Revelesen 8 - Basef Buꞌwami Godi

Sipsip noganai nahape' tep anama nafe'ma 7i

¹ Ea' sipsip noganai nahape' tep anama nafe'ma 7i nowa' buk anama ea' ina ata' owa' anom amamaga monda'am, owa'. Ea' ina anom basef mataga heven mape mafe' mafe'ma nogota si'i awa tu'waninai, owa'.

² Amama mafe'ma ea', ati ensel amama 7-peleim la'ela'ef maitu naep Godi mofa' biugel anama 7-pelaina nandandam.

³ Ea' anona ensel nafi'i naitu felefele'ma balata sondolali ma Goda. Nahapila anona plet gol ama nonda' nogoh alogw bu'wami ma'ami. Esis sase'ana sanda hiami ma nonda' nogoh amama ma anan nokolasom moloma beten amam nematawa hiesi Godi. Ea' nanda' ofa ma God balata anama sanda' gol sanda'anai notawa felefele'ma balata kingi.

⁴ Ea' nogoh maloma sanda amama alogw ma'ami maloma beten esis amam nematawa Godi, amama mandatama etifigin malata ilifa naep Godi.

⁵ Ea' ensel anama nofa' plet anama do'ok sanda amama malami ea' nofa' nifa balata sondolalima Godanai nowalam plet, ea' nakwahom muwai etap. Anan nakwahom ea', otaga holala, anom amamaga mataga manda'am, howalagon nafe' sowambon lu'unai nasol etin nape.

Ensel biamibiam mufapula biugel amamunai

⁶ Ea' ensel amama 7-peleim mahapila biugel anama 7-pelaina mandandombola mufapula biugel anama.

⁷ Ensel nali'i nofapula biugel ananinai ea' ais afitimi si'i otamba pohalami maloma nif maloma esimbel lola'am mataga heven ea' nokolo' ais maloma esimbel mowai etap. Amam mawaloga etap hiagoma naloma lawah hiami mataga wenifigin. Ea' nif fando etap wa'agon ea' biefigin nape. Ea' otalef hiami maluwi amama wapoti' ea' nif fandom hi'alam.

⁸ Ea' ensel anama nafe'ma bifi nofapula biugel ananinai, esis sakwaha anom amamaga si'i halaf fandonai nandegia nafe' nowala naoh. Ea' sawala naoh mataga wenifigin ea' wa'am mandamboma mataga esimbel biefigin nape bo'wagon.

⁹ Ea' sawaloga amamaga amama hiami mape naohi ambagof namumi mapaimi sawalogam mataga wenifigin ea' wa'am maga' biam mape bo'om. Ea' sawaloga sip hiami mafe' naohi wapoti' sawalogam mataga wenifim ea' wa'om aom biam mape bo'om.

¹⁰ Ea' ensel anama nafe'ma wanomi nofapula biugel ananinai, anona ondo'w lu'unai nandegia heven fandona fofol etin si'i nemba'w fandonai nowai etap. Esis sawaloga walembeh hiami maloma embel hiami motah etapi sawalogam mataga wanom ea' ondo'w anama nafe' nowala embel tu'wanim motah wa'ili. Wa'el aom ea' wa'ol biefigin mape bo'om.

¹¹ Ondo'w agili'nama anama sa'i, marasin Anama Numbutinai. Ea' sawaloga walembeh embel hiami sawalogam mataga wanom, ea' wa'om mataga si'i marasin numbutinai. Ea' biefigini mape bo'om. Ea' epes hiesi sa' embel amama awami maofa opalef asasimi saga' hi'alas.

¹² Ea' ensel anama nafe'ma biamibiam nufapula biugel ananinai, esis sawaloga aon owambunai alipunai naloma ondowa sawalogam mataga wanom. Ea' sahambombaga wa'om mataga akutim. Ea' nemaf a'ipanama sowalogana wanom. Etifigin akutigin, biefigin howalgon. Ea' owamb tu'wanina na'ama etin si'i alip.

¹³ Ea' ati anona komon lu'unai nufia' nafe' la'afen gani ilif ame'ana na'i mehip na'i, “Uwahipis uwahipis endilisi esis amam nematawa sape etapi ma nimanimi lu'wami wapoti' motagamas. Dei' main, anom ensel wanom ma'i mufapula biugel amamunai ma nambimb nimanimi amama motagamas!”