Revelesen 3 - Basef Buꞌwami Godi

Basef mafe'ma esis Kristen sape Sardisi

¹ Ine' da'a anom basef mofe'ma ensel anama numafi sios amam nematawa Kristen sape Sardisi. Ae' ahapila anom ambagof bu'wami Godi 7-peleim ea' ahapila ondowa amama 7-peleim. Ae' egawa waf hianai ipe' panda'anai. Esis sa'i basefa ipe' na'ama sa'i, ‘Ipe' ambal napaipa.’ Owa'etin. Ipe' si'i saga'i.

² Ipe' hafel pekwaha pa'oh pandondo'ah! Waf hianai aonai ipe' panda'anai ata' napaipa la'ela'ef na'i nehepa pega'. Ea' anona waf bu'unai kwaie'una ipe' penda'ana notaga la'ifina nape. Dei' main? Waf hianai ipe' panda'anai, Ae' ina ati anona ata' bo'ona ma naep Ahalome Godi, owa'.

³ Ipe' ukup mopoma basef amama Ae'ami fowa' pali' pame'am pefa'am ea'i. Pigi'mam pemboma opalef pekwaha waf aonai pifi'mai Ae'. I'i ipe' owa' pehafel ulal pekwaha koh, nambimb Ae' ifi'i endambaho' etagamepa si'i epen nanda' wali nafi'i nataga ea' ina pegawa maina nogota ae' eatagamepa, owa'.

⁴ Ea' ipe' enipa pape Sardisi owa' penda' luwaguf maim ipe'imi aom, anona nemaf pindawisa luwaguf afitimi dambaimi atom pefe' peloma Ae'. Dei' main, ati ipe' epes bu'upei ma pefa'am amama.

⁵ Ipe' paloma enis epes wapoti' sape ambal namunai la'ela'ef agof ipe'imi mail anona buk sa'i buk ambal namunai napainai. Emi egafis situ la'ifisa sili'amona wandafa waf aonai, Ae' ese'as luwaguf amama afitimi solam. Ea' ina anona nemaf egagaha agof asasimi mail buk anama, owa'etin. Mil la'elaef. Ewalapa agof asasimi ma naep Ahalome ae'anai noloma amam ensel Ananimi i'ipam i'i epes isima ae'asi.

⁶ Ipe' emi egafipa aligah mapaipei peme' andeande' basef amama Ambal Bu'unai Godi nawalapama esis amam nematawa Kristen.

Basef mafe'ma esis Kristen sape Filadelfiai

⁷ Ine' da'a anom basef mofe'ma ensel anama numafi sios amam nematawa Kristen sape Filadelfiai. Ae' bu'uwei endilisi dei' ahapila ki ma uta anama fowa' king Devit nahapilanai. I'i Ae' ewisi'ana, anona aman ina la'ifina ma nowalowana, ea' Ae' i'i ewalowana wapoti', nambimb enin epen ina la'ifina niwisi'ana, owa'. Ae' atowe a'ipipago basef amama ipe'.

⁸ Ae' egawa waf hianai dei' panda'anai hi'alana ea' egawa ipe' wapoti', ata' la'ifipa kwaikwaie' ma enis epes owa' some' basef ipe'imi. Ea' ipe' paila basef ae'ami andeande'. Ea' ina pambaho' agel ae'anai, owa'. Ipe' piti, ae' anda' uta nagal napomepa, owa' anona aman la'ifinama nowalowana, owa'.

⁹ Ipe' peme'! Ipe' pegawa epes isima Satani. Esis sa'i basef sa'i esis epes Judai, owa'etin. Esis ina saila waf Judai, owa'. Esis sambaso'ami. Ae' anona nemaf enda' epes isima sifi'i sindiwa nembawa sotawa felefele'ma bo'wagah ipe'imi ma sogawa ae' okom nainailipa.

¹⁰ Ipe' paila basef ae'ami andeande' paitu la'ifipa ma nimanimi amama matagamipei. Ea' Ae' dei' imafi ipe' ma nemaf anama amama meagwambipei motagama amam nematawa hiesi etap hiagomai ma God nowalogas waf bu'unai aonai. Amama ina anona nemaf motagama ipe', owa'.

