Revelesen 5 - Basef Buꞌwami Godi

Jon nati anona buk sakolasona na'oh

¹ Ea' ati aman anama natoma balata kingi nahapila anona buk lagel da'isinai ananinai. Buk anama amef mail nomon ande'. Ea' sanda' tep si'i blasta sowa' buk anama. Tep tu'wanina 7-peleina sowa'ana buk anama.

² Ea' ati anona ensel la'ifinai noga na'i mehip na'ama na'i, “Emi epen bu'wani ma atuwasi la'ifina nehape' tep anama nowa' buk anama?”

³ Owa' anin epen atitin nape heveni o nape etap anae'i o nape etap owini la'ifina nehape' tep anama nowa' buk anama nati nomonana, owa'.

⁴ Ae' ati esis ina sati anin epen la'ifina nefa' buk anama niti nomonana, owa'. Ea' ae' dei' okom nimanina amama alef ega a'i mehip.

⁵ Ea' anan agilinai na'ipi na'ama na'i, “Ine' owa' nelef! Neme'! Anona aman natagama wambota anama launai esis Judai, aman anama ma'una Dembinai nataga wambota anama bafalomepa Deviti. Anan si'i anona mafin wandafunai laion, nikila' wandafa waf aonai. Amama atom dei' atuwasi Anan la'ifina ma nehape' tep anama 7-peleina nowa' buk anama naufeniana.”

Jon nati sipsip noganai

⁶ Ae' ati amama biamibiam ambal napaimi maloma amam agufumi mape malipa anona mafin sipsip noganai. Anan naitu, nandati si'i sahana afuna. Anan naitu felefele'ma balata anama kingi. Wambawa mataga balagana 7-peleim ea' naep 7-peleim. Naep amama ma'i Ambagof Bu'wami Godi 7-peleim nasapa'am mafe'agon hi'alagon etap anae' hiagoma.

⁷ Sipsip anama noganai nafe' nofa'ai buk anama nape lagel da'isinai Ananinai natoma balata anama kingi.

⁸ Nofa' buk anama ea', amamaga amama biamibiam ambal namunai napaimi maloma agufumi amama 24-peleim mindiwa nembawa motawa felefele'ma sipsip anama noganai. Agufumi amama hiami atona etin mahapila anona musik si'i gitai naloma anom dis gol si'inama sanda amama nogoh alogw bu'wami ma'ami. Sanda amama alogw ambul mataga malata ilif si'i beten esis amam nematawa Godi.

⁹ Ea' manda' anona awaf dambainai na'ama ma'i, “Ine' bu'winai endilisi ma nefa'ai buk anama nahape' mandof tep anama hianai mowa'anai. Dei' main, esis sahena naga', esimbel ine'imi matala epes isima wapoti' sotanimani nase'anas God. Ine' natala esis amam nematawa hiesi hi'alasa epes hiesi wambotagw hiami mamumami, diga naninani hianai, alop naninani hianai ma epes sape etap hiagoma wambel hiagoma ma sotanimani.

¹⁰ Ine' nanda' epes isima hiesi sataga si'i pris mondolalima Godi ma Anan nope Dembinai ma esis numafias sonda' maol Ananinai. Ea' esis anona nemaf sope si'i king sumafi epes hiesi sape etapi.”

Esis safela agola sipsip noganai

¹¹ Ae' atologon ame' malogof ensel hiami endilisi siambam namba amamunai hiami handet milian tausen, hiami endilisi. Amam maitu malipa balata anama kingi maloma amamaga amama ambal napaimi maloma amam agufumi.

¹² Amam ma'i ma'oh mehip ma'i, “Anama ma'una sipsip noganai, fowa' esis sahana naga'i. Anan bu'unai endilisi ma nofa' namba agel lu'unai noloma amamaga hiami bu'wami otamba hiahaom maim moloma pepel lu'unai noloma gawa bu'unai noloma howalagon. Anan bu'unai endilisi ma epes hiesi sefela agel Ananinai sondanifela Anan sinifelona.”

¹³ Amama mafe'ma ea', Ae' ame' diga ma amamaga hiami maloma epes hiesi God nanda'as ambagof mapaisi hi'alas. Hiesi sape heveni sape etap anae' saloma sape etap owini saloma sape naoh embel owini. Ame' amamaga amama hiami maloma epes isima hiesi sape anama hiagomai sanda' anona awaf na'ama sa'i, “Dembinai nape balata anama Kingi naloma sipsip noganai wapoti', amam biam bu'wami ma mofa' danifel anama hianai naloma agel lu'unai naloma pepel naloma howalagon. Amam biam bu'wami ma mofa' amama nimeguf hiami la'ela'ef hihif.”

¹⁴ Ea' amamaga amama biamibiam mape namumi ma'i, “Endilisi!” Ea' agufumi amama 24-peleim mindiwa nembawa manda' lotuma God naloma sipsip noganai.