Revelesen 21 - Basef Buꞌwami Godi

Etap naloma otaga mataga dambaim

¹ Dei' ae' ati etap naloma otaga dambaimi mape. Heven ilif naloma etap apimi mafe' higilalam hi'alam. Ea' naoh wapoti' ina ata' motah, owa'.

² Ea' ati taun wambel bu'unai Godi, anama Jerusalem dambaiguma. Ati taun anama nape naloma God, nakwaha heven ilif nisila'i. Wambel anama nanda' sosaf bu'unai atona nandandombol si'i nemata'w kwa'i koso' amani kwanda' sosaf bu'unai atona ma koso' aman akwa'unai.

³ Ea' ame' anona malogel nataga balata kingi na'i mehip na'ama na'i, “Peme'! Dei' ipat lu'unai Godi notawa naloma epes. Ama Anan nope la'afena esis ma sope amam nematawa ananisi ea' Anan nope God esis sanda' lotumanai. Endilisi, God Anan atona nape nalomas.

⁴ Anan anona nemaf nopati'masa embif hiami ma naep asasimi. Ama ina anona nemaf soga' wapoti' opalef nimanim ea' esis ina selef some' nimanimi wapoti', owa'etin. Dei' main, amamaga amama fowa'imi mafe' mowala higilalam hi'alam.”

⁵ Ea' aman anama nape balata lu'unai kingi na'i, “Peme'! Dei' Ae' anda' amamaga hiami mataga dambaim hi'alam!” Ea' na'ipi wapoti' na'i, “Ine' da'a basef amama. Dei' main, basef amama endilisimi atom ma sembale'efam endilisi.”

⁶ Ea' na'ipi wapoti' na'i, “Ae' anda' amamaga amama dambaimi hiami mataga hi'alam. Ae' atowe ape Dembiwei la'ela'ef hihif ape ali' ape agi' endilisi. Ae' ofagewe ma ahapila amamaga hiami hi'alam ea' ape agi' anda' opeh hiami ae'ami hi'alam. Emi egafis si'i iap nose'as, anona nemaf ese'as embela ifata embel ambal namunai napaimi. Ea' ese'asam na'a si'i presen bu'unai.

⁷ Emi egafis situ la'ifisa sili'amona wandafa waf aonai, esis anona nemaf sofa' amamaga amama hiami bu'wami do'ok a'ipipami. Ea' ae' epe God asasisiwei, esis sope awasi ae'asi.

⁸ Epes isima umbamahasa sotanima, isima owa' sombale'efa Godi, epes sanda' waf naninani aonai endilisi soloma epes isima saha enis saga'i soloma epes isima sanda' waf aonai so'a waolanai soloma isima sanda' mu'uhupi soloma epes isima sanda' lotuma god anama baso'mainai, soloma epes isima hiesi sambaso'omi, epes isima hiesi sofa' wambel asasinai ma hul anama lu'unai nif lu'wami fandumi otam salfa napoma. Hul anama launai si'i ga' nigi' neatagai.”

Jerusalem dambaiguma

⁹ Ea' anona ensel nafi'mai ae'. Ensel anama atotona ma amam ensol 7-peleim mahapila dis amamaga mahambombaga epesi malami mandandam. Amamaga amama awami meagi'i endilisi. Anan na'ipi na'i, “Ine' fi'i, ma ihi'ambena nemata'w sipsip noganai waulu'mana.”

¹⁰ Ea' Ambal Bu'unai Godi nafela okom ae'anai, ensel anama nofa'e afe' alata anona halaf launai gani ilif. Ea' nihi'ambe taun wambel anama bu'unai Godi Jerusalem, anama nape naloma God ea' nakwaha heven nafi'i ata' nisila'i etin.

¹¹ Wambel anama nafifili la'ifinai si'i nagwapin Godi mafifil taun anama. Elelowa nafifili Ananinai anona nafifili si'i otam bu'unai satalona otamba hiami. Endilisi, nafifili anama si'i otam jaspa pelele' endilisi si'i glas.

¹² Taun anama endalelemb lu'wami laumi endilisi malata ilif. Endalelemb amama utagw 12-peleim ea' ensel 12-peleim maitu felefele' mandandama utagw amama. Ea' agof amama mandahama wambotagw 12-peleim esis Israeli mail mandandama utagw amama.

¹³ Endalelemb wa'am titi gani wa'ol aon natefima utagw wanom. Ea' wa'ol aon natopa' nonafama sanda' utagw wanom ea' gani aon natopa' nomba'ma sanda' wanom ea' wa'ol aon nowalama naso'ma sanda' wanom.