¹¹ Ae' ifi'i etagama ipe' mehip. Waf bu'unai ipe' pailanai dei', pilona la'ifapa la'ela'ef. Na'ama anona aman nondalombepa amamaga bu'wami mapoma ipe' ma anona nemaf pefa'ami.

¹² Emi egafis situ la'ifisa sili'amona wandafa waf aonai, anona nemaf Ae' enda'as situ la'ifis si'i olaf nombalo' ipat lu'unai Godi Ae'anai. Ea' epes isima ina sokwaha ipat anama lu'unai sotanima suwisi ande' wapoti', owa'. Sope andeande' nomon la'ela'ef. Anona nemaf enda' agel Ahalome Godi nila esis noloma agel wambel anama lu'unai God Ae'anai Jerusalem, wambel namunai bu'unai. Wambel anama anona nemaf nokwaha heven God Ae'anai napoma nisila'i. Ea' agel namunai Ae'anai wapoti' enda'ana nila esis.

¹³ Ipe' emi egafipa aligah mapaipei peme' andeande' basef amama Ambal Bu'unai Godi nawalapama esis amam nematawa Kristen.

Basef mafe'ma esis Kristen sape Laodisiai

¹⁴ Ine' da'a anom basef mofe'ma ensel anama numafi sios amam nematawa Kristen sape Laodisiai. Ae' ofagewe ma basef endilisimi awalapam mafe' andeande' basef hiami Godi. La'ela'ef awalapam andeande'. Ae' Dembiwei ma amamaga hiami God nanda'am mape ilif etapi maloma epes hiesi wapoti'. Ae' a'ipipago basef amama ipe'.

¹⁵ Ae' egawa waf hianai dei' ipe' panda'anai. Ea' egawa ipe' ina pohalepa, owa'. Ea' ipe' ina nifipa, owa'. Ae' a'i ipe' pepe pohalepa o pepe nifipa.

¹⁶ Owa'etin. Ipe' nifipa kwaukwawie'. Ipe' owa' nifipa endilisi ea' owa' poholepa endilisi. Ea' Ae' andaiwa'mepa a'i igu'upei malogel ae'anai.

¹⁷ Ipe' pa'iam na'ama pa'i, ‘Ape' moni hianai naloma amamaga hiami ma'omapa. Ape' ina anom amamaga a'apa, owa'.’ Ea' naep Ae'ami atilipa pape awepa endilisi ma enis epes sati owahipipa. Ipe' pape kwahupa endilisi naep mase'epa alop nape na'a. Ipe' owa' pegawa amama mowalapa waf aonai ipe' panda'anai, owa'.

¹⁸ Ea' ese'epa gawa ma ipe'. Gol Ae'ami dei' fandom mataga bo'om endilisi. Andeande'ma ipe' petalom petaga bu'upei amamaga hiami endilisi. Andeande'ma petala luwaguf afitimi pelam muli'akwa alop ipe'inai ma esis ina siti alop ipe'inai nope wafifina ea' ambagof aom, owa'. Andeande'ma ipe' petala anona marasin penda'ana naep ipe'imi ma piti andeande'.

¹⁹ Epes hiesi emi egafis Ae' okom nainailas, isima Ae' enda' megah mohas ehas bolam ma enda' waf asasinai notaga bo'ona. Ea' ipe' wapoti' ukup mopoma waf ipe'inai hianai, pemboma opalef pekwaha waf aonai pifi'mai Ae'.

²⁰ Ipe' peme', Ae' aha uta aitu. Emi egafis seme' malogel Ae'anai ma susi' uta, Ae' iwis nomon epe elomas ope atogon wea' gwa'aimi.

²¹ Emi egafis situ la'ifisa sili'amona wandafa waf aonai, Ae' anona nemaf i'i aho'ma esis sope solome ma sope dembesi balata king Ae'anai. Na'ama etin si'i fowa' Ae' aitu la'ifiwi ali'amona wandafa waf aonai. Ea' dei' ape aloma Ahalome Ae'anai ape balata king Ananinai.

²² Ipe' emi egafipa aligah peme' basef amama andeande' Ambal Bu'unai Godi nawalapama esis amam nematawa Kristen.”