Revelesen 4 - Basef Buꞌwami Godi

Esis sanda' lotuma God gani heven

¹ Amama mataga ea', ati gani heven anona uta nandawisi' nape. Ea' maf anama fowa' ae' ame'anai na'i basef amama si'i anona alof nalef ea' na'i, “Ine' lotowi na'ae ilif ihi'ambena amamaga anona nemaf migi' meatagai.”

² Ea' mehip Ambal Bu'unai Godi nataga la'ifina ma ae'. Ati gani heven balata kingi ati anona aman Dembinai natoma balata anama nape.

³ Anan howalagon la'ifina si'i otam bu'unai agilina ma jaspa naloma otam akwahinai agilina ma konilian. Ea' anona elelina natoma balata anama king natomanai ea' ati elelina anama goloto'unai si'i anona otam bu'unai agilinama emeral.

⁴ Anom siaifah hiami bu'wami 24-peleim motawa tulif etina balata anama dembinai kingi. Ea' anom agufumi mala luwaguf afitimi atom matoma mandandamam siaifah amama 24-peleim. Mowalo' hagw dembemi atom mowalo'ami balagah amamumi sanda' gol sanda'ami.

⁵ Otaga holala natagai balata kingi diwala. Ea' anom amalemb lu'wami mala' wapoti' balata anama nape natologoma bagah 7-peleim fandumi mape mafifimana. Bagah amama Ambagof bu'wami Godi 7-peleim.

⁶ Ea' anama balata kingi notawa natologoma anom amamaga mape. Amama si'i embel naoh lu'wami. Amama mandati si'i mapelaga mati embel mati ambagof. Ea' anom amamaga biamibiam ambal namunai napaimi mape la'afen anama balata kingi maitu. Amam mape naep hiami mapaim hi'alam maso'ala amagah opalef amamumi alafugah hi'alam.

⁷ Nali'i ambal napainai si'i anona mafin lu'unai wandafunai laion. Nagi'i anan si'i bulmakau suwafunai. Nafe'ma wanomi anan amaga nandati si'i amaga epeni. Ea' nafe'ma biamibiami nandati si'i anona komon lu'unai nufia' nafe' ilifi.

⁸ Ambagof namumi mapaimi bihinagof wanom wanom mape mandandam. Ea' alop amamunai si'ina naep atomana hi'alana. Ea' owamb alip amam ma'i la'ela'ef na'ama ma'i, “Dembinai God Anan la'ifina bo'ona endilisi! Fowa' gani Anan nape dei' nape, anona nemaf owagama wapoti' nope la'ela'ef.” Amam ina mapoma noma'wa ma'i basef amama, owa'. Manda'am la'ela'ef.

⁹ Amam mandanifela God natoma balata kingi nape ambal namunai la'ela'ef. Ea' mafela agel Ananinai manifelona.

¹⁰ Ama nimeguf hiami maina nogota amam manda'am na'ama, agufumi amama 24-peleim mindiwa nembawa ma naep Dembinai kingi, natoma balata kingi. Ea' amam manda' lotuma Anan nape la'ela'ef. Amam mowali hagw amamumi golim makwahom mondola'wifa mape owina Anan Dembinai amamunai. Hagw amama mafe' mowa felefele'ma balata kingi notawa natologoma ea' ma'i,

¹¹ “Ine' God afa'inai Dembinai afa'inai. Ine' la'ifinai bu'unai endilisi ma epes hiesi sondanifela ine' sofela agel ine'inai lu'una. Ine' la'ifinai. Dei' main, ine' nanda' amamaga hiami. Okom ine'inai atona na'iam nanda'am mataga. Ea' dei' amamaga amama hiami mape ambal napaim.”