Revelesen 6 - Basef Buꞌwami Godi

Sipsip noganai nahape' tep 7-peleina buk anama

¹ Ae' ati sipsip noganai nahapila buk anama tep 7-peleina nowa'ana nahape' tep nali'i. Ea' ame' anona ma amam amama biamibiami na'i basef diga ananinai ame' si'i otaga diluluwagala. Anan na'i, “Ine' fi'i!”

² Atologon wapoti', ati anona mafin hos afitinai epen natomanai nahapila kopa'w. Esis sase'ana anona hat si'i sanda' wandaf sali'amonana sofa'ami. Ea' anan la'ifina nafe' dei' nali'amona wandaf okom la'ifina nape la'ela'ef na'i nonda' wandaf lu'unai nikila' epes hiesi.

³ Sipsip noganai nahape' anona tep nafe'ma bifi nowa' buk anama ea' ame' anona ma amama biamibiam nafe'ma bifi na'i, “Ine' fi'i!”

⁴ Ea' anona hos akwahinai howalagon endilisi nataga, anona aman natoma hos anama. Amam amama biamibiam mase'ana pepel aman anama natoma hosi. Ea' la'ifina ma nili'amona nogota bu'unai ma amam nematawa etap anae'isi. Ea' esis lupulupa' so'oh soga'. Ea' mase'ana anona bainat lu'unai ma nonda' wandaf.

⁵ Ea' sipsip noganai nahape' anona tep nafe'ma wenifi wapoti' nowa' buk. Ame' anona ma amama biamibiam nafe'ma wenifi na'i, “Ine' fi'i!” Ae' atologon wapoti' ati anona hos alialinai. Aman natomanai nahapila anona skel si'i ikwaf dende'ma nowaloga gwa'aimi nihi'ambasa ikwaf dende'.

⁶ Ea' ame' anona maf si'i anona malogel na'i la'afena amam biamibiam na'i, “Ine' nesaho' anona malep sala su'utip witimi ma 3 kina. Ea' nesaho' maloh sa'umi wanom bali si'i wit napaimi ma otamba 3 kina. Ine' owa' nehambombaga wain noloma wel hi'ilam, owa'!”

⁷ Ea' sipsip noganai nahape' tep nafe'ma bifibifi nowa' buk, ea' ame' malogel anona ma amam ambagof mapaimi nafe'ma biamibiami na'i, “Ine' fi'i!”

⁸ Atologon wapoti' ati anona hos batafunai, aman natomanai agel ananinai ga'. Ea' anona aman numafi wambel esis saga'i sapoma nagi'mana nafi'i. Amam biam mowala amam nematawa hiesi sape etapi sotaga wambotagw biamibiam ea' amam motaga la'ifima moha enis amam nematawa hiesi sape anona wambota atotona soga'. Ea' amam biam moha enis soga' bainat amamunai ea' enis nolomohas soga' ea' enis awes naninani nonda'as soga' ea' mafis amama wandafumi mape aolupi moha enis soga'.

⁹ Sipsip noganai nahape' tep anama wapoti' nafe'ma wenif bifi nowa' buk, ati ambagof enis epes saga'i sape owina balata sondolalima Godi. Fowa' epes isima sombale'efa basef Godi la'ifis sawalapam sa'iam sa'ipasama Jisas Krais nagiambamas. Ea' isima sandaiwa'ma Godi sahas saga'.

¹⁰ Ea' ambagof amama ma'i mehip na'ama ma'i, “King dembinai nahapila ilif etap, ine' nape bo'wena, ine' endilisinai! Afagof ma'um mefe' hi'ilam muli' ma ine' nenda' kotima esis amam nematawa sape etapi, ma negwa esimbel ape'imi?”

¹¹ Ea' God nase'ama anom luwaguf afitimi laumi atona etin na'ipam na'ama na'i, “Ipe' ata' pepoma noma'w nogota bandana. Anona nemaf esis naumbih soha sahin owan isima ipe' pandao'oma panda' maol atonai soga', si'i sahepa paga'. Anona nemaf dohandohama esis naumbih sohas soga' sotaga ma ikwaf ae' a'ianai, egwa esimbel ipe'imi.”

¹² Ae' ati sipsip noganai nahape' tep anama nafe'ma wenif wenifi nowa' buk dei' atef sowambon lu'unai nakoto'ma etap, aon alipunai nataga nandamboma alialina si'i lowaf alinai apinai. Ea' aon owambunai nataga akwahina hi'alana si'i esimbel.

¹³ Ea' ondowa mape ilifi mowai etap si'i su'utip mail lawah figi owa' ata' akume uf nakoto'mam mowai.

¹⁴ Ilif wapoti' nafe' hi'alagon si'i samagwia mat sowa'ana. Ea' halafutagw hiami maloma ailan hianai makwaha anama mapoma mindiki'ah mafe' anagon.

¹⁵ Ea' amam king dembemi etapami maloma agufumi maloma amam kepten dembemi mumafi amam soldia maloma amam amamaga hiamumi maloma amam amama aguf lu'wamumi maloma epes isima hiesi sanda' maola otamba saloma isima hiesi agof a'asi sape owina enis epesi, esis hiesi sawis sandambaho' sape hul maim mape etapi ea' mape nomona owah lu'wami mape halafutagwi.

¹⁶ Ea' sofala halafutagw amama hiami maloma owah hiami sa'i, “Ipe' mehip kwa'ilipei pewai pepei'apa ma pembahe'apa ma amaga anan natoma balata kingi naloma okom wandafunai ma sipsip noganai.

¹⁷ Dei' main, nemaf anama lu'unai ma ukup amam biam wandafuma mogwa waf aonai dei' nataga. Atuwasi emi la'ifina nitu nikila' amam? Owa'etin.”