Revelesen 7 - Basef Buꞌwami Godi

Esis Israel hiesi 144,000-peleis sefa' ikwaf Godi

¹ Amama mafe'ma ea', ae' ati ensel biamibiam maitu wa'owa'ola biefigin biefigin etap nafe' netambela, mahapila uf hianai etapanai ma uf ina la'ifina nehapusa etap o naoh embel lu'wami o nefa' anona lawag nenda' felifal, owa'.

² Ea' ati anona ensel nafe' nalata ilif aon natefima. Anan nahapila ikwaf la'ifinai Godi nape namunai na'i nosaho' epes sanda' maol Godi. Ea' nofala ensel amama biamibiam God nase'ama pepel ma mohambombaga etap naloma naoh.

³ Anan na'ipam mehip na'i, “Dei' ipe' ina pehambombaga etap noloma naoh moloma lawah maim, owa'. Ata' owa'. Afa' wa'i osaho' epes isima sanda' maol God ape'inai osahe'as uli'. Nambimb andeande' pehambombaga amamaga amama.”

⁴ Ea' ame' esis sa'i esis amam nematawa isima ma'uma'wis ensel anama nasahe'as. Esis nasahe'as ea'i sataga na'ama 144,000. Esis amam nematawa hiesi wambotagw hiami epes Israeli.

⁵ Dei' esis 12,000 epes hiesi esis wambota Judai saloma 12,000 epes hiesi wambota Rubeni saloma 12,000 epes hiesi wambota Gati.

⁶ Ea' esis 12,000 epes hiesi wambota Aseri saloma 12,000 epes hiesi wambota Naptali saloma 12,000 epes hiesi wambota Manasei.

⁷ Ea' 12,000 epes hiesi wambota Simeoni saloma 12,000 epes hiesi wambota Livai saloma 12,000 epes hiesi wambota Isakari.

⁸ Ea' 12,000 epes hiesi wambota Sebuluni saloma 12,000 epes hiesi wambota Josepi saloma 12,000 epes hiesi wambota Benjamini.

Esis amam nematawa hiesi wambota launai sanda' lotu ma God

⁹ Amamaga amama hi'alam, ae' ata' atologon wapoti' ati esis amam nematawa hiesi endilisi safi'i sondowa'anima sape. Ea' ina enin epen la'ifina niamba epes isima sataga ma'uma'wis, owa'. Esis hias endililsi. Epes isima sape etap kantri hiagoma ea' epes hiesi sape wambotagw hiami ma alop anama naninani, diga hianai naninani, isima hiesi hi'alas. Esis saitu anama God natoma balata king ma naep sipsip noganai. Sala anom luwaguf afitimi laumi, sahapila bagah lagof asasimi.

¹⁰ Ea' soga sa'i mehip na'ama sa'i, “God ape'inai Anan natoma balata kingi naloma Sipsip noganai, amam biam mofa'apa motanimani ma makwaha waf aonai ape' manda'anai.”

¹¹ Ensel amama hiami mandatama hi'alam maitu anama balata kingi ea' agufumi amama 24-peleim maloma amamaga amama biamibiam mape namumi mape mitimalo' mati etap felefele'ma balata kingi manda' lotu mandanifela God.

¹² Amam ma'iam na'ama ma'i, “Endilisi! Ape' mandanifel endilisi ma God ape'inai mafela agel ananinai lu'una! Anan Dembinai ofagonama howalagon. Anan nomonas hiami bu'wami mapaina ea' ape' manifelona mafela agel ananinai! Anan pepel hiamunai endilisi! Pepel lu'unai napoma Anan! Amama hiami ananimi atom la'ela'ef. Endilisi!”

Nimanimi esis amam nematawa hiesi hi'alam dei'

¹³ Ea' anona amam agufumi amama 24-peleim nahali'i na'i, “Esis isima sala luwaguf afitimi, esis emi egafis? Esis safi'i enima?”

¹⁴ Ea' agwamana basef a'i, “Dembinai ae'inai, ine' etina negawas.” Ea' Anan na'ipi na'i, “Epes isima fowa' sape etap sofa' nimanimi lu'wami ma lagof esis naumbih. Esis sasa'opa luwaguf asasimi ma esimbel sipsip anama noganai, dei' mataga afitim.

¹⁵ Ea' saitu balata king Godi natologoma. Owamb alip sanda' opeh ananimi ipat ananinai. Anan nape balata anama kingi, anan atona anona nemaf nope nolomas nili'akwas.

¹⁶ Esis ina anona nemaf nolomohas wapoti', ina soga'ma embel iap nose'as wapoti', owa'. Owaf ina anona nemaf la'ifina nohas, ea' ina anom nif lu'wami mihihi'as sope, owa'.

¹⁷ Dei' main, sipsip noganai naitu felefele' endilisi ma balata kingi, anan nope numafias. Anan no'was safe'ma embel amama mataga anona ifata ma sofa' embel amama ambal namunai napaimi. Ea' God anona nemaf nupati'amasa embif hiami naep asasimi ma esis ina ata' selef wapoti', owa'.”