Revelesen 22 - Basef Buꞌwami Godi

Embel walemb maloma lawag epes sogwa'am sofa' ambal namunai sope la'ela'ef

¹ Ea' ensel anama nihi'ambe anona walemb lu'unai. Walemb anama howalagon pelele' endilisi si'i glas. Walemb anama nandambe nafi'i balata lu'unai Godi natomanai naloma balata lu'unai Sipsip Noganai natomanai ea' kolo' etin nafe'.

² Walemb anama nafe' la'afena eaf lu'unai ma taun wambel anama lu'wagoma. Walemb fisanai fisana lawah biam ambal namunai motawa. Amam mail mola su'utip danda la'ela'ef mandanda aomb atona etina afagof hiami atona etin. Nohotagw 12-peleim mandahama aomb 12-peleim. Emi egafis sogwa' su'utip amama, esis sofa' ambal namunai sope andeande' la'ela'ef. Soh apulima monda' epes hiesi awes nanda'asi sape kantri hiagoma sotaga bo'wes.

³ Wambel anama amamaga hiami God nandaiwa'mam endilisi ma na'i nili'amonami, amama ina nambimb mope wapoti', owa'. God noloma Sipsip Noganai, amam anona nemaf motoma balata lu'wami kingi mope mumafi epes isima. Esis sanda' opeh Godi sope sonda' lotumana sefela agel ananinai.

⁴ Anona nemaf siti amaga Ananinai ma nonda' agel ananinai nil amagah asasimi.

⁵ Anona nemaf owamb ina notaga wapoti', owa'. Ea' ina ata' anom mafifili moloma lam nogwahis o owaf aon alipunai, owa'. Amama opeh a'am. Dei' main, Dembinai God nififima esis, sope si'i king sumafi enis epes la'ela'ef.

Anona nemaf Jisas nifi'i mehip

⁶ Ea' ensel anama na'ipi na'ama na'i, “Basef amama hiami mape buk anae' endilisimi atom andeande'ma epes hiesi sombale'efam. Dembinai God naso' Ambal Bu'unai Ananinai amam profet. God Anan nasapa'ai ensel Ananimi ma mihi'amba esis sanda' maola Anani ma amamaga amama felefele' meatagai.”

⁷ Ea' Jisas na'i, “Peme'! Anona nemaf Ae' ifi'mai ipe' mehip. Basef Godi mape buk anae', basef amama amamaga hiami ma'i anona nemaf migi' meatagai. Emi egafis sila basef amama, esis sondanifel.”

⁸ Ae' Jon ame' basef amama ati amamaga amama ame'am ea'. Ea' indiwa nembawa etawa felefele'ma ensel anama nihi'ambe amamaga amama ma enda' lotuma anan.

⁹ Ea' ensel anama na'ipi na'i, “Ine' owa' nenda'am na'ama, owa'. Ae' ina dembiwei, owa'. Ae' alomena wandao'oma wanda' opeh etini waloma sahopena ine'imi profet fowa'imi maloma epes isima hiesi saila basefa buk anae'. Ine' nenda' lotu ma God atona.”

¹⁰ Ea' na'ipi na'i, “Basef amama Godi mape buk anama, ina nembaho'am nesapamam mope, owa'. Dei' main, nogota God na'i nonda' amamaga amama, anama felefele'ma notaga hi'ilana.

¹¹ Emi egafis sonda' waf aonai, esis sonda'ana la'ela'ef. Emi egafis sonda' waf aonai endilisi, esis sonda'ana la'ela'ef. Emi egafis sonda' waf bu'unai, esis sonda'ana la'ela'ef. Ea' emi egafis sepe epes bu'wasi Godi, esis sope bo'wes Ananisi na'ama etin la'ela'ef.”

¹² Ea' Jisas na'i, “Peme'! Anona nemaf Ae' etaga mehip. Ea' ifi'i eloma amamaga bu'wami awami, ewaloga esis amam nematawa hiesi egwamasam atona etin mondahama waf esis sanda'anai.

¹³ Ae' atowe ape Dembiwei la'ela'ef, ape ali'i ape agi' endilisi. Ae' ofagewe ma amamaga hiami enda'am efe' efe' embefam andeande' hi'ilam.

¹⁴ Esis amam nematawa sasa'opa luwaguf asasimi ma sataga bo'wes, esis sondanifel. Esis isima anona nemaf God na'i esis bo'wes ma sefa' gwa'aimi ma lawag anama ambal namunai napainai ea' la'ifisa sefe' suwis uta anama ma wambel anama bu'unai.

¹⁵ Epes sanda' waf aonai si'i bogof nombagw manda'anai soloma epes isima sanda' mu'uhupi, epes isima sanda' waf aonai so'a waolanai soloma epes saha enis saga'i soloma epes isima sanda' lotuma god baso'mainai soloma epes isima hiesi ukup maila waf baso'omunai maimailana, epes isima anona nemaf sope ande'ma wambel anama Godi.”

¹⁶ Ea' Jisas na'iam wapoti' na'i, “Ae' asapa' ensel ae'anai nafe'mago ipe' ma nowalapa basef amama ma ipe' sios amam nematawa Godi. Ae' atowe ae' dapana nandala nombaf lawag Deviti, bafalomana ananiwei ataga wambota ananinai. Ae' si'i ondo'w anama lala'wan mafifili endilisi nalatawi kuhimbita.

¹⁷ Ambal Bu'unai Godi naloma nemata'w Sipsip Noganai nose'akwi esis sa'i, ‘Ipe' fi'i!’ Ea' emi egafis seme' basef amama, esis si'i basef amama atom si'i, ‘Ipe' fi'i.’ Ea' emi egafis iap nose'asa embel, esis sifi'i. Emi egafis sa'i sogwa' embel, esis sifi'i sea' embel ambal namunai napaimi si'i presen bu'unai God nose'asana na'ai, owa' sotalona otambai.

¹⁸ Ipe' epes emi egafipa pame' basef Godi ma amamaga amama mail buk anae' anona nemaf meatagai, Ae' a'ipa ipe' hipei mehip, ipe' pindumafuma andeande'. I'i emi egafis siwatani anom basef wapoti' moloma basef Godi, anona nemaf amamaga amama aom endilisi God na'iami ma buk anae', amama anona nemaf God nokolefamanam esis.

¹⁹ I'i emi egafis sogagaha anom basef tu'wanim Godi ma'i amamaga anona nemaf meatagai ma nili'amonama buk anae', anona nemaf God nili'amona epes isima nogalo'mas. Ea' esis ina anona nemaf la'ifisa sefa' gwa'aimi ma lawag anama ambal namunai napaimi, owa'. Anona nemaf ina la'ifisa sefe' sepe andeande' wambel anama bu'unai buk anae' na'iagoma, owa'etin.”

²⁰ Ae' Dembiwei a'i basefa amamaga mail buk anae', Ae' a'i amama endilisimi atom. Ea' dei' a'i, “Endilisi, Ae' anona nemaf ifi'i mehip!” Endilisi, Dembinai Jisas, ine' nifi'i!

²¹ Ae' a'i Dembinai Jisas nigiambamepa na'a nope nolomepa, ipe' God Ananipei. Endilisi.