Revelesen 20 - Basef Buꞌwami Godi

Satan nanda' kalabus nape afagof 1,000-peleim

¹ Ea' ati anona ensel nakwaha heven nisila'i. Anan nahapila ki utainai ma hul anama launai nogal nowala gani ma owa' notambili. Ea' nahapila sen lu'unai wapoti'.

² Anan nahapila kwambon anama du'utinai la'ifinai, kwambon anama fowa'inai endilisi. Anan “Aman nambaso'ma epes hiesi.” Anan Satan. Ea' ensel anama nowa'ana sen nape nanda' kalabus nandahama afagof 1,000-peleim.

³ Ensel anama nakwahona nafe' nowala hul anama launai ea' nowalowamana uta ilif la'ifina. Ea' Satan ina anona nemaf la'ifina ma nombaso'ma amam nematawa hiesi wapoti', owa'. Anan ata' nope nohafa afagof 1,000-peleim ama ata' hi'ilam ea', ensel anama notagahona wapoti' nefe'agon ganigani ma nogota bandana.

⁴ Amama mafe'ma ea', ati anom balatagw lu'wami kingi ma'oh ea' enis epes satoma balatagw amama. God nase'asa agel lu'unai ma sowaloga waf esis amam nematawa hiesi sanda'anai ma kot. Ea' ati ambagof epes isima hiesi. Esis owa' sonda' lotuma mafin nape aolupi naloma ambal ananinai sambalonai, ea' owa' sofa' ikwaf aonai mafin anama amagah lagof asasimi. Epes isima sembale'efa basef Godi la'ifis sawalapa basef endilisimi Jisasi. Waf anama atona sanda' opeh bu'wami, dei' esis naumbih satopa' bagafowas afis. Sohafel wapoti' sofa' ambal namunai sope dembesi king soloma Krais sope sondahama afagof 1,000-peleim.

⁵ Nemaf anama nili'i ma esis saga'i sili' sohafel hi'agilif. Ea' epes isima fowa' saga'i ina sofa' ambal namunai nemaf anama, ata' owa'. Esis ata' sope sohafa afagof amama 1,000-peleim mefe'ma hi'ilam.

⁶ Epes isima sotanima sohafel nemaf anama nali'i, esis sandanifel sope bo'wes andeande'. Ea' ga' anama niegi'i ina la'ifina nohagofa epes isima, owa. Esis sope pris Godi sope pris Kraisi sondolalimam. Ea' sope dembesi soloma Kraisa sumafi enis epes afagof 1,000-peleim.

Satan nokwaha kalabus nogota bandana ea' nofa' nimanimi endilisi

⁷ Afagof amama 1,000-peleim hi'ilam, uta nindausi' ma kalabus ea' Satan nokwaha kalabus ananimi nuwisi ande'.

⁸ Anan nuwisi ande'ma nombaso'ma epes amam nematawa hiesi sape etap anae' hiagoma biefigin biefigin nafe' notambela, esis epes hiesi Gok saloma Magok. Ea' Satan nokolasa esis sonda' wandaf. Epes hiesi asasisi isima hiesi sandahama wesan na'oh naoh akata.

⁹ Ea' sefe' ganima etap hiagoma laogoma sondowasa' saitu tulif sindiwapagon anama amam nematawa Godi sapoma, anama wambel taun anama God okom ma'iana endilisi. Ea' nif misila'i heven fando soldia amama Satani hi'alam.

¹⁰ Amama mataga ea', God nokwaha aman anama Satan nambaso'masi nefe' hul anama nowala owa' notambili nif fandom lu'um otam salfa la'ela'ef mapani. Amam ensol mali' makwaha mafin nape aolupi naloma profet anama nambaso'ami mowala mape hul anama. Amam biam moloma Satan mope anama la'ela'ef hihif mofa' nimanimi owamb alip anama nif fandumi mapoma.

God nawaloga epes sanda' waf aonai saga'i ma basef lu'wami

¹¹ Ea' ati balata lu'unai kingi afitinai notawa, anona aman natoma balata anama. Etap anae' naloma otaga ilif mafe'ma Anan ea' owa' anagon ma amam mopaigon, owa'. Epes hiesi ina anona nemaf sotolom wapoti, owa'.

¹² Ea' ati esis saga'i sape, epes isima agufisi saloma isima agof a'asi saitu naep balata kingi. Ea' aman anama natoma balata anama nefa' anom buk ea' naufam. Ea' naufa anona buk wapoti', agof esis sofa' ambagof namumi mailanai. Ea' nati amef mail buk amama, ma'i maina waf esis sanda'anai nawaloga esis saga'i sandahama waf hianai esis sali' sanda'anai.

¹³ Wambel saga'i sapoma naloma naoh embel makwaha epes isima saga'i sotanimani ma nogota anama. Ea' Anan natoma balata kingi nawaloga esis hiesi atona etin sandahama waf hianai esis sanda'anai.

¹⁴ Ea' nakwaha ga' naloma wambel saga'i sapoma mafe' mowala hul anama launai nif lu'wami fandumi mapeinai. Hul anama si'i ga' nafe'ma bifi notagama epes hiesi.

¹⁵ I'i Anan natoma balata kingi owa' nieti agel anin epeni nope buk anama, nefelen nokwahin newala hul anama nif amama fandumi mapeinai.