¹⁴ Endalelemb amama ma taun anama, otamba lu'wami 12-peleim mape mosohapa endalelemb etapama. Ea' agof amam aposel 12-peleim sipsip noganai mail mandanda otamba amama.

¹⁵ Ea' ensel anama nalome na'i nahapila bandan gol si'i ikwaf nosaho' taun anama ma endalelemb naloma utagw.

¹⁶ Taun anama lu'wagoma. Endalelemb amama dindiwaisa biefigin biefigin ea' usi'im endilisi. Wambel anama tef wala, wa'ol wa'ol na'ama etin. Ensel nosaho'agon nondola'wifa taun anama ma ikwaf ananinai ea' wambel anama tef wala ikwaf nataga 2,400 kilomita. Ea' wa'ol wa'ol biefigin biefigin tasa ikwaf na'ama etin 2,400 kilomita. Wambel anama dogwala owin nalata nataga ilif, ikwaf anama nataga na'ama etin 2,400 kilomita.

¹⁷ Anan nandandepa endalelemb nondola'wif wapoti' etap nalata nataga ilif. Ea' ikwaf endalelembi nikila' nataga 144 alogof bandami mita. Mita anama, anan si'i epes sondola'wifa hiahaomanai si'i rula. Ea' ensel nondola'wifa endalelemb amama ma ikwaf anama atona.

¹⁸ Endalelemb mili'akwa tauni amama God atona nanda'am otamba amama jaspa. Ea' taun anama God nanda' gol atom nanda'ana. Taun anama howalagon nafifil endilisi si'i glas.

¹⁹ Endalelemb owinama ma taun anama, God nofalo'mama otamba mamumami bu'wami sataloma moni hianai. Otam gologowinai bu'unai nali'i nombalo' endalelemb owinama agel jaspa. Otam nagi'i kolotu'unai agel sapaia. Ea' anona nagi'i ma wanomi afitinai agel aget. Ea' anona nafe'ma biefinai biefina ulitinai agel emeral.

²⁰ Ea' anona nafe'ma wanom biefinai agel sandonikis, anama anan nanda' apohi akwahina afitina. Ea' nafe'ma wanom wanom anan akwahinai agel konilian. Ea' nafe'ma 7-peleinai batafunai agel krisolait. Ea' nafe'ma 8-peleinai anama ulitinai anom mandati na'a agel beril. Ea' anona nafe'ma 9-peleinai batafunai nandati na'a agel topas. Ea' anona nafe'ma 10-peleinai agel krisopres anama nanda' apoh batafunai ulilitinai. Ea' nafe'ma 11-peleinai anona kolotu'unai nandati na'a agel haiasin. Ea' anona nafe'ma 12-peleinai anama anona akwahinai agel amatis.

²¹ Utagw amama 12-peleim si'i ombahigis afitimi 12-peleim salatamam endilisi. Anona uta sanda'ana anona bahigin lu'unai atotona. Taun anama eaf atotona. Eaf anama gol atom mafifili howalagon pelele' endilisi si'i glas sanda'ana.

²² Ae' ina ati ipat Godi lu'unai sanda' lotuwanai notawa taun anama, owa'. Dei' main, Dembinai God la'ifinai nikila' la'ifimi hiami hi'alami naloma Sipsip Noganai, amam biam mape si'i ipat lu'unai Godi ma taun anama.

²³ Ea' taun anama aon owambunai alipunai maol nanda'anai owa' ma wambel anama howalagoma, owa'. Dei' main, mafifili lu'wami Godi atom mumafiagon manda'agon howalagon. Ea' Sipsip Noganai anan atona si'i nagwapin anama.

²⁴ Epes etapasi hiesi hi'ilas anona nemaf sofa' nafifili atoma taun anama ea' sefe'. Ea' amam king mumafi etapi anona nemaf mofa'ai sosaf otamba maim amamumi mifi'mai wambel anama.

²⁵ Alip esis ina sowalo utagwa endalelemb amama, owa'. Magal la'ela'ef mape. Dei' main, owamb ina aonona nemaf notaga taun anama wambel lu'unai, owa'.

²⁶ Sosaf bu'unai noloma otamba moni maim ma'oh wambel kantri hiagoma epes hiesi anona nemaf sofa'am suwisa wambel anama sombe'am.

²⁷ Ea' amamaga awami moloma epes emi sanda' waf naninani aonai soloma emi egafis sa'i basef baso'maimi soloma emi egafis sanda' waf aonai nanda' epes ambagof aom, epes isima ina sefe' siwisa wambel anama, owa'. Sipsip Noganai nanda' agof enis epesi mail buk anama agof epes sofa' ambal namunai mailanai, epes isima etis anona nemaf sefe' suwis wambel anama.