifinama to'wan to'wan notawa naep Godi.

¹⁴ Malogel anama na'ipa ensel anama nufapula biugeli na'ama na'i, “Ensel amama awami biamibiam manda' kalabusa walemb lu'unai Yufretis, ine' nekwaha amam mofo'o.”

¹⁵ Ea' nakwahom mafe'ma nambimb meamba esis amam nematawa hiesi sape etapi mowalogas sotaga wenis ea' moha epes hiesi wa'ol soga', biefis sope bo'wes. God nanda' ensel amama mandondombol mape mohafa aua anama ma nemaf anama ma aon anama ma afagel anama atona ma monda' opeh amama.

¹⁶ Ae' ame' soldia hiami endilisi 200 milian matoma hos amamumi. Ame' seambam mataga hiami endilisi.

¹⁷ Ape si'i a'oh andondo'ah ati amam matoma hosi. Amam soldia mala siaogw kapaimi atom. Siaogw amama akwahimi alimi kolotuwaimi maloma batafumi. Balagah hosim si'i balagah mafis wandafumi lu'wami laionim. Ea' nif fandom nogoh mataga otamba batafumi salfa fandom mataga malogof amamumi.

¹⁸ Amam meamba esis amam nematawa hiesi mawalogas sataga wenis ea' maha wa'ol afisa amamaga amama awami wenifim, nif maloma nogoh maloma otam salfa fandumi mataga malogof hosi. Ea' epes hiesi biefis sape bo'wes.

¹⁹ La'ifimi hosi mape malogof maloma ahagwalef amamumi. Dei' main, ahagwalef amamumi si'i iguf, balagah mandandam. Ea' dei' maha epesa ahagwalef amama amamumi.

²⁰ Enis epes hiesi ina afisa amamaga amama awami wenifim, ina samboma opalefa sakwaha waf aonai, owa'. Esis ina sowa' alafugaha amamaga amama sanda'am lagof asasimi, owa'. Esis ina dei' sakwaha waf anama sanda' lotuma ambagof awami maloma god anama baso'omunai sanda' goli siliwa, bras otamba o lawah hiami maim sanda'ami, amamaga amama ina mati o maitu mafi'i, mame' basef, owa'.

²¹ Epes isima saha enis epes saga'i, sanda' ma'akw sanda' ufiali ea' saila waf so'a waolanai, sanda' wali. Ea' esis ina samboma opalefa sowa' alafugaha waf anama aonai, owa'